ព័ត៌មានជាតិ

ក្រុមអ្នកជំនាញក្រុមហ៊ុនស៊ីណូវ៉ាក់នឹងមកសិក្សាមូលដ្ឋានសំណង់និងបច្ចេកទេសវេចខ្ចប់វ៉ាក់សាំងនៅពាក់កណ្តាលខែកក្កដា

បានផុស

២ years មុន

នៅ

ថ្ងៃព្រហស្បតិ៍ ៣០ មិថុនា ២០២២

ដោយ

លោកស្រី វេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាលបានមានប្រសាសន៍ថា ក្រុមអ្នកជំនាញមកពីក្រុមហ៊ុនស៊ីណូវ៉ាក់នឹងធ្វើដំណើរមកប្រទេសកម្ពុជានៅពាក់កណ្តាលខែកក្កដាខាងមុខនេះដើម្បីមកសិក្សាពីមូលដ្ឋានសំណង់និងបច្ចេកទេសរក្សាទុកនិងវេចខ្ចប់វ៉ាក់សាំងនៅកម្ពុជា។

ការចុះមកសិក្សានេះបន្ទាប់ពីសហគ្រាសឱសថកម្ពុជា និងក្រុមហ៊ុន Sinovac Life Sciences នៃសាធារណរដ្ឋប្រជាមានិតចិនបានចុះហត្ថលេខាលើអនុស្សរណៈនៃការយោគយល់គ្នា ស្តីពីកិច្ចសហប្រតិបតិ្តការវេចខ្ចប់វ៉ាក់សាំងបង្ការវីរុសកូវីដ-១៩ដោយអនុលោមទៅតាមនិយាមរបស់សាធារណរដ្ឋប្រជាមានិតចិន។

ថ្លែងប្រាប់អ្នកព័ត៌មានក្នុងសិក្ខាសាលាស្តីពីការពិនិត្យការវិវត្តន៍នៃសកម្មភាពលុបបំបាត់ជំងឺរលាកថ្លើមដោយសារវីរុសប្រភេទបេនិងសេក្នុងប្រទេសកម្ពុជានៅរសៀលថ្ងៃទី៣០មិថុនានេះនៅសណ្ឋាគារទន្លេបាសាក់២ លោកស្រីបានបន្តកន្លងមកវិស័យឯកជននិងក្រុមហ៊ុនស៊ីណូវ៉ាក់បានធ្វើការជាមួយគ្នាមួយជំហានដោយបានចុះហត្ថលេខាលើអនុស្សរណៈយោគយល់គ្នារួចហើយ។

លោកស្រីបានបន្តទៀតថា ឥឡូវនេះការសិក្សាជំហានដំបូងបានបញ្ចប់ហើយក្រុមហ៊ុនឯកជនកំពុងពិភាក្សាទៅលើការងារបច្ចេកទេសមួយចំនួនជាមួយក្រុមហ៊ុនស៊ីណូវ៉ាក់ក៏ជិតបញ្ចប់ហើយដែរ។

លោកស្រីបានបន្ថែមថា នៅពេលសិក្សាចប់សព្វគ្រប់និងមានចុះកិច្ចសន្យាមួយទៀតហើយអ្នកជំនាញមកពីក្រុមហ៊ុនស៊ីណូវ៉ាក់នឹងមកកម្ពុជានៅថ្ងៃទី១២និងថ្ងៃទី១៣ខែកក្កដាខាងមុខនេះដើម្បីមកសិក្សាលើមូលដ្ឋានសំណង់ បច្ចេកទេសរក្សាវ៉ាក់សាំង បច្ចេកទេសច្រកនិងវេចខ្ចប់ព្រោះរោងចក្រនៅកម្ពុជាគ្រាន់តែច្រកនិងវេចខ្ចប់ទេដែលជាជំហានចុងក្រោយមុននឹងនាំចេញទៅលក់នៅលើទីផ្សារ។

នៅពេលសួរថា តើរោងចក្រច្រកនិងវេចខ្ចប់វ៉ាក់សាំងនឹងធ្វើនៅទីតាំងណាលោក ស្រី បានបញ្ជាក់ថារោងចក្រដែលគ្រោងសាងសង់មានទំហំធំហើយអាចធ្វើនៅជាយក្រុងភ្នំពេញ។

គួរបញ្ជាក់ថា សាធារណរដ្ឋប្រជាមានិតចិនបានអនុញ្ញាតឱ្យមានការវេចខ្ចប់វ៉ាក់សាំងបង្ការវីរុសកូវីដ-១៩ប្រភេទស៊ីណូវ៉ាក់នៅប្រទេសកម្ពុជាដោយអនុលោមទៅតាមនិយាមរបស់សាធារណរដ្ឋប្រជាមានិតចិន។

ការអនុញ្ញាតនេះបានធ្វើឡើងនៅក្នុងពិធីចុះហត្ថលេខាលើអនុស្សរណៈនៃការយោគយល់គ្នា ស្តីពីកិច្ចសហប្រតិបតិ្តការវេចខ្ចប់វ៉ាក់សាំងបង្ការវីរុសកូវីដ-១៩ រវាងសហគ្រាសឱសថកម្ពុជា និងក្រុមហ៊ុន Sinovac Life Sciences នៃសាធារណរដ្ឋប្រជាមានិតចិននៅថ្ងៃទី០១ខែមិថុនាឆ្នាំ២០២២នៅទីស្តីការក្រសួងសុខាភិបាល។

លោកស្រី អ្នកឧកញ៉ា ជឹង សុភាព អគ្គនាយិកាសហគ្រាសឱសថកម្ពុជាសហគ្រាសឱសថកម្ពុជាបានឲ្យដឹងថា សហគ្រាសនឹងខិតខំប្រឹងប្រែងអស់ពីលទ្ធភាព ដើម្បីអនុវត្តគម្រោងនេះជាមួយក្រុមហ៊ុន Sinovac ជាដៃគូសហការឲ្យទទួលបានជោគជ័យ ដើម្បីចូលរួមចំណែកក្នុងកិច្ចខិតខំប្រឹងប្រែងរបស់រាជរដ្ឋាភិបាលក្នុងការបន្តប្រយុទ្ធប្រឆាំងជំងឺកូវីដ-១៩។

ចំណែកលោក សាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាលបានបញ្ជាក់ថា គម្រោងវេចខ្ចប់ដំណាក់កាលចុងក្រោយ នៃវ៉ាក់សាំងបង្ការវីរុសកូវីដ-១៩ និងវីរុសបំលែងថ្មីផ្សេងៗទៀត រាជរដ្ឋាភិបាលកម្ពុជា បញ្ជាទិញពីសហគ្រាសឱសថកម្ពុជា រយៈពេល៣ឆ្នាំ(២០២៤-២០២៦) សម្រាប់ផ្គត់ផ្គង់តម្រូវការប្រើប្រាស់ក្នុងប្រទេស៕

ដោយ ៖ សំអឿន