ច្បាស់​ហើយ​ គ្រោង​សាងសង់ស្ពានអាកាសថ្មីមួយទៀត​ ​នៅច្រមុះជ្រូក​ក្បាលថ្នល់

ភ្នំពេញ៖ រដ្ឋបាលរាជធានីភ្នំពេញគ្រោងសាងសង់ស្ពានអាកាសថ្មីមួយទៀតនៅ ច្រមុះជ្រូកក្បាលថ្នល់ ដើម្បី​សម្រួលចរាចរ​ខណៈដែលតំបន់នេះនៅ តែប្រឈមការកកស្ទះចរាចរ បើទោះបីរដ្ឋបាលរាជធានីភ្នំពេញធ្វើការកែសម្រួលប្រព័ន្ធសារាចរជាច្រើនលើក រហូតសុំគោលការណ៍ទៅ រាជរដ្ឋាភិបាលយកក្រាស់សាំងសូគីមិចចេញពីច្រមុះជ្រូកក្បាលថ្នល់នេះថែមទៀតផង។

ដោយមើលឃើញពីការកកស្ទះចរាចរ នៅ តែជាបញ្ហាដោះស្រាយមិនទាន់បានប្រសើរនៅ​ឡើយនោះ រដ្ឋបាលរាជធានីភ្នំពេញ ក៏បានបង្កើតជាគម្រោងថ្មីមួយទៀត នោះគឺការស្ថាបនាស្ពានអាកាសថ្មីមួយទៀតនៅ ច្រមុះជ្រូកក្បាលថ្នល់នេះតែម្តង។

មន្ត្រីរដ្ឋបាលរាជធានីភ្នំពេញធ្លាប់បានបញ្ជាក់ឲ្យ​ដឹងថា គម្រោងនៃការស្ថាបនា​ស្ពានអាកាសថ្មីមួយទៀតនៅ ច្រមុះជ្រូកក្បាល​ថ្នល់នេះ ប្លង់នៃគម្រោងបានបង្កើតរួចហើយ។ តែអ្វីដែលជាបញ្ហាប្រឈមនោះគឺផលប៉ះពាល់ច្រើនមែនទែន មិនថានៅលើដីឬនៅក្រោមដីនោះទេ ដែលតម្រូវ​ឲ្យ​មានការដោះស្រាយជាមុនសិន ទើបឈានទៅ ដល់ការស្ថាបនាស្ពានអាកាសថ្មីនេះបាន។

លោកសាំ ពិសិដ្ឋ ប្រធានមន្ទីរសាធារណការនិងដឹកជញ្ជូនរាជធានីភ្នំពេញបានបញ្ជាក់​ឲ្យ​កម្ពុជាថ្មី​ដឹង​នៅល្ងាចថ្ងៃទី១៦ ធ្នូនេះថា ក្រុមអ្នកជំនាញបានកំពុងធ្វើតេស្តផលប៉ះពាល់ក្រោមដី សម្រាប់គម្រោងសាងសង់ស្ពានអាកាសថ្មីនេះហើយ។

ដោយមើលឃើញបញ្ហាចរាចរណ៍នៅច្រមុះជ្រូកក្បាលថ្នល់មានការកកស្ទះចរាចរណ៍រាល់ថ្ងៃ លោកឃួង ស្រេង អភិបាលរាជធានីភ្នំពេញ បានសុំគោលការណ៍ទៅ រាជរដ្ឋាភិបាល ដើម្បីសុំ​យកការ៉ាសសាំងសូគីមិចចេញពីច្រមុះជ្រូកក្បាលថ្នល់ ដោយប្តូរទៅ កាន់ទីតាំងផ្សេង ដើម្បីសម្រួលប្រព័ន្ធចរាចរណ៍នៅ តំបន់នេះឱ្យកាន់តែប្រសើរឡើង ជាមួយការពង្រីកផ្លូវព្រះមុន្នីវង្សអោយបានបីគន្លងនិងផ្លូវលេខ២៧១ បីគន្លងថែមទៀតផង។ តែបញ្ហាចរាចរនៅ តំបន់នេះក៏នៅ តែជាបញ្ហាដោះស្រាយ​មិនទាន់បានល្អប្រសើរនូវឡើយ ដែលតម្រូវ​ឲ្យ​មានការសាងសង់ស្ពានអាកាសថ្មីមួយទៀតនៅ តំបន់ច្រមុះជ្រូកក្បាល​ថ្នល់នេះ៕

អត្ថបទ៖ ស្រីរ័ត្ន