ព័ត៌មានជាតិ

លោកស្រី ឯកអគ្គរាជទូតអង់គ្លេស កោតសរសើរកិច្ចខិតខំប្រឹងប្រែង របស់អាជ្ញាធរខេត្តរតនគិរី

បានផុស

២ years មុន

នៅ

ថ្ងៃចន្ទ ៦ ធ្នូ ២០២១

ដោយ

រតនគិរី ៖ លោកស្រី Tina Redsaw ឯកអគ្គរាជទូតអង់គ្លេស ប្រចាំប្រទេសកម្ពុជា បានថ្លែងការកោតសរសើរ និងវាយតម្លៃខ្ពស់ ចំពោះកិច្ចខិតខំប្រឹងប្រែងរបស់អាជ្ញាធរខេត្តរតនគិរី និងដៃគូពាក់ព័ន្ធក្នុងការសម្អាតមីន រំដោះផ្ទៃដីជូនប្រជាពលរដ្ឋ។ ការកោតសរសើរនេះធ្វើឡើងក្នុងឱកាសដែលលោកស្រីបានចូលរួមកិច្ចប្រជុំស្ដីពីវឌ្ឍនភាពវិស័យសកម្មភាពមីន រវាងអាជ្ញាធរមីន និងភាគីពាក់ព័ន្ធវិស័យសកម្មភាពមីន ក្នុងខេត្តរតនគិរី នៅសាលប្រជុំសាលាខេត្តរបស់រដ្ឋបាលខេត្ត នារសៀលថ្ងៃទី៦ ខែធ្នូ ឆ្នាំ២០២១នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រីបានបន្តថា កម្ពុជានិងចក្រភពអង់គ្លេស មានបេសកកម្មរួមគ្នា ក្នុងការចូលរួមសង្គ្រោះជីវិតមនុស្ស ឲ្យរួចផុតពីគ្រោះថ្នាក់ ដោយសារមីននៅកម្ពុជា។ហើយកន្លងមកចក្រភពអង់គ្លេស បានផ្តល់ថវិកាជូនរាជរដ្ឋាភិបាលកម្ពុជា ក្នុងការបោសសំអាតមីននិងយុទ្ធភណ្ឌមិនទាន់ផ្ទុះក្នុងន័យរួមចំណែកឆ្លើយតបនឹងផែនការយុទ្ធសាស្ត្ររបស់រាជរដ្ឋាភិបាលកម្ពុជា ធ្វើយ៉ាងណានៅឆ្នាំ២០២៥ កម្ពុជាគ្មានមីន និងយុទ្ធភណ្ឌមិនទាន់ផ្ទុះលើទឹកដីរបស់ខ្លួន។

ក្នុងឱកាសនេះ លោក គិត ទ្រី អភិបាលរងខេត្ត បានមានប្រសាសន៍ ថ្លែងអំណរគុណ ដល់លោកស្រីឯកអគ្គរាជទូតអង់គ្លេស លោកអគ្គលេខាធិការអាជ្ញាធរមីន ក្រុមប្រតិបត្តិករជាតិ អន្ដរជាតិ ដែលបានចំណាយពេលវេលាដ៏មមាញឹកចូលរួមកិច្ចប្រជុំនាឱកាសនេះ។

លោកអភិបាលរងខេត្តក៏បានលើកឡើងពីស្ថានភាពទូទៅនៃខេត្ត និងវឌ្ឍនភាពវិស័យសកម្មភាពមីននៅខេត្តរតនគិរី មកដល់ពេលបច្ចុប្បន្ន ការបោសសំអាតមីន សម្រេចបានក្រឡាផ្ទៃបានបោសសំអាតចំនួន ២៧,១៥៧,៦៧៦ម៉ែត្រការ៉េ មីនប្រឆាំងមនុស្ស២៦១គ្រាប់ និងសំណល់ជាតិផ្ទុះពីសង្គ្រាមចំនួន ១៤,០៩៤គ្រាប់។

ជាមួយគ្នានេះផងដែរ លោក ព្រំ សុភមង្គល អគ្គលេខាធិការអាជ្ញាធរមីន ដែលបានអញ្ជើញជាអធិបតីភាពក្នុងកិច្ចប្រជុំបានថ្លែងអរគុណដល់រាជរដ្ឋាភិបាល និងប្រជាជនចក្រភពអង់គ្លេស ដែលបានចូលរួមជួយដល់ការងារបោសសំអាតមីន ចាប់តាំងពីឆ្នាំ១៩៩២ លើផ្ទៃដីជាង១២២គីឡូម៉ែត្រក្រឡា និងរកឃើញគ្រាប់ និងយុទ្ធភណ្ឌមិនទាន់ផ្ទុះជិត៧ម៉ឺនគ្រាប់។ លោកក៏បានស្នើសុំឲ្យចក្រភពអង់គ្លេស បន្តជួយដល់រាជរដ្ឋាភិបាលកម្ពុជា ក្នុងការអនុវត្ត នូវផែនការយុទ្ធសាស្ត្រជាតិសកម្មភាពមីន (២០១៨-២០២៥) ដើម្បីឆ្ពោះទៅរកកម្ពុជាមួយ ដែលគ្មានគ្រោះថ្នាក់ដោយសារមីន និងគ្មានមីន ឆ្នាំ២០២៥។ និងបានកោតសរសើរយ៉ាងជ្រាលជ្រៅ ចំពោះប្រតិបត្តិករដោះមីន ក្រុមការងារ (MAPU) ក្រុមការងារផែនការសកម្មភាពមីនថ្នាក់ខេត្តស្រុក មន្ទីរ ស្ថាប័ន អង្គការដៃគូអភិវឌ្ឍន៍នានា ដែលចូលរួមចំណែកយ៉ាងសកម្ម ក្នុងការបំពេញតួនាទី ភារកិច្ច របស់ខ្លួននិងទទួលបានលទ្ធផលជាផ្លែផ្កាផងដែរ។

សូមបញ្ជាក់ផងដែរថា នៅក្នុងខេត្តរតនគិរីមានតំបន់សង្ស័យមានមីន និងសំណល់ជាតិផ្ទុះពីសង្គ្រាមមានផ្ទៃដីនៅសល់សរុប ៥៩.២គីឡូម៉ែត្រការ៉េ ក្នុងនោះចម្ការមីន ២.៧គីឡូម៉ែត្រការ៉េ ចម្ការគ្រាប់បែកចង្កោម ៥៥.២គីឡូម៉ែត្រការ៉េ និងចម្ការសំណល់ជាតិផ្ទុះពីសង្គ្រាម ១.៣គីឡូម៉ែត្រការ៉េ៕

ដោយ ៖ វុទ្ធឦសាន