មកដឹងអំពីឈ្មោះពិតផ្សារណាត់ ឬផ្សារធំបាត់ដំបង

ខេត្តបាត់ដំបង÷ ផ្សារណាត់ឬផ្សារធំបាត់ដំបង ស្ថិតនៅចំកណ្តាលក្រុងបាត់ដំបង។ បច្ចុប្បន្នផ្សារនេះមានការ​លក់ដូរផលិតផលចម្រុះ។

ផ្សារណាត់​ត្រូវបានធ្វើការជួសជុលជាបន្តបន្ទាប់ ក្រោយពីរបបប្រល័យពូជសាសន៍ដួលរលំ។ ការជួសជុលចុងក្រោយនៅ​ឆ្នាំ​២០២០ ក្រោយ​ពេល​អគ្គិភ័យកបានឆាបឆេះ ផ្នែកខ្លះ​ធ្វើ​ឲ្យ​តូបអាជីវករ​ ៣២ រង​ការ​​ខូចខាតទាំងស្រុង ដែល​ប៉ាន់ប្រមាណជាទឹកប្រាក់​ជាង ៧០ ម៉ឺន​ដុល្លារ។

ពាក់ព័ន្ធប្រវត្តិ​ផ្សារណាត់ឬផ្សារធំថ្មីនេះ លោកហម អរុណ ប្រធានការិយាល័យគ្រប់គ្រងឧស្សាហកម្មទេសចរណ៍ខេត្តបាត់
ដំបងបានឲ្យ​ដឹង​ថា សម្រាប់ផ្សារណាត់បាត់ដំបង បានផ្តួចផ្តើមសាងសង់ដោយនាយកដ្ឋានកិច្ចការសាធារណៈរបស់អាណានិគមបារាំងក្នុងឆ្នាំ១៩៣០។ កាលដំបូងឡើយប្រើប្រាស់ជាទីផ្សារដោះដូរក្រណាត់ហៅថាផ្សារក្រណាត់ ហើយ​ចាប់ផ្តើមបើក​ឲ្យប្រើប្រាស់ជាផ្លូវការក្នុងឆ្នាំ១៩៣០។

បើយោងតាមការសិក្សាស្រាវជ្រាវរចនាបទនិងស្ទីលរបស់សំណង់ផ្សារណាត់ បង្កើតឡើងដោយស្ថាបត្យករអ៊ីណែសហេប្រាដ (ErnestHebrard) ក្នុងឆ្នាំ១៩២១ នៅពេលលោកចូលកាន់តំណែងជាប្រធាននាយកដ្ឋានស្ថាបត្យកម្មនិងអភិវឌ្ឍទីក្រុងនៅឥណ្ឌូចិន។

លោកហម អរុណ បន្តឲ្យដឹងថា លោក”អ៊ីណែសហេប្រាដ” បានបង្កើតរចនាបថស្ថាបត្យកម្មមួយថ្មីដែលមិនយកតាមលំនាំបែបបុរាណនៅក្នុងតំបន់ដែលលោកហៅថាលំនាំអង្គរ ប៉ុន្តែសម្របទៅតាមអាកាសធាតុនិងបរិយាកាសក្នុងតំបន់។

លក្ខណៈពិសេសនៃសំណង់ស្ថាបត្យកម្មរបស់លោកគឺប្រកបទៅដោយសោភ័ណភាព ដោយដំបូលមានលក្ខណៈងាយស្រួលដល់ដំណើរនិងបម្លាស់ទីនៃខ្យល់ ហើយមានរបាំងសាចនិងជញ្ជាំងមានគម្រប។ ជាពិសេសមានទីធ្លានៅកណ្តាលសម្រាប់ពហុបំណងផ្សេងៗ។ ចំណុចពិសេសមួយទៀតគឺសំណង់ស្ថាតប្បកម្មតាមបែបឥណ្ឌូចិននៃសាលាហាណូយនេះគឺមិនមែនជាលក្ខណៈបែបសិល្បៈដេកូ (ArtDeco) ដែលភាគច្រើនតែងតែមានទម្រង់ជាប៉មទៀតទេ៕

អត្ថបទ៖ សៅ សារិទ្ធ