ព័ត៌មានជាតិ
តម្រូវការជ្រូកខ្វៃសែនចូលឆ្នាំចិននឹងកើនឡើងខ្លាំងបើស្ថានភាពជំងឺកូវីដនៅស្ងប់
អ្នកខ្វៃជ្រូកលក់ នៅរាជធានីភ្នំពេញ បានអះអាងថា ឆ្នាំនេះ អាចនឹងមានតម្រូវការជ្រូកខ្វៃខ្ពស់ បើស្ថានភាពកូវីដ-១៩ ពុំមានការឆ្លងរីករាលដាលខ្លាំង ដូចឆ្នាំកន្លងទៅ។
អ្នកស្រី ធូ សុភាព ម្ចាស់ហាងជ្រូកខ្វៃចិនខ្មៅ បានប្រាប់កម្ពុជាថ្មីថា គិតត្រឹមថ្ងៃទី ២១ ខែមករានេះ មានការកម្មង់ជ្រូកខ្វៃសម្រាប់សែនចូលឆ្នាំចិន បានប្រមាណ ៦០ក្បាលហើយ។ អ្នកស្រី រំពឹងថា ថ្ងៃសែនចូលឆ្នាំចិន ឆ្នាំនេះ នឹងមានអ្នកកម្មង់ជ្រូកយកទៅសែនចំនួន ៥០០ ទៅ ៦០០ក្បាល នៅថ្ងៃទី ៣០-៣១ ខែមករា ខាងមុខនេះ។ អ្នកស្រីបន្តថា ជ្រូកខ្វៃដែលពេញនិយម សម្រាប់សែនចូលឆ្នាំចិន មានទម្ងន់ក្រោម ១៣គីឡូក្រាម ក្នុងនោះ ទំហំពី ៤-៥គីឡូ មានការកម្មង់ទិញច្រើនជាងគេ។
ចំពោះតម្លៃអ្នកស្រី សុភាព បានឲ្យដឹងថា ជ្រូកខ្វៃទម្ងន់ ១គីឡូ តម្លៃ ៦៥,០០០រៀល។ ប៉ុន្តែចាប់ពីទម្ងន់៨-១៣ គីឡូក្រាម ម៉ៅក្នុងតម្លៃ ៦២ម៉ឺន ទៅ ៦៣ម៉ឺនរៀល ក្នុង១ក្បាល។ សព្វថ្ងៃអ្នកស្រីលក់ជ្រូកខ្វៃក្នុងថ្ងៃពី ១៥ក្បាល ទៅ ២០ក្បាល នៅផ្សារអូឬស្សី។
អ្នកស្រី ធូ សុភាព បានរំឮកថា កាលពីឆ្នាំ ២០២១ ដោយសារការរីករាលដាលជំងឺកូវីដ-១៩ ទីផ្សារជ្រូកខ្វៃធ្លាក់ចុះខ្លាំង ពោលគឺរដូវកាលចូលឆ្នាំចិន លក់ចេញបានតែ ១០០ក្បាល ទៅ ២០០ក្បាលប៉ុណ្ណោះ។
ចំណែកលោក លឹម ប៊ុនលី អ្នកលក់ជ្រូកខ្វៃនៅផ្សារព្រែព្នៅ កត់សម្គាល់ឃើញថា រដូវកាលចូលឆ្នាំចិន ឆ្នាំនេះ ទំនងជាទីផ្សារជ្រូកខ្វៃមានការធ្លាក់ចុះបន្តិច។ លោកបញ្ជាក់ថា បាំងតែជិត ១០ថ្ងៃទៀតប៉ុណ្ណោះ នឹងដល់ពិធីបុណ្យចូលឆ្នាំចិន ប៉ុន្តែការកម្មង់ជ្រូកខ្វៃនៅមានចំនួនតិចនៅឡើយ ពោលគឺទើបតែបាន ២០ក្បាលប៉ុណ្ណោះ។
លោក ប៊ុនលី គូសបញ្ជាក់ កាលពីឆ្នាំមុន មានអ្នកកម្មង់ប្រមាណពី ៦០ក្បាល ទៅ ៨០ក្បាល តែឆ្នាំនេះ លោកប៉ាន់ស្មានថា ប្រហែលបានត្រឹមតែ ៣០ទៅ ៤០ក្បាលប៉ុណ្ណោះ រហូតដល់ថ្ងៃសែនចូលឆ្នាំចិន។
ថៅកែជ្រូកខ្វៃរូបនេះ សង្កត់ធ្ងន់ថា នៅក្នុងបរិបទវិបត្តិកូវីដនេះ ពលរដ្ឋខ្វះខាតប្រាក់ ដូច្នេះការចាយវាយត្រូវបានកាត់បន្ថយ រួមផ្សំនិងការបិទច្រកតាមព្រំដែនផងដែរ។ លោកថា ទីផ្សារនៅតំបន់ព្រែកព្នៅជ្រូកខ្វៃចន្លោះពី ៨-១២គីឡូក្រាម តម្លៃ ៨៥ម៉ឺនរៀល។ ក្រៅពីជ្រូកខ្វៃ លោក ប៊ុនលី ក៏មានលក់ដូចជា ទាខ្វៃ និងសាច់ជ្រូកបីជាន់ខ្វៃផងដែរ។
សូមបញ្ជាក់ថា ពិធីបុណ្យចូលឆ្នាំចិន នឹងចូលមកដល់នៅថ្ងៃទី៣១ ខែ មករា ឆ្នាំ២០២២ខាងមុខ។ នៅក្នុងពិធីនេះ ប្រជាពលរដ្ឋខ្មែរកាត់សែស្រឡាយចិន តែងតែរៀបចំគ្រឿងរណ្តាប់សែនព្រេនជូនម្ចាស់ទឹកម្ចាស់ដី ជីដូនជីតាកុងម៉ា ក្នុងនោះ មានការរៀបចំសែនបាយសម្ល មីឆា មាន់ ទា នំពងទា ផ្លែឈើ ក្រដាសមាសប្រាក់ដុតសែន និងម្ហូបច្រើនមុខទៀតទៅតាមគ្រួសារនីមួយៗ ហើយអ្វីដែលគេមិនសូវរំលងបាននោះគឺ «ជ្រូកខ្វៃ»៕ អត្ថបទ៖ ទួន សុផល
-
ព័ត៌មានជាតិ១ សប្តាហ៍ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ៣ ថ្ងៃ ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
ព័ត៌មានជាតិ១ សប្តាហ៍ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ១ សប្តាហ៍ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
កីឡា៣ ថ្ងៃ ago
ជើងឯកម៉ុងហ្គោលី Erdene អរគុណបុរសធ្លាប់ដឹកដៃ ឈឿង ល្វៃ ធ្វើឲ្យក្តីស្រមៃក្លាយជាការពិត
-
ជីវិតកម្សាន្ដ២ ថ្ងៃ ago
ខេមរៈ សិរីមន្ត ៖ «ទោះខ្ញុំមិនមែនជាអ្នកធំ តែសុំធ្វើកិច្ចការធំខ្លះជូនជាតិតាមវិជ្ជាជីវៈសិល្បៈ បង្ហាញទៅពិភពលោក»
-
ព័ត៌មានជាតិ៦ ថ្ងៃ ago
សម្តេច ហ៊ុន សែន ៖ ហេតុអ្វីបានជាមកដល់ពេលនេះហើយមានមន្ត្រីយើងប្រព្រឹត្តបែបនេះ ដោយពាក់ស្បែកជើងចូលក្នុងព្រះវិហារ?
-
សន្តិសុខសង្គម៥ ថ្ងៃ ago
បឋម៖ អគ្គិភ័យកំពុងឆេះរោងចក្រជិតផ្សារបែកចាន (មានវីដេអូ)