​សម្ពោធ​ទីលាន​ចាក់សំរាម​ថ្មីទំនើប​​ អាចផ្ទុកសំរាមបានជាង ២០ ម៉ឺនម៉ែត្រគូប

ទីលានទុកដាក់សំរាមថ្មីចំនួនពីរកន្លែងដែលស្ថិតនៅក្រុងកំពង់ឆ្នាំង និងមួយទៀតកន្លែងទៀតនៅក្រុងពោធិ៍សាត់មានលទ្ធភាពផ្ទុកសំរាមបានជាង ២០ ម៉ឺនម៉ែត្រគូប ក្នុងរយៈពេល៣០ឆ្នាំ បានដាក់ឱ្យដំណើរហើយនៅព្រឹកថ្ងៃទី ២២ កម្ភៈឆ្នាំ​២០២៣ បន្ទាប់ពីសាងសង់រួចរាល់ជាស្ថាពរ។

លោកទេសរដ្ឋមន្រ្តី ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូនបានមានប្រសាសន៍នៅក្នុងពិធីដាក់ឱ្យប្រើប្រាស់ជាផ្លូវការនូវទីលានទុកដាក់សំរាមថ្មីថា ទីលានចាក់សំរាមថ្មីទាំងពីរនេះក្រោមកម្ចីឥណទានពីធនាគារអភិវឌ្ឍន៍អាស៊ី ហៅកាត់ ADB ក្នុងគម្រោងកែលម្អគ្រប់គ្រងបរិស្ថានក្រុងជុំវិញបឹងទន្លេសាប ជំហានទី១ហើយទីលាននីមួយៗមានលទ្ធភាព​ផ្ទុកសំរាមបានចំនួន ១១ ម៉ឺនម៉ែត្រគូបក្នុងរយៈពេល ៣០ ឆ្នាំ។

លោកទេសរដ្ឋមន្រ្តី ស៊ុន ចាន់ថុល បានបន្តថា ក្រៅពីសាងសង់ទីលានទុកដាក់សំរាម នៅក្រុងកំពង់ឆ្នាំង ក៏មាន​សាងសង់​ស្ថានីយនិងប្រព័ន្ធប្រព្រឹត្តកម្មទឹកកខ្វក់ដែលមានតម្លៃ ១៨ លានដុល្លារ ក្រោមកម្ចីឥណទានពីធនាគារអភិវឌ្ឍន៍អាស៊ីដែលមកដល់បច្ចុប្បន្នសម្រេចលទ្ធផលបាន ៥១ ភាគរយហើយ។

សូមរំលឹកថា ទីលានចាក់សំរាមនៅក្រុងកំពង់ឆ្នាំងនេះសាងសង់លើផ្ទៃដីប្រមាណជាង ១២ ហិកតា ស្ថិតក្នុងភូមិត្រពាំងស្បូវ ឃុំស្រែថ្មី ស្រុករលាប្អៀរ ដោយរួមមានរណ្តៅចាក់សំរាម, ស្រះសម្អាតទឹកកខ្វក់ចេញពីសំរាម, ស្រះត្រងទឹកកខ្វក់, អគាររដ្ឋបាល, អណ្ដូងសម្រាប់ត្រួតពិនិត្យគុណភាពទឹក, ផ្លូវចូលទីលានកប់សំរាម,បន្ទប់ម៉ាស៊ីនភ្លើង, ប្រព័ន្ធលូរបង្ហូរទឹកភ្លៀង, របងព័ទ្ធជុំវិញទីលានចាក់សំរាម ,និងហេដ្ឋារចនាសម្ព័ន្ធមួយចំនួនទៀត។

ចំណែកទីលានចាក់សំរាម នៅក្រុងពោធិ៍សាត់សាងសង់លើផ្ទៃដីប្រមាណជាង១៥ហិកតា ស្ថិតក្នុងភូមិទួលម្កាក់ សង្កាត់រលាប។

ធនាគារអភិវឌ្ឍន៍អាស៊ី បានគាំទ្រឥណទានសម្បទានលើអនុគម្រោងសាងសង់ទីលានទុកដាក់សំរាមក្នុងក្រុងចំនួន ៥ នៅកម្ពុជាមានដូចជាក្រុងកំពង់ឆ្នាំង ក្រុងពោធិ៍សាត់ ក្រុងបាត់ដំបង ក្រុងកែប និងក្រុងកំពត ដើម្បីលើកកម្ពស់សណ្ដាប់ធ្នាប់ សោភ័ណភាព អនាម័យ បរិស្ថានទីក្រុង ទីប្រជុំជននិងសហគមន៍៕

អត្ថបទ៖ សំអឿន