កម្ពុជា-ហ្វីលីពីន ពង្រីកកិច្ចសហប្រតិបត្តិការលើវិស័យសន្ដិសុខ​

សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃបានមានប្រសាសន៍ថា កម្ពុជា-ហ្វីលីពីន នឹងបន្ដពង្រីកកិច្ចសហប្រតិបត្តិការឱ្យកាន់តែទូលំទូលាយថែមទៀត ជាពិសេសទៅលើការងារប្រយុទ្ធប្រឆាំងឧក្រិដ្ឋកម្មឆ្លងដែន ព្រមទាំងចែករំលែកបទពិសោធន៍គ្នាទៅវិញទៅមក ពាក់ព័ន្ធទៅនឹងការងារកំណែទម្រង់រដ្ឋបាលថ្នាក់ក្រោមជាតិ។

សម្ដេចក្រឡាហោម បានមានប្រសាសន៍បែបនេះ នៅក្នុងជំនួបសម្តែងការគួរសម និងពិភាក្សាការងារជាមួយលោកស្រី Maria Amelia C.Aquino ឯកអគ្គរដ្ឋទូតទើបតែងតាំងថ្មី នៃសាធារណរដ្ឋហ្វីលីពីន ប្រចាំព្រះរាជាណាចក្រកម្ពុជា នៅរសៀលថ្ងៃទី ១២ ខែមករា ឆ្នាំ ២០២២។

សម្ដេចក្រឡាហោម បានមានប្រសាសន៍សង្ឃឹមយ៉ាងមុតមាំថា ក្នុងអាណត្តិការទូតរបស់លោកស្រី ចំពោះកិច្ចសហប្រតិបត្តិការ និងទំនាក់ទំនងរវាង កម្ពុជា-ហ្វីលីពីន កាន់តែបន្ដរីកចម្រើនបន្ថែមទៀត រួមទាំងកិច្ចសហប្រតិបត្តិការ នៅក្នុងក្របខណ្ឌគ្រួសារអាស៊ានផងដែរ។

សម្ដេចក្រឡាហោម បានសង្ឃឹមថា ហ្វីលីពីននឹងបន្ដចូលរួមគាំទ្រដល់កម្ពុជាទទួលតួនាទីជាប្រធានអាស៊ាននៅឆ្នាំ ២០២២ ដើម្បីបម្រើដល់ផលប្រយោជន៍រួមរបស់អាស៊ានទាំងមូល ក៏ដូចជារួមចំណែកដល់ការពង្រឹង និងទំនាក់ទំនងកិច្ចសហប្រតិបត្តិការរវាង កម្ពុជា-ហ្វីលីពីន ឱ្យកាន់តែខ្លាំងក្លាថែមទៀត។ 

កិច្ចសហប្រតិបត្តិការនៅក្នុងវិស័យស្ថិតក្រោមសមត្ថកិច្ចក្រសួងមហាផ្ទៃ រួមមាន៖ វិស័យសន្ដិសុខ និងកំណែទម្រង់រដ្ឋបាលថ្នាក់ក្រោមជាតិ សម្ដេចក្រឡាហោម ស ខេង បានមានប្រសាសន៍ជឿជាក់ថា កម្ពុជា-ហ្វីលីពីន នឹងបន្ដពង្រីកកិច្ចសហប្រតិបត្តិការឱ្យកាន់តែទូលំទូលាយថែមទៀត ជាពិសេសទៅលើការងារប្រយុទ្ធប្រឆាំងឧក្រិដ្ឋកម្មឆ្លងដែន ព្រមទាំងចែករំលែងបទពិសោធន៍គ្នាទៅវិញទៅមក ដែលពាក់ព័ន្ធទៅនឹងការងារកំណែទម្រង់រដ្ឋបាលថ្នាក់ក្រោមជាតិ។

នាឱកាសនោះ សម្ដេចក្រឡាហោម បានជម្រាបជូន លោកស្រី អំពីបច្ចុប្បន្នភាពមួយចំនួន ពាក់ព័ន្ធទៅនឹងដំណើរការកំណែទម្រង់រដ្ឋបាលថ្នាក់ក្រោមជាតិ ដែលមកដល់ពេលនេះ រាជរដ្ឋាភិបាលកម្ពុជា បាន និងកំពុងអនុវត្តផែនការជាតិរយៈពេល ១០ ឆ្នាំ ក្នុងដំណាក់កាលទី២ ដែលជាដំណាក់កាលមួយមានសារៈសំខាន់ ត្រូវផ្ទេរនូវធនធាន និងសិទ្ធិអំណាច ទៅឱ្យរដ្ឋបាលថ្នាក់ក្រោមជាតិ។

ជាការឆ្លើយតប លោកស្រី Maria Amelia C.Aquino បានជម្រាបជូនសម្ដេចក្រឡាហោម ថា ហ្វីលីពីន នៅតែបន្ដគាំទ្រ និងលើកកម្ពស់កិច្ចសហប្រតិបត្តិការជាមួយកម្ពុជា ជាពិសេសក្នុងឱកាសដែលកម្ពុជាទទួលតួនាទីជាប្រធានអាស៊ាន ហើយក៏បន្ដចូលរួមគាំទ្រនូវវេទិកាដែលក្រសួងមហាផ្ទៃ ត្រូវធ្វើជាប្រធានដឹកនាំ នៅក្រោមក្របខណ្ឌនៃអាស៊ាននេះផងដែរ។

ក្រៅពីកិច្ចសហប្រតិបត្តិការពហុភាគីនៅក្នុងក្របខណ្ឌអាស៊ាន លោកស្រី ឯកអគ្គរដ្ឋទូត បានសម្ដែងនូវចំណាប់អារម្មណ៍យ៉ាងខ្លាំង ក្នុងការពង្រីកកិច្ចសហប្រតិបត្តិការទ្វេភាគីឱ្យកាន់តែច្រើនឡើងថែមទៀត ជាពិសេស លើវិស័យសន្ដិសុខ រួមមាន៖ កិច្ចសហប្រតិបត្តិការលើការងារប្រយុទ្ធប្រឆាំងឧក្រិដ្ឋកម្មឆ្លងដែន បញ្ហាគ្រឿងញៀន បញ្ហាប្រយុទ្ធប្រឆាំងបទល្មើសបច្ចេកវិទ្យា ការជួញដូរមនុស្ស ជាដើម។ លោកស្រីបន្ដថា កិច្ចការទាំងនេះ មួយផ្នែកធំក៏ស្ថិតក្រោមសមត្ថកិច្ចទទួលខុសត្រូវរបស់ក្រសួងមហាផ្ទៃកម្ពុជាផងដែរ។

ទន្ទឹមនឹងនេះ លោកស្រីឯកអគ្គរដ្ឋទូត ក៏សម្ដែងនូវបំណងពង្រីកទំនាក់ទំនងរវាង រដ្ឋបាលថ្នាក់ក្រោមជាតិរបស់ហ្វីលីពីន និងកម្ពុជា តាមរយៈការបង្កើតឱ្យមានការផ្លាស់ប្ដូរទស្សនកិច្ច និងការចង់សម្ព័ន្ធមេត្រីភាពរវាងប្រទេសទាំងពីរឱ្យកាន់តែជិតស្និត។

លោកស្រី ក៏បានថ្លែងអំណរគុណដល់សម្ដេចក្រឡាហោម និងក្រសួងមហាផ្ទៃ ដែលកន្លងមក ជាពិសេស ក្នុងកាលៈទេសៈនៃវិបត្តិជំងឺកូវីដ-១៩ បានជួយសម្រួលពាក់ព័ន្ធទៅនឹងការងារអន្ដោប្រវេសន៍ ចំពោះពលរដ្ឋហ្វីលីពីនមួយចំនួនជួបការលំបាក នៅក្នុងកាលៈទេសៈនៃជំងឺកូវីដ-១៩៕

អត្ថបទ៖ សំអឿន