ព័ត៌មានជាតិ
ឆេកផ្តល់សម្ភារៈពិសោធន៍បណ្តុះបណ្តាលជំនាញបច្ចេកទេសវេជ្ជជីវសាស្ត្រដល់និស្សិតកម្ពុជា
រដ្ឋាភិបាលសាធារណរដ្ឋឆេក បានផ្តល់សម្ភារពិសោធន៍ដែលមានតម្លៃ៤០ម៉ឺនអឺរ៉ូសម្រាប់បណ្តុះបណ្តាលជំនាញបច្ចេកទេសវេជ្ជជីវសាស្ត្រដល់និស្សិតកម្ពុជា។
ពិធីប្រគល់សម្ភារៈពិសោធន៍ទាំងនេះត្រូវបានប្រារព្ធធ្វើនៅរសៀលថ្ងៃទី១៧ ខែមករា ឆ្នាំ២០២២នៅវិទ្យាស្ថានបច្ចេកវិទ្យាកម្ពុជា ដោយមានការចូលរួមពីលោក Martin VÁVRA ឯកអគ្គរដ្ឋទូតនៃសាធារណរដ្ឋឆេក លោកបណ្ឌិត អ៊ុម រម្យណី អគ្គនាយកនៃវិទ្យាស្ថានបច្ចេកវិទ្យាកម្ពុជា និងលោកសាស្ត្រាចារ្យវេជ្ជបណ្ឌិត សាផុន វឌ្ឍនៈ ទីប្រឹក្សាក្រសួងសុខាភិបាល និងជាសាកលវិទ្យាធិការនៃសាកលវិទ្យាល័យវិទ្យាសាស្ត្រសុខាភិបាល។
យោងតាមសេចក្តីប្រកាសព័ត៍មានបានឱ្យដឹងថា ការប្រគល់សម្ភារៈពិសោធន៍នេះ ស្ថិតក្រោមគម្រោង “បង្កើតកម្មវិធីបណ្តុះបណ្តាលប្រកបដោយគុណភាពលើជំនាញបច្ចេកទេសវេជ្ជជីវសាស្ត្រនៅកម្ពុជា” ដែលគម្រោងនេះមានរយៈពេល ០៤ ឆ្នាំ និងមានថវិកាសរុប៤០០៨៨៩.០០អឺរ៉ូ (សែសិបម៉ឺន ប្រាំបីរយប៉ែតសិបប្រាំបួន អឺរ៉ូ) ក្រោមកម្មវិធីអភិវឌ្ឍ និងសហប្រតិបត្តិការនៃសារធារណៈរដ្ឋឆេក។
ជំនួយជាសម្ភារៈ និងអ្នកបច្ចេកទេសនេះ គឺកើតចេញពីជំនួប និងកិច្ចសហការជាបន្តបន្ទាប់រវាងប្រតិភូស្ថានទូតឆេក វិទ្យាស្ថានបច្ចេកវិទ្យាកម្ពុជា និងសាកលវិទ្យាល័យវិទ្យាសាស្ត្រសុខាភិបាលពិភាក្សារួមគ្នាក្នុងគម្រោងបង្កើតជំនាញបណ្តុះបណ្តាលវិស្វកម្មជីវៈវេជ្ជសាស្ត្រនៅប្រទេសកម្ពុជាតាំងពីឆ្នាំ២០១៨ មក។
សម្ភារៈពិសោធន៍ដែលត្រូវបានប្រគល់ជូននៅក្នុងមន្ទីរពិសោធន៍បច្ចេកទេសវេជ្ជជីវសាស្ត្រនៅវិទ្យាស្ថានបច្ចេកវិទ្យាកម្ពុជា នៅពេលនេះរួមមាន៖
– កុំប្រស័រខ្យល់ ចំនួន១គ្រឿង ដែលមានអានុភាព ៧.៥ សេះ និងសមត្ថភាពបូមខ្យល់បាន ៥៨០ លីត្រក្នុង១នាទី។
– ម៉ាស៊ីនព្រីន (3D printer) ចំនួន ១គ្រឿង សម្រាប់ប្រើក្នុងការផលិតបរិក្ខារពិសោធន៍ដែលខូច។
– សម្ភារៈពិសោធន៍សន្ទនីយ៍ ១កេះធំ ដែលមានផ្ទុកឧបករណ៏ពិសោធន៍ ៨មុខ។
– សម្ភារៈពិសោធន៍ប្រព័ន្ធព្នើម៉ាទិក និង អ៊ីដ្រូលីក១កេះធំដែលមានផ្ទុកឧបករណ៏ពិសោធន៍ និងបរិក្ខារពិសោធន៍៤២មុខ។
គួរបញ្ជាក់ថា កម្មវិធីបណ្តុះបណ្តាលជំនាញបច្ចេកទេសវេជ្ជជីវសាស្ត្រនេះត្រូវបានអនុវត្តរួមគ្នានៅគ្រឹះស្ថានឧត្តមសិក្សាទាំងពីរនៃព្រះរាជាណាចក្រកម្ពុជា ដែលតម្រូវឲ្យនិស្សិតរៀនរយៈពេល៣ឆ្នាំ ដោយបែងចែកការសិក្សានៅវិទ្យាស្ថានបច្ចេកវិទ្យាកម្ពុជា និងនៅសាកលវិទ្យាល័យវិទ្យាសាស្ត្រសុខាភិបាល។
នៅក្នុងជំនាន់ទី១ នៃកម្មវិធីបណ្តុះបណ្តាលនេះ មាននិស្សិតកំពុងសិក្សាចំនួន០៨នាក់ (និស្សិតនារី៥នាក់)ក្នុងនោះនិស្សិតដែលទទួលបានអាហារូបករណ៏ចំនួន២នាក់។
កម្មវិធីបណ្តុះបណ្តាលជំនាញបច្ចេកទេសវេជ្ជជីវសាស្ត្រដែលអនុវត្តរួមគ្នាដោយគ្រឹះស្ថានឧត្តមសិក្សាទាំងពីរ ត្រូវបានរំពឹងថានឹងអាចផ្តល់ជូននិស្សិតនូវគុណភាពខ្ពស់នៃការបណ្តុះបណ្តាលមួយដែលធានាបានធនធានជំនាញបច្ចេកទេសវេជ្ជជីវសាស្ត្រដើម្បីបម្រើដល់តម្រូវការអ្នកជំនាញខាងការងារតំហែរទាំ ឧបករណ៍ និងបរិក្ខាវេជ្ជសាស្ត្រទាំងឡាយដែលកំពុងមានតម្រូវការខ្ពស់នៅតាមមន្ទីរពេទ្យរដ្ឋ និងឯកជន មជ្ឈមណ្ឌលដែលផ្តល់សេវាសុខាភិបាល និងថែទាំវេជ្ជសាស្ត្រ មន្ទីរពិសោធន៍ និងក្រុមហ៊ុនបរិក្ខារវេជ្ជសាស្ត្រនានាក្នុងព្រះរាជាណាចក្រកម្ពុជា៕
អត្ថបទ៖ សំអឿន
-
ព័ត៌មានជាតិ៦ ថ្ងៃ ago
អ្នកឧកញ៉ា គួច ម៉េងលី÷ បើមិននាំខ្លួនមេខ្លោងក្រុមហ៊ុន CIC Plc មកផ្ដន្ទាទោសទេ ពលរដ្ឋនឹងលែងជឿប្រព័ន្ធយុត្តិធម៌កម្ពុជា
-
ព័ត៌មានជាតិ៤ ថ្ងៃ ago
ទ្រព្យសកម្មរបស់ក្រុមហ៊ុន CIC Plc ប្រមាណ ៩០% នៃចំនួនទឹកប្រាក់សរុប ត្រូវបានប្រមូលមកវិញ
-
ព័ត៌មានជាតិ៤ ថ្ងៃ ago
បណ្ឌិត គិន ភា៖ «ហេតុអីមិនបន្ទោសអ្នកបោកគេ បែរជាបន្ទោសអ្នកត្រូវគេបោកទៅវិញ?»
-
ចរាចរណ៍១០ ម៉ោង ago
បឋម៖ រថភ្លើងបុករថយន្ដក្រុងដឹកអ្នកដំណើររបួសច្រើននាក់
-
ព័ត៌មានជាតិ៥ ថ្ងៃ ago
កម្ពុជានឹងមានភ្លៀងធ្លាក់ ១៥% ដល់ថ្ងៃទី ២៧ ដំណាច់ខែមីនា
-
ព័ត៌មានជាតិ៥ ថ្ងៃ ago
ដីជាង ៤៣ ហិកតា នៅភូមិសាស្ត្រភ្នំ ១៥០០ ត្រៀមដាំស្ដារព្រៃឈើឡើងវិញ
-
សេដ្ឋកិច្ច៥ ថ្ងៃ ago
មន្ត្រីជាន់ខ្ពស់ធនាគារជាតិ៖ ក្រដាសប្រាក់ ៥ម៉ឺន រៀល មានគូសឆ្នូតកណ្តាលអាចប្តូរយកប្រាក់ថ្មីបានដោយឥតគិតថ្លៃ
-
ព័ត៌មានអន្ដរជាតិ៣ ថ្ងៃ ago
លម្អិតហេតុការណ៍រន្ធត់ កប៉ាល់ដឹកកុងតឺន័រ បុកបាក់ស្ពាននៅទីក្រុង Baltimore