ក្រសួងកសិកម្ម អះអាងថា ខេត្តចំនួន៣នៅកម្ពុជា ដាំដុះស្រូវរដូវវស្សាយឺតយ៉ាវជាងគេ

ក្រសួងកសិកម្មរុក្ខាប្រមាញ់និងនេសាទ បានអះអាងថា មានខេត្តចំនួន៣នៅប្រទេសកម្ពុជា បានដាំដុះស្រូវវស្សានៅឆ្នាំនេះមានការយឺតយ៉ាវជាងគេ ដោយសារនៅដើមរដូវវស្សាឆ្នាំនេះ ទឹកភ្លៀងបានចាប់ផ្ដើមធ្លាក់លឿន និងមានបរិមាណច្រើនជាងបណ្តាឆ្នាំមុនៗ។

យោងតាមសេចក្ដីណែនាំស្តីពីការជំរុញផលិតកម្មដំណាំស្រូវរដូវវស្សាឆ្នាំ២០២២របស់ក្រសួងកសិកម្ម ចុះថ្ងៃទី០៩ ខែមិថុនា បានឱ្យដឹងថា ខេត្តចំនួន៣ ដែលអនុវត្តការដាំដុះស្រូវសដូវវស្សាយឺតជាងគេរួមមានខេត្តកំពង់ធំ អនុវត្តបានចំនួន៥៩ ៣៤៥ហិកតា ស្មើនឹង២៧,៨២% នៃផែនការចំនួន១៨៩៧៣០ហិកតា យឺតជាងឆ្នាំមុនចំនួន៩៨ ១២៧ហិកតា។ ខេត្តតាកែវអនុវត្តបានចំនួន៧៨,៦៩២ហិកតា ស្មើនឹង៤៣,៧២% នៃផែនការចំនួន១៨០,០០០ហិកតា យឺតជាងឆ្នាំមុនចំនួន៨៦៦៩២ហិកតា និងខេត្តសៀមរាប អនុវត្តបានចំនួន២១៤៧០ហិកតា ស្មើនឹង១១,៣២% នៃការចំនួន២១៣ ៣០០ហិកតា យឺតជាងឆ្នាំមុនចំនួន៨២៩០១ហិកតា។

ក្រសួងកសិកម្មបានបន្តថា ល្បឿនការងារបង្កបង្កើនផលដំណាំស្រូវរដូវវស្សានៅឆ្នាំនេះមានការថយចុះរហូតដល់៦៥ម៉ឺនហិកតាដែលអាចធ្វើឱ្យប៉ះពាល់ដល់ផែនការផលិតកម្មប្រចាំឆ្នាំ ហើយអាចនឹងឈានដល់ការប៉ះពាល់សន្តិសុខស្បៀង
និងគោលនយោបាយរបស់រាជរដ្ឋាភិបាលក្នុងការជំរុញផលិតកម្មដំណាំស្រូវ និងការនាំចេញអង្ករផងដែរ។

ក្រសួងកសិកម្មបានបន្តទៀតថា ការដាំដុះមានការយឺតយ៉ាវនេះដោយសារនៅក្នុងរដូវវស្សាឆ្នាំ២០២២នេះទឹកភ្លៀង​បានចាប់ផ្ដើមធ្លាក់លឿន និងមានបរិមាណច្រើនជាងបណ្តាឆ្នាំមុនៗ ដែលប្រការនេះបានធ្វើឱ្យប៉ះពាល់ដល់ការងារបង្កបង្កើន​ផលដំណាំស្រូវរដូវវស្សា ជាពិសេសនៅតំបន់ទំនាបកណ្តាលដែលបានព្រោះស្រូវដើមរដូវវស្សាមួយចំនួនត្រូវរងផលប៉ះពាល់ និងខូចខាតដោយសារជំនន់ទឹកភ្លៀងផងដែរ។

ក្រសួងកសិកម្មបានបញ្ជាក់ថា គិតត្រឹមថ្ងៃទី៨ ខែមិថុនា ឆ្នាំ២០២២ ល្បឿនការងារបង្កបង្កើនផលដំណាំស្រូវរដូវវស្សាអនុវត្តបានប្រមាណ៧៦២៥៤២ហិកតា ស្មើនឹង២៩,១១% នៃផែនការ២ ៦១៩ ៥០០ហិកតា គឺតិចជាងឆ្នាំ២០២១ចំនួនប្រមាណ៦៥០ ០០០ហិកតា ដែលប្រការនេះអាចធ្វើឱ្យប៉ះពាល់ដល់ផែនការផលិតកម្មប្រចាំឆ្នាំហើយអាចនឹងឈាន
ដល់ការប៉ះពាល់សន្តិសុខស្បៀង និងគោលនយោបាយរបស់រាជរដ្ឋាភិបាលក្នុងការជំរុញផលិតកម្មដំណាំស្រូវ និងការនាំចេញអង្ករផងដែរ។

ក្រសួងកសិកម្មបានជំរុញដល់អគ្គនាយកដ្ឋានកសិកម្មនិងមន្ទីរកសិកម្មរុក្ខាប្រមាញ់និងនេសាទរាជធានី ខេត្ត ត្រូវសហការជាមួយមន្ទីរជំនាញជុំវិញខេត្តនិងអាជ្ញាធរមូលដ្ឋានគ្រប់លំដាប់ថ្នាក់ចុះផ្ទៀងផ្ទាត់តួលេខល្បឿនការងារបង្កបង្កើនផលជាក់ស្តែងកំណត់មូលហេតុចម្បងៗដែលបណ្ដាលឱ្យការងារបង្កបង្កើនផលស្រូវមានការយឺតយ៉ាវ និងដាក់ចេញនូវវិធានការបន្ទាន់ចំពោះមុខដើម្បីដោះស្រាយការរាំងស្ទះដល់ល្បឿនការងារបង្កបង្កើនផលក្នុងភូមិសាស្ត្ររបស់ខ្លួន។ ជាមួយគ្នានេះត្រូវជំរុញការដាំដុះនៅតាមតំបន់ដែលមានការដាំដុះយឺតនិងផ្សព្វផ្សាយបច្ចេកទេសដាំដុះ សមស្របទៅតាមលក្ខខណ្ឌរនៃប្រព័ន្ធក្សេត្របរិស្ថានដំណាំស្រូវ។ ទន្ទឹមនឹងនេះ ត្រូវត្រៀម គ្រឿងយន្តកសិកម្មដើម្បីអន្តរាគមន៍ ភ្ជួររាស់ និងរំដោះទឹកចេញពីស្រែជូនប្រជាកសិករដែលទទួលរងផលប៉ះពាល់និងខូចខាតស្រូវដោយសារទឹកជំនន់ ជាពិសេសចំពោះគ្រួសារក្រីក្រខ្វះ លទ្ធភាព។

ចំណែកមន្ទីរកសិកម្មរាជធានី ខេត្ត ត្រូវសហការជាមួយអង្គភាពពាក់ព័ន្ ធនិងអាជ្ញាធរមូលដ្ឋានគ្រប់លំដាប់ថ្នាក់ ដើម្បីវាយតម្លៃការខូចខាតស្រូវដោយសារជំនន់ទឹកភ្លៀងឲ្យ បានរួសរាន់ និងលើកសំណើទៅលេខាធិការដ្ឋានប្រព័ន្ធស្បៀងបម្រុងកម្ពុជានៅក្រសួងសេដ្ឋកិច្ច និងហិរញ្ញវត្ថុ ស៊ីគ្រាប់ពូជស្រូវសម្រាប់ស្ដារឡើងវិញឱ្យបានទាន់ពេលវេលា៕

អត្ថបទ៖ សំអឿន