ព័ត៌មានជាតិ
តើជនជាតិដើម និង ពូនង រស់បែកគ្នាពីជនជាតិខ្មែរនៅពេលណា?
បច្ចុប្បន្ន កម្ពុជាមានជនជាតិដើមភាគតិចចំនួន ២៤ ក្រុមនៅទូទាំងខេត្តចំនួន ១៥ ក្នុងនោះ ខេត្តរតនគិរី មណ្ឌលគិរី និងខេត្តក្រចេះ មានប្រជាជនជាជនជាតិដើមភាគតិចខ្ពស់ជាងគេ។ ក្រុមជនជាតិដើមភាគតិចទាំងនេះត្រូវបានកំណត់អត្តសញ្ញាណតាមរយៈភាសារបស់ពួកគេ។ ក្រុមជនជាតិដើមនៅកម្ពុជា មានដូចជា ពូនង ព្រៅ ជង ចារាយ កាចក់ កាវ៉ែត ខិ ខោញ កួយ គ្រឹង ក្រោល ល្អិន លុន មិល ព័រ រដែ សំរែ សួយ ស្ពុង ស្ទៀង ថ្នូន និងទំពួន។
តើជនជាតិដើម និងជនជាតិ ពូនង រស់បែកគ្នាពីជនជាតិខ្មែរនៅពេលណា?
លោក អ៊ឹម សុខរិទ្ធី ប្រធាននាយកដ្ឋាន អភិរក្ស និងបុរាណវិទ្យា បានមានប្រសាសន៍ប្រាប់ “កម្ពុជាថ្មី” ថា កាលជាង ២ ពាន់ឆ្នាំមុន ពោលគឺនៅ ពីរ បីរយឆ្នាំមុនគ្រិស្តសករាជ នៅលើផែនដីខ្មែរ មានជនជាតិភាគតិចរស់នៅច្រើន ប្រហែល ៣០ ទៅ ៥០ក្រុមផ្សេងៗគ្នា។ ក្នុងជនជាតិភាគតិចទាំងអស់នោះ មានអម្បូរខ្លះនិយាយភាសាដូចខ្មែរ ដែលគេហៅថា អម្បូរ អូស្ត្រូអាស្ត្រាទិក ឬក៏ក្រោយមកគេហៅថា អម្បូរ មន-ខ្មែរ។
លោក អ៊ឹម សុខរិទ្ធី មានប្រសាសន៍បន្តថា ក្រោយមក ពេលអ្នកជំនួញ អ្នកផ្សព្វផ្សាយសាសនា និងពេលប្រពៃណីព្រាហ្មណ៍របស់ឥណ្ឌាហូរចូលមកខ្មែរ ជនជាតិភាគតិចមាន ពូនង ជាដើមនោះ មិនទទួល អត់ប្រាស្រ័យ អត់និយាយជាមួយជនជាតិថ្មី គឺជនជាតិឥណ្ឌានោះទេ គឺមានតែខ្មែរតែមួយគត់ដែលព្រមទទួលអរិយធម៌ថ្មី ហើយវិវឌ្ឍក្លាយជាខ្លួនឯង។
អតីតអនុប្រធានមជ្ឈមណ្ឌលអន្តរជាតិស្រាវជ្រាវ និងតម្កល់ឯកសារអង្គរ រូបនេះ បានបន្តថា៖ “ពេលហ្នឹងហើយ ទើបគេអាចបែងចែកដាច់ថា ជនជាតិជាខ្មែរ និងជនជាតិដទៃ ព្រោះជនជាតិទាំងនោះឈប់រស់នៅផ្ដុំក្បែរគ្នា ដោយពួកគេរត់ទៅនៅឆ្ងាយៗឱ្យផុតពីឥទ្ធិពលរបស់ឥណ្ឌា”។
លោក អ៊ឹម សុខរិទ្ធី មានប្រសាសន៍បន្ថែមថា ពេលនោះដែរ ខ្មែរមានឥទ្ធិពលបង្កើតជារដ្ឋ រហូតក្លាយជាចក្រភពមួយដែលពឹងផ្អែកលើជំនួញសមុទ្រ ពាក់ព័ន្ធជាមួយឥណ្ឌា និងចិនជាដើម។ ចិនហៅខ្មែរថា ហ្វូណន ដែលមានន័យថា នគរចម្រុងចម្រើនរុងរឿងនៅខាងត្បូង ព្រោះចិន គិតថា ប្រទេសខ្លួនឯងស្ថិតនៅកណ្ដាលផែនដី។
ប្រធាននាយកដ្ឋាន អភិរក្ស និងបុរាណវិទ្យា ដដែលនេះ បញ្ជាក់បន្តថា ជនជាតិទាំងអស់រស់នៅជាមួយគ្នា នៅផ្ដុំគ្នា អត់ទាន់ផ្ដាច់ពីគ្នា ដែលមុនទទួលឥទ្ធិពលឥណ្ឌា មិនមានមធ្យោបាយណាបែងចែកថា អ្នកណាជាជនជាតិខ្មែរ អ្នកណាជាជនជាតិអ្វីទេ។
លោក អ៊ឹម សុខរិទ្ធី ពន្យល់ថា៖ “ឧទាហរណ៍ពេលយើងធ្វើកំណាយស្រាវជ្រាវ ប៉ះផ្នូរ ឬឆ្អឹងខ្មោចសម័យបុរេប្រវត្តិ យើងមិនអាចកំណត់ថាជាឆ្អឹងរបស់ជនជាតិខ្មែរ ជាចាម ជ្វា លាវបានទេ គឺអាចនិយាយបានថា ជាឆ្អឹងរបស់មនុស្សដើមនៅនគរខ្មែរ។ ខុសពីប្រទេសខាងលិច ខាងកើត ពេលគេជីកឃើញឆ្អឹងខ្មោចបុរាណ នៅលើទឹកដីគេបច្ចុប្បន្ន គេថា ហ្នឹងជាឆ្អឹងជនជាតិថៃ ហ្នឹងជាឆ្អឹងជនជាតិវៀតណាម។ ដើម្បីឱ្យស្គាល់ថា តើឆ្អឹងនោះជាជនជាតិអ្វី ទាល់តែស្រាវជ្រាវតាម DNA”។
គួរបញ្ជាក់ថា ជនជាតិពូនង ត្រូវបានប៉ាន់ប្រមាណប្រហែលមានចំនួនជាង ១ លាននាក់ រស់នៅនៅក្នុងដែនដីដូនតារបស់គេបច្ចុប្បន្ន មាននៅក្នុងកម្ពុជា ឡាវ និងវៀតណាម។ ជនជាតិដើមពូនង គឺជាឈ្មោះមួយហៅទូទៅ សំដៅទៅក្រុមជនជាតិដើមនេះ ដែលមានអនុអម្បរតូចៗដោយការសម្គាល់តាមគ្រាមភាសារបស់ពួកគេ ពីតំបន់មួយទៅតំបន់មួយ និងពីអនុអម្បូរមួយទៅអនុអម្បូរមួយទៀត។ ឧទាហរណ៍ អនុអំបូរ ពូនងពូនរ (Bunong Bunor) ពូនងនង (Bunong Nong) ពូនងកាហោ (Bunong Kaho) ពូនងរាអូង (Bunong Ra Ong) ពូនងក្រោល (Bunong Krol) ជាដើម។
អត្ថបទ៖ ច័ន្ទ វីរៈ
-
កីឡា៦ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៥ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ១៨ ម៉ោង ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
សន្តិសុខសង្គម១ សប្តាហ៍ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ព័ត៌មានជាតិ៦ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៥ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ៦ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានអន្ដរជាតិ១ សប្តាហ៍ ago
នាវាចម្បាំងថៃ ច្រឡំដៃបាញ់កាំភ្លើងធំ ចំនាវាគ្នាឯង