ព័ត៌មានជាតិ

ស ស យ ក ខេត្តកោះកុងអំពាវនាវដល់ពលរដ្ឋចូលរួមបរិច្ចាគឈាមឱ្យបានគ្រប់ៗគ្នាជួយសង្គ្រោះអាយុជីវិតជនរងគ្រោះ

បានផុស

២ years មុន

នៅ

ថ្ងៃអាទិត្យ ៩ មករា ២០២២

ដោយ

សហភាពសហព័ន្ធយុវជនកម្ពុជាខេត្តកោះកុង(ស.ស.យ.ក)បានធ្វើការអំពាវនាវដល់ពលរដ្ឋចូលរួមបរិច្ចាគឈាមឱ្យបានគ្រប់ៗគ្នាដើម្បីរួមចំណែកប្រើប្រាស់ឈាមឱ្យបានទាន់ពេលវេលាក្នុងការជួយ សង្គ្រោះអាយុជីវិតជនរងគ្រោះ និងជនងាយរងគ្រោះដោយការខ្វះឈាម។

ថ្លែងក្នុងកម្មវិធីបរិច្ចាគឈាមដោយស្ម័គ្រចិត្តចំនួន៥០០នាក់ នៅស្រុកបូទុមសាគរ ខេត្តកោះកុងកាលពីថ្ងៃទី៨ ខែមករា ឆ្នាំ២០២២ លោកស្រី ឈី វ៉ា អនុប្រធានសហភាពសហព័ន្ធយុវជនកម្ពុជា ខេត្តកោះកុង បានមានប្រសាសន៍ថា នៅក្នុងមន្ទីរពេទ្យបង្អែកខេត្តកោះកុងតម្រូវការប្រើប្រាស់ឈាមប្រហែល១៥ទៅ២០ប្លោកក្នុង១ខែ ដែលចំនួនប្រើប្រាស់នេះមិនសមាមាត្រទៅនឹងការបរិច្ចាគរបស់សប្បុរសជននោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រីបានបន្តថា« ហេតុដូចនេះ ដើម្បីឱ្យឆ្លើយតបនឹងការជួយសង្គ្រោះជីវិតអ្នកជំងឺឱ្យបានទាន់ពេលវេលា ជាគោលការណ៍ គឺតម្រូវឱ្យសាច់ញាតិឬមិត្តភក្ដិអ្នកជំងឺ បរិច្ចាគឈាមប្រសិនបើអ្នកជំងឺត្រូវការបញ្ចូលឈាម។ ប៉ុន្តែរាល់ឈាមដែលបានបូមចេញមក មិនសុទ្ធតែមានសុវត្ថិភាពប្រើប្រាស់បានទាំងអស់នោះទេ ជាទូទៅក្នុងចំណោមឈាមដែលបានមក១០ប្លោក មានសុវត្ថិភាពប្រើប្រាស់បានតែ៨ទៅ៩ប្លោកតែប៉ុណ្ណោះ។ ហេតុដូចនេះតម្រូវការឈាមមានការខ្វះខាតនៅឡើយ សម្រាប់ខេត្តកោះកុងយើង»។ លោកស្រីបានសូមធ្វើការអំពាវនាវ និងលើកទឹកចិត្តឱ្យសប្បុរសជនទាំងអស់ចូលរួមបរិច្ចាគឈាមដោយស្ម័គ្រចិត្ត និងដោយមិនមានការបង្ខិតបង្ខំឬភ័យខ្លាចឡើយ។

លោកស្រីបានបញ្ជាក់ថា ការបរិច្ចាគឈាម គឺជាគុណធម៌ដ៏មានតម្លៃមិនអាចកាត់ថ្លៃបាន ជាទឹកចិត្តមនុស្សធម៌ដ៏ធំធេង ក្នុងការជួយសង្គ្រោះជីវិតមនុស្សបើនិយាយតាមធម៌ព្រះពុទ្ធ ការបរិច្ចាគនេះជាសទ្ធាដ៏ថ្លៃថ្លាដែលទទួលបានបុណ្យកុសលយ៉ាងច្រើនលើសលប់ ព្រោះជាអំពើល្អ អំពើកុសលដែលអាចជួយសង្គ្រោះជីវិតមនុស្ស ។

លោកស្រីបានអះអាងថា ឈាម របស់សប្បុរសជនទាំងអស់នឹងក្លាយជាឱសថទិព្វអាចជួយសង្គ្រោះដល់អាយុជីវិតរបស់មនុស្សជាច្រើនដែលកំពុងបាត់បង់ឈាម ដោយសារមូលហេតុផ្សេងៗដូចជា គ្រោះថ្នាក់ចរាចរណ៍អ្នកដែលត្រូវវះកាត់ធ្ងន់ធ្ងរ ម្ដាយដែលកំពុង ឆ្លងទន្លេ និងអ្នកជំងឺផ្សេងៗជាច្រើនទៀត។ លោកស្រីសង្ឃឹមយ៉ាងមុតមាំថា ចាប់ពីពេលនេះតទៅនឹងមិនមានប្រជាជនកម្ពុជាណាម្នាក់ស្លាប់ដោយសារខ្វះឈាមទៀតឡើយ មានឈាម មានជីវិត មានជីវិតរស់នៅជាមួយគ្នា គឺត្រូវផ្តល់ឈាម បរិច្ចាគឈាមគឺសង្គ្រោះជីវិត ។

គួរបញ្ជាក់ថា ផ្អែកតាមការសិក្សាផ្នែកជីវសាស្ត្រ បានបង្ហាញថា ឈាមគឺជាសារធាតុដែលមានសារៈសំខាន់ និងចាំបាច់បំផុតសម្រាប់រាងកាយរបស់មនុស្សម្នាក់ៗ ដែលវាមានតួនាទីយ៉ាងសំខាន់ក្នុងការដឹកនាំអុកស៊ីសែន និងសារធាតុចិញ្ចឹម កាកសំណល់ និងគ្រប់គ្រងសីតុណ្ហភាពក្នុងរាងកាយបានទៀតផង។

វាត្រូវបានផលិតចេញពីខួរឆ្អឹង រួចបញ្ចេញចូលទៅក្នុងចរន្តឈាម ហើយអាចរស់រានមានជីវិតជាមធ្យមត្រឹមតែ១២០ថ្ងៃតែប៉ុណ្ណោះ ហើយវានឹងត្រូវបានបំផ្លាញចោល និងផលិតថ្មី យ៉ាងឆាប់រហ័សមកវិញ។ ហេតុដូចនេះ ការបរិច្ចាគឈាមមិនធ្វើឱ្យប៉ះពាល់ដល់សុខភាពអ្នកបរិច្ចាគឡើយ។ នៅមុនពេលធ្វើការបរិច្ចាគអ្នកស្ម័គ្រចិត្ត គឺសុទ្ធតែទទួលបានការត្រួតពិនិត្យសុខភាពត្រឹមត្រូវ។

ក្នុងករណីដែលគ្រូពេទ្យពិនិត្យឃើញថា សុខភាពមិនបរិបូរទេនោះ គ្រូពេទ្យនឹងមិនអនុញ្ញាតឱ្យធ្វើការបរិច្ចាគនោះឡើយ៕

អត្ថបទ៖ សំអឿន

Related Topics:ការផ្ដល់ឈាម