អភិបាលរាជធានីគាំទ្រគម្រោងសាងសង់អគារមន្ទីរពេទ្យបង្អែកជើងឯកកម្ពស់ ៤ ជាន់

អភិបាលនៃគណៈអភិបាលរាជធានីភ្នំពេញលោក ឃួង ស្រេង បានគាំទ្រយ៉ាងពេញទំហឹងជាមួយនឹងការផ្តល់កិច្ចសហការដល់ដំណើរការគម្រោងកែលម្អមន្ទីរពេទ្យបង្អែកជើងឯកទៅតាមស្តង់ដារបច្ចេកទេស និងគាំទ្រទៅលើការ​សាងសង់អគារមន្ទីរពេទ្យថ្មីកម្ពស់លើសពី៤ជាន់ទៅតាមតម្រូវការជាក់ស្តែង និងត្រៀមលក្ខណៈសិក្សាដាក់មន្ទីរពេទ្យនេះដល់កម្រិតទី៣។

ការបញ្ជាក់ពីការគាំទ្រនេះបានធ្វើឡើងកាលពីព្រឹកថ្ងៃទី ២៥ វិច្ឆិកានេះ ក្នុងជំនួយពិភាក្សាការងារ ជាមួយប្រតិភូអង្គការ​KOICA កូរ៉េដឹកនាំដោយលោក Rho Hyun Jun នាយកប្រចាំប្រទេសរបស់ទីភ្នាក់ងារ KOICA នៅសាលារាជធានីភ្នំពេញ។

លោក ឃួង ស្រេង បានមានប្រសាសន៍លើកឡើងថា៖ ជំនួយដែលសាធារណរដ្ឋកូរ៉េបានជួយដល់មន្ទីរពេទ្យបង្អែកជើងឯក ខណ្ឌដង្កោជាជំនួយដែលរដ្ឋបាលរាជធានីភ្នំពេញចង់បានបំផុត ដើម្បីលើកកំពស់សុខមាលភាព ប្រជាពលរដ្ឋក្នុងរាជធានីភ្នំពេញក៏ដូចបងប្អូនមកពីតាមបណ្តាខេត្តនានា មករកសេវាសុខាភិបាលនៅរាជធានីភ្នំពេញ មានការកើនឡើងស្របតាមអនុសាសន៍របស់សម្តេចតេជោហ៊ុន សែន នាយករដ្ឋមន្ត្រីកម្ពុជា។

លោក Ro Hyun Jun បានលើកឡើងថា៖ Koica បានដាក់ចេញគម្រោង៣ពីឆ្នាំ២០២៤ ដល់២០២៩រួមមាន៖ការសាងសង់អាគារថ្មី,ការបំពាក់ឧបករណ៏បរិក្ខាពេទ្យ និងការបណ្តុះបណ្តាលជំនាញបន្ថែមដល់បុគ្គលិកមន្ទីរពេទ្យ។

លោក Ro Hyun Jun បានឲ្យដឹងទៀតថា៖ គម្រោងនេះគ្រោងនឹងចំណាយថវិកា១១លានដុល្លាសហរដ្ឋអាមេរិក។ ភាគីKoicaបានចាប់អារម្មណ៏លើភាពទាក់ទាញសំរាប់អ្នកជំងឺមិនចង់ឲ្យពួកគាត់ទៅហួស មកហួស ឬទៅរកតែមន្ទីរពេទ្យធំៗនៅកណ្តាល​ក្រុង។ ដូច្នេះការបំពាក់បរិក្ខាពេទ្យការរៀបចំហេដ្ឋារចនាសម្ពន្ធ័ រួមនឹងក្រុមគ្រូពេទ្យជំនាញគឺជារឿងចាំបាច់៕

អត្ថបទ៖ ស្រីរ័ត្ន