ព័ត៌មានជាតិ

កម្ពុជាគ្រោងបញ្ជូនពលករMOUប្រមាណជាង១ម៉ឺននាក់ទៅធ្វើការនៅថៃដើមឆ្នាំ២០២២

បានផុស

២ years មុន

នៅ

ថ្ងៃពុធ ១៥ ធ្នូ ២០២១

ដោយ

កម្ពុជាគ្រោងនឹងបញ្ជូនពលករMOUប្រមាណជាង១ម៉ឺននាក់ទៅធ្វើការលើវិស័យសំណង់ ផ្នែកចំណីអាហារនិងគ្រឿងសមុទ្រនៅដើមឆ្នាំ២០២២ខាងមុខនេះ បន្ទាប់ពីផ្អាកមួយរយៈដោយសារជំងឺកូវីដ១៩។

លោក អន ប៊ុនហាក់ ប្រធានសមាគមទីភ្នាក់ងារហត្ថពលកម្មកម្ពុជាបានឲ្យដឹងនៅព្រឹកថ្ងៃទី១៥ ខែធ្នូនេះថា បច្ចុប្បន្ននេះកម្ពុជានៅមិនទាន់អាចបញ្ជូនពលករMOUទៅធ្វើការនៅប្រទេសថៃនៅឡើយទេដោយសារយើងត្រូវការរៀបចំឯកសារឡើងវិញសារជាថ្មីទៅតាមនីតិវិធីតម្រូវការជាក់ស្តែងរបស់ប្រទេសថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានបន្តថា រដ្ឋាភិបាលថៃបានតម្រូវឱ្យនិយោជកថៃត្រូវទិញប័ណ្ណធានារ៉ាប់រងសម្រាប់ទុកចំណាយទៅលើការព្យាបាលពេលដែលពលករខ្មែរមានឆ្លងជំងឺកូវីដ១៩ ព្រោះថារាល់ការព្យាបាលជាបន្ទុករបស់និយោជកទាំងស្រុង។

លោកបានបន្តទៀតថា ពលករខ្មែរដែលអាចទៅធ្វើការនៅប្រទេសថៃត្រូវមានលក្ខខណ្ឌមួយចំនួនដូចជាត្រូវមានកាតចាក់វ៉ាក់សាំង ធ្វើតេស្តរកជំងឺកូវីដ១៩រយៈពេល៧២ម៉ោងតាមម៉ាស៊ីនPCR ឬតេស្តរហ័សដែលធ្វើដោយគ្រូពេទ្យជំនាញដើម្បីបញ្ជាក់វិញ្ញាបនបត្រថាមិនមានឆ្លងជំងឺកូវីដ១៩។ពេលទៅដល់ព្រំដែនពលករខ្មែរដែលចាក់វ៉ាក់សាំង២ដូសរួចហើយ ត្រូវធ្វើចត្តាឡ័ស័ករយៈពេល៧ថ្ងៃហើយពលករដែលអត់ទាន់បានចាក់វ៉ាក់សាំងទេ ត្រូវធ្វើចត្តាឡីស័ករយៈពេល១៤ថ្ងៃ។

លោក អន ប៊ុនហាក់ បានបន្ថែមទៀតថា តាមផែនការយើងអាចបញ្ជូនពលករMOUទៅធ្វើការនៅប្រទេសថៃប្រមាណពី២ទៅ៣ពាន់នាក់នាពាក់កណ្តាលឬចុងខែមករាឆ្នាំ២០២២ហើយនៅខែកុម្ភៈឬខែមីនាអាចបញ្ជួនកើនឡើងជាង១ម៉ឺននាក់។

លោក បានបញ្ជាក់ថា «ជាធម្មតាការបញ្ជួនពលករខ្មែរទៅថៃមិនមានការប្រែប្រួលអ្វីទេពីមុនក្នុង១ខែបញ្ជូនពី១ម៉ឺនទៅ១ម៉ឺន៥ពាន់នាក់ព្រោះថាជាទូទៅនិយោជកដែលប្រើពលករខ្មែរគឺនៅតែប្រើដដែលមិនមានការផ្លាស់ប្តូរទេឱ្យទៅបញ្ចុះបញ្ចូលគាត់ប្រើពលករឡាវឬភូមាគាត់មិនប្រើទេគឺគាត់ប្រើខ្មែរគឺខ្មែរហើយបើរោងចក្រដែលប្រើពលករភូមាឬឡាវក៏ដូចគ្នាដែរ។វាដូចជាទំលាប់គាត់ដោយសារគាត់មានភាពស្និតស្នាលដឹងចិត្តគ្នាការរស់នៅជាមួយពលករខ្មែរហើយពលករក៏ដឹងចិត្តនិយោជកធ្វើឱ្យដំណើរការការងារមានភាពរលូន»។

គួរបញ្ជាក់ថា ប្រទេសថៃគ្រោងបើកច្រកព្រំដែនឡើងវិញដើម្បីទទួលពលករមកពីប្រទេសជិតខាងនានា គឺកម្ពុជា មីយ៉ានម៉ា និងឡាវក្នុងគោលបំណងបន្ធូរបន្ថយភាពខ្វះខាតកម្លាំងពលកម្មដែលធ្វើឲ្យប៉ះពាល់ដល់ការនាំចេញរបស់ខ្លួន។

បើតាមការប៉ាន់ស្មានបច្ចុប្បន្ននេះប្រទេសថៃត្រូវការពលរបរទេសចំនួន៤២០.០០នាក់ដែលភាគច្រើនក្នុងការងារសំណង់ រោងចក្រនិងឧស្សាហកម្មអាហារសមុទ្រ៕

អត្ថបទ៖ សំអឿន