ព័ត៌មានជាតិ
រយៈពេល ៥ ឆ្នាំ សហគមន៍ ចាប៉ីអមតៈ បណ្ដុះបណ្ដាលអ្នកដេញចាប៉ី ២០០ នាក់
ឈានចូលដល់ឆ្នាំទី ៥ ដែល ចាប៉ីដងវែង ត្រូវបានចុះក្នុងបញ្ជី បេតិកភណ្ឌវប្បធម៌អរូបីនៃមនុស្សជាតិ របស់អង្គការយូណេស្កូ ឃើញថាប្រជាពលរដ្ឋខ្មែរ និងយុវជនបានស្វះស្វែងរៀនសូត្រប្រើឧបករណ៍តន្ត្រីបុរាណ ចាប៉ី ពោល គឺ សហគមន៍ បានបណ្ដុះបណ្ដាលសិស្សបានចំនួន ២០០ នាក់។ នេះបើតាមការឱ្យដឹងពីលោក ពេជ សារ៉ាត ប្រធាន សហគមន៍ ចាប៉ី អមតៈ។
លោក ពេជ សារ៉ាត បានមានប្រសាសន៍ប្រាប់ “កម្ពុជាថ្មី” បន្តថា ប៉ុន្តែចំនួននៃអ្នកយល់ដឹង និងចេះដេញចាប៉ីនេះ នៅមានកម្រិតនៅឡើយ បើប្រៀបធៀបនឹងចំនួនប្រជាពលរដ្ឋសរុប។
លោក ពេជ សារ៉ាត មានប្រសាសន៍បញ្ជាក់ថា៖ “ជាពិសេសស្រ្តីអ្នកចេះដេញចាប៉ី មានភាគរយតិចមែនទែន។ ស្ត្រីដែលរៀនចាប៉ីពីសហគមន៍ចាប៉ី អមតៈ មកដល់បច្ចុប្បន្នមានតែចំនួន ៣នាក់ប៉ុណ្ណោះ ក្នុងចំណោមសិស្ស ២០០រូប”។
ជាមួយគ្នានេះ ប្រធាន សហគមន៍ ចាប៉ី អមតៈ ខាងលើ បានបង្ហាញមោទនភាព ដែល សហគមន៍ បានបណ្ដុះកុមារឱ្យចេះដេញចាប៉ី បានចំនួន ២០ រូប។
លោក ពេជ សារ៉ាត មានប្រសាសន៍ថា៖ “អ្វីដែលគួរឱ្យកត់សម្គាល់នោះ គឺពីឆ្នាំទី១ ដល់ឆ្នាំទី៥នេះ សហគមន៍បានបណ្ដុះបណ្ដាលកុមារចំនួន ២ ក្រុម មានចំនួនសរុប ២០ រូប ដែលពីមុនមកអត់ដែលមានកុមារច្រៀង និងដេញចាប៉ីដងវែងនោះទេ។ កុមារទាំង២០នាក់នោះ មានអាយុចាប់ពី ១១ ឆ្នាំ រហូតដល់ ១៥ឆ្នាំ។ ពួកគាត់ចូលរៀន ដោយមិនមានបង់ថវិកា អ្វីទេ។ នេះជាមោទនភាពដែលសហគមន៍ចាប៉ី អមតៈ បានខិតខំប្រឹងប្រែងចែករំលែក និងបណ្ដុះបណ្ដាល ដែលមានការគាំទ្រពីក្រសួងវប្បធម៌ និងវិចិត្រសិល្បៈ”។
លោកមានប្រសាសន៍ថា ទោះបី សហគមន៍ ចាប៉ី អមតៈ មិនទាន់មានមូលនិធិ ឬការគាំទ្រពីខាងណា ក៏ប៉ុន្តែក្រសួងវប្បធម៌ បានគាំទ្រជាកម្លាំងចិត្ត កម្លាំងកាយ ដើម្បីធ្វើឱ្យអ្នកស្ម័គ្រចិត្តរបស់សហគមន៍ ធ្វើការបណ្ដុះបណ្ដាលអ្នកជំនាន់ក្រោយរហូតមក។
លោក ពេជ សារ៉ាត មានប្រសាសន៍ថា៖ “ពួកយើងជាគ្រូ ជាអ្នកចែករំលែក គឺធ្វើការដោយស្ម័គ្រចិត្ត ដោយស្មារតីទទួលការខុសត្រូវ និងធ្វើដោយពេញចិត្ត ស្រឡាញ់វប្បធម៌ខ្មែរ ហើយខ្ញុំបានកៀរគរយុវជនផ្សេងទៀតឱ្យពួកគាត់ចេះចែករំលែកសេចក្ដីស្រលាញ់សម្រាប់វប្បធម៌ខ្មែរ”។
ប្រធាន សហគមន៍ ចាប៉ីអមតៈ បានឱ្យដឹងបន្ថែមថា ដើម្បីចេះដេញ និងច្រៀងចាប៉ីបាន គឺត្រូវប្រើរយៈពេលហាត់រៀនពី ៣ ទៅ ៦ ខែ ឬ ៩ខែ ដោយអាស្រ័យលើការហាត់រៀនរបស់សិស្ស។
លោក ពេជ សារ៉ាត មានប្រសាសន៍ថា៖ “បច្ចុប្បន្នយើងកំពុងបណ្ដុះបណ្ដាលច្រៀងចាប៉ី ប៉ុន្តែពួកគាត់មិនទាន់អាចច្រៀងបានទាំងអស់ទេ ប៉ុន្តែយើងបានបែងចែកឱ្យអ្នកច្រៀងគឺគាត់ច្រៀងទៅ សម្រាប់អ្នកដេញចាប៉ី ឱ្យគាត់ដេញទៅ ដើម្បីធ្វើយ៉ាងណាដើម្បីធ្វើយ៉ាងណាជាការរួបរួមសាមគ្គីគ្នាក្នុងការលើកស្ទួយចាប៉ីដងវែង ក្នុងនាមគាត់ជាកុមារ ប៉ុន្តែគោលដៅខាងមុខ ពួកគាត់ត្រូវតែដេញចាប៉ីផង ច្រៀងផង”។
ដើម្បីអបអរ ចាប៉ីដងវែង ត្រូវបានចុះក្នុងបញ្ជី បេតិកភណ្ឌវប្បធម៌អរូបីនៃមនុស្សជាតិ របស់អង្គការយូណេស្កូ ខួប៥ឆ្នាំនេះ សិស្សនៃសហគមន៍ ចាប៉ីអមតៈ នឹងបង្ហាញសមត្ថភាពនៅក្នុងទស្សនីយភាពចាប៉ីដងវែង នៅថ្ងៃទី ៣០ ខែវិច្ឆិកា ឆ្នាំ ២០២១ នេះ នៅខេត្តកំពង់ស្ពឺ។
គួរបញ្ជាក់ថា ចាប៉ីដងវែង ត្រូវបានបញ្ជូលក្នុងបញ្ជីបេតិកភណ្ឌអរូបីនៃមនុស្សជាតិនៅថ្ងៃទី ៣០ ខែវិច្ឆកា ឆ្នាំ២០១៦។ ចាប៉ី ជាពាក្យក្លាយមកបីពាក្យសំស្ក្រឹតថា “ចក្ឆប៉ី”។ ហៅឈ្មោះថា ចាប៉ីដងវែង មកពីចាប៉ី នេះមានដងវែងទន្ទាំ។ ចាប៉ីដងវែងជាឧបករណ៍មានខ្សែ ២ ឬ ៤ ប៉ុន្តែវាមានសំនៀងតែ ២ ទេ។ វាសម្រាប់ប្រគំក្នុងវង់ភ្លេងការបុរាណ វង់ភ្លេងអារក្ស វង់ភ្លេងមហោរីជាដើម និងប្រើទោលសម្រាប់លេងកំដរចម្រៀងកំណាព្យ។
ព្រឹទ្ធាចារ្យចាប៉ីដងវែងរបស់កម្ពុជារួមមាន ព្រឹទ្ធាចារ្យ ពូថៅដៃ, ប្រាជ្ញ ឈួន, គង់ ណៃ, ចង្គូមប្រាំបី, ម៉ម សុន, អ៉ិន សារុន, ឯល បៀន, ឯ យិន, នេត ប៉េ, សិន សយ, កែវ ហឿន, សួន សាន, គុយ ហ៉ីន និងអ្នកចាប៉ីដងវែងបច្ចុប្បន្នមាន លោក ពេជ សារ៉ាត់, សាន វណ្ណឌឿន និងលោក ឌួង សុខគា ជាដើម៕
អត្ថបទ៖ ច័ន្ទ វីរៈ
-
ព័ត៌មានជាតិ៧ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ២ ថ្ងៃ ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
ព័ត៌មានជាតិ១ សប្តាហ៍ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៧ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ១ សប្តាហ៍ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
កីឡា៣ ថ្ងៃ ago
ជើងឯកម៉ុងហ្គោលី Erdene អរគុណបុរសធ្លាប់ដឹកដៃ ឈឿង ល្វៃ ធ្វើឲ្យក្តីស្រមៃក្លាយជាការពិត
-
ព័ត៌មានជាតិ៦ ថ្ងៃ ago
សម្តេច ហ៊ុន សែន ៖ ហេតុអ្វីបានជាមកដល់ពេលនេះហើយមានមន្ត្រីយើងប្រព្រឹត្តបែបនេះ ដោយពាក់ស្បែកជើងចូលក្នុងព្រះវិហារ?
-
ជីវិតកម្សាន្ដ២ ថ្ងៃ ago
ខេមរៈ សិរីមន្ត ៖ «ទោះខ្ញុំមិនមែនជាអ្នកធំ តែសុំធ្វើកិច្ចការធំខ្លះជូនជាតិតាមវិជ្ជាជីវៈសិល្បៈ បង្ហាញទៅពិភពលោក»