អគ្គនាយក​ CMAC៖ សុនខមានសមត្ថភាពហិតរកអ្នកជំងឺកូវីដ-១៩ ដូចឧបករណ៍តេស្ត

អគ្គនាយកស៊ីម៉ាក់ បានអះអាងថា ក្រោយពីបានសាកល្បងទៅលើអ្នកសង្ស័យ និងអ្នកជំងឺកូវីដ-១៩ ដោយផ្ទាល់ ជាលទ្ធផលបង្ហាញថា សុនខមានសមត្ថភាពហិតរកឃើញជំងឺកូវីដ-១៩ ដូចឧបករណ៍តេស្តដែរ។

លោក ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយក មជ្ឈមណ្ឌល​កំចាត់​មីន​កម្ពុជា​ (​CMAC​)​ បានលើកឡើងតាមរយៈបណ្តាញសង្គមរបស់លោកថា កាលពីថ្ងៃទី ២២​ ខែធ្នូ​ ឆ្នាំ២០២១​ ក្រុមស្រាវជ្រាវ និងអភិវឌ្ឍន៍​សុនខហិតអ្នកផ្ទុកវីរុសកូវីដ-១៩ ​របស់អង្គភាពស៊ីម៉ាក់ និងក្រុមគ្រូទេព្យបានសហការធ្វើការផ្ទាល់ជាមួយគ្នានៃការងារស្រាវជ្រាវជាដំណាក់កាលចុងក្រោយ។

លោកអគ្គនាយកស៊ីម៉ាក់បានបន្តថា ជាដំណាក់ការចុងក្រោយនេះ គឺត្រូវធ្វើការបញ្ជាក់ជាក់ស្តែងចំពោះអ្នកសង្ស័យ​ និងអ្នកជំងឺកូវីដ-១៩ តែម្តងនៅមណ្ឌលកោះពេជ្រ និងនៅស្ទឹងមានជ័យ​ រាជធានីភ្នំពេញ​។

លោក ហេង រតនា បានបញ្ជាក់ថា ជាលទ្ធផលបានល្អប្រសើរ​ ដោយប្រៀបធៀបជាមួយឧបករណ៍តេស្តតែ​ម្តង​គឺ រកឃើញដូចគ្នា។ លោកបានលើកឡើងបន្តថា លោកនឹងធ្វើសេចក្តីសន្និដ្ឋានចុងក្រោយមួយនៅចុងឆ្នាំនេះ ទាក់ទិននឹងការស្រាវជ្រាវ និងអភិវឌ្ឍន៍សុនខហិតអ្នកផ្ទុកវីរុសកូវីដ-១៩។

មុនឈានដល់ដំណាក់កាលអនុវត្តដោយផ្ទាល់ជាមួយអ្នកសង្ស័យ និងអ្នកជំងឺកូវីដ-១៩នេះ ក្រុមស្រាវជ្រាវ និងអភិវឌ្ឍន៍សុនខហិតអ្នកផ្ទុកវីរុសកូវីដ-១៩ បានធ្វើការសាកល្បងជាច្រើនលើកច្រើនសារមកហើយ។ ជាក់ស្តែងកាលពីថ្ងៃទី ០២ ខែសីហា ឆ្នាំ២០២១ កន្លងទៅ នៅវិទ្យាស្ថានបច្ចេកទេសសកម្មភាពកំចាត់មីន ស៊ីម៉ាក់ ខេត្តកំពង់ឆ្នាំង មន្ត្រីស៊ីម៉ាក់បានចុះមកពិនិត្យ និងវាយតំលៃការងារសិក្សាស្រាវជ្រាវ និងអភិវឌ្ឍន៍បច្ចេកទេសសុនខហិតរកអ្នកផ្ទុកវីរុសកូវីដ-១៩ ទៅលើសំណាកក្លិន (VOC) អ្នកជំងឺកូវីដ-១៩ ចំនួន ៤៨ សំណាក ពីក្រុមការងារបច្ចេកទេសនៃសាកលវិទ្យាល័យវិទ្យាសាស្ត្រសុខាភិបាល។

ពេលនោះមានសុនខក្រុមទី ១ ចំនួន​ ៣ ក្បាលដែលបានហិតរកឃើញក្លិនសំណាកនៃអ្នកជំងឺកូវីដ-១៩ ប្រកបដោយជោគជ័យក្នុងដំណាក់កាលហ្វឹកហ្វឺនស្រាវជ្រាវបឋមនេះ។ ជាលក្ខណ:បច្ចេកទេស សុនខអាចហិតរកឃើញក្លិនសំណាកក្នុងរយៈពេលប្រមាណតែ ១០-១៥ វិនាទី។ រីឯសុនខក្រុមទី ២ ចំនួន ៧ ក្បាលទៀត កំពុងមានវឌ្ឍនភាពគួរឱ្យកត់សម្គាល់។

ការប្រើប្រាស់សុនខហិតអ្នកផ្ទុកវីរុសកូវីដ-១៩ មានប្រសិទ្ធភាពសម្រាប់ហ្វូងមនុស្សប្រមូលផ្តុំច្រើន ដូចជាព្រលានយន្តហោះ ច្រកទ្វារអន្តរជាតិ និងពហុកីឡាដ្ឋានជាដើម។ ជាមួយនេះ ផ្អែកតាមអ្នកជំនាញបានឱ្យដឹងថា មិនទាន់មានភស្តុតាងផ្លូវការណាមួយបញ្ជាក់ថា មានការឆ្លងវីរុសកូវីដ-១៩ ពីមនុស្សទៅសុនខឡើយ។

គួរបញ្ជាក់ថា សុនខទាំងនេះកើតនៅកម្ពុជា និងបានបង្វឹកដោយគ្រូជំនាញសុនខកម្ពុជា៕

អត្ថបទ៖ សំអឿន