លោក ជំទាវ ម៉ែន សំអន​ជំរុញគណៈចលនាមហាជន​បន្តបញ្ជ្រៀបលើ​យុទ្ធសាស្ត្រសំខាន់ៗ​ដល់ថ្នាក់មូលដ្ឋាន​

លោកជំទាវ ម៉ែន សំអន អនុប្រធានគណបក្ស និងជាប្រធានគណៈចលនាមហាជន នៃគណៈ​កម្មាធិ​ការកណ្តាល គណបក្សប្រជាជនកម្ពុជាបានថ្លែងនូវទិសដៅ​បញ្ច្រៀបចំពោះគោល​បំណងនៃ​យុទ្ធសាស្ត្រ​៣យ៉ាងសំខាន់ៗដល់ថ្នាក់មូលដ្ឋាននិងការងាររបស់ខ្លួនលើការងារសាធារណមតិ និងផ្សព្វផ្សាយមហាជន ជាពិសេសក្នុងបរិបទឌីជីថល។

លោកជំទាវ ម៉ែន សំអន ថ្លែងបែបនេះអញ្ជើញជាអធិបតីក្នុងកិច្ចប្រជុំបូកសរុបលទ្ធផលការងារ​ឆមាសទី១ ប្រចាំឆ្នាំ ២០២២ និងលើកទិសដៅការងារអនុវត្តបន្ត របស់គណៈចលនាមហាជន នៃគណៈកម្មាធិការកណ្តាលគណបក្សប្រជាជនកម្ពុជានៅវិមាន ៧មករា នារសៀល ថ្ងៃសុក្រ ទី១៩ ខែសីហា ឆ្នាំ២០២២។

លោកជំទាវថ្លែងថា គោលបំណងនៃការរៀបចំសិក្ខាសាលានេះគឺទី ១ ធ្វើបច្ចុប្បន្នភាពស្ថានភាព​​នយោបាយ សេដ្ឋកិច្ច សង្គម និងស្វែងយល់អំពីតួនាទីរបស់ការងារផ្សព្វផ្សាយ និងសាធារណមតិ។ ទី២ ចែករំលែកអំពីវិធីសាស្ត្រនៃការផ្សព្វផ្សាយមហាជនក្នុងបរិបទឌីជីថល។

ទី៣ បង្កើតឱកាស​ជួបជុំ និងពង្រីកការទំនាក់ទំនង ជាមួយអង្គការចាត់តាំងនិងយន្តការផ្សព្វផ្សាយនានារបស់គណបក្ស ជាពិសេសដើម្បីពង្រឹងប្រសិទ្ធភាព ភាពប្រទាក់ក្រឡាគ្នាទាំងយន្តការនានានៅថ្នាក់កណ្តាល និងរវាងទំនាក់ទំនងរវាងយន្តការថ្នាក់កណ្តាលជាមួយថ្នាក់មូលដ្ឋាន និង(៤)បង្កើត​ឱកាសបាន​រៀនសូត្រ ពីគ្នាទៅវិញទៅមកដកស្រង់ទស្សនៈ ចែករំលែកបទពិសោធន៍ និងស្វែងយល់ពីការ​ផ្សព្វផ្សាយនៅតាមមូលដ្ឋាននីមួយៗ និងពីតម្រូវការ។

​លោកជំទាវ ម៉ែន សំអនបានថ្លែងថា កិច្ចប្រជុំនេះមានសារៈសំខាន់ណាស់​គឺ«ការចែក​រំលែកព័ត៌មាននៅក្នុងបរិបទឌីជីថល និងការផ្លាស់ប្តូរបទពិសោធន៍​លើការងារផ្សព្វផ្សាយ​មហាជន» ដែលមានរចនាសម្ព័ន្ធគណៈចលនាមហាជនរាជធានី-ខេត្ត ក្រុង ស្រុក ខណ្ឌ ជនបង្គោលទទួលបន្ទុកការងារចលនាមហាជនពីបណ្តាគណបក្ស ក្រសួង-ស្ថាប័ន រចនាសម្ព័ន្ធផ្សព្វផ្សាយរបស់រាជរដ្ឋាភិបាល និងគណបក្សតែម្ដងជាទិសដៅបញ្ច្រៀប​គ្រប់ថ្នាក់មូលដ្ឋាន៕

អត្ថបទ៖ វិមាន