អាកាសធាតុវិវត្តថ្មីចុះត្រជាក់ទាបបំផុតជាងសព្វដង

អាកាសធាតុបន្តចុះត្រជាក់ នៅថ្ងៃទី ២៩-៣០ ដំណាច់ខែមករានេះ ដោយសារការវិវត្តនៃទ្រនុងសម្ពាធខ្ពស់ពីចិន និងខ្យល់មូសុងឦសាន្ត បន្តបង្កើនឥទ្ធិពលក្នុងកម្រិតពីបង្គួរទៅខ្លាំងមកលើកម្ពុជា។

ក្រសួងធនធានទឹក និងឧតុនិយម បានប្រកាសថា តំបន់ខ្ពង់រាប និងតំបន់ពាយព្យ អាកាសធាតុនឹងចុះត្រជាក់ខ្លាំងជាងសព្វមួយដង ខណៈខេត្តនៅតំបន់ទាំងនោះ សីតុណ្ហភាពអប្បបរមាអាចនឹងធ្លាក់ដល់ ១៤-១៦ អង្សា។ រីឯខេត្តដទៃទៀត សីតុណ្ហភាពអប្បបរមាមានពី ១៧ អង្សា ខណៈរាជធានីភ្នំពេញ​ធ្លាក់ត្រឹម ២០ អង្សា។ បន្ទាប់ពីនោះ រហូតដល់ថ្ងៃទី ៥ ខែកុម្ភៈ សីតុណ្ហភាពនឹងវិលមកធម្មតាវិញ។

ជាមួយគ្នានេះ ក្រសួងធនធានទឹក ក៏បានអំពាវនាវដល់សាធារណជនឱ្យបង្កើនការប្រុងប្រយ័ត្នចំពោះស្ថានភាពអាកាសធាតុចុះត្រជាក់៕