សាស្រ្តាចារ្យ៖ មិនបាច់ហៅលោកឧកញ៉ាទេ ត្រឹមឧកញ៉ាគឺគ្រប់គ្រាន់ហើយ

សាស្រ្តាចារ្យអក្សរសាស្ត្រខ្មែរបានបំភ្លឺលើការប្រើប្រាស់ពាក្យលោក​ឧកញ៉ា ដែល​អាចនាំឲ្យមានការយល់ច្រឡំ ឬបង្កើនការច្របូកច្របល់ថែមទៀត។

សាស្ត្រាចារ្យ ទូច គីមស៊្រាង ប្រធាន​សមាគម​ទ្រទ្រង់​អក្សរ​សាស្រ្ត និង​វប្បធម៌​ខ្មែរ និង​ជា​សមាជិក​ក្រុម​ប្រឹក្សា​ជាតិ​ភាសាខ្មែរ​នៃ​ទីស្តី​ការ​គណៈ​រដ្ឋមន្រ្តី​បាន​បកស្រាយថា ក្នុងវចនានុក្រម​សម្តេច​សង្ឃ ជួន ណាត ឧកញ៉ាមាន ៣ កម្រិត គឺឧកញ៉ា អ្នកឧកញ៉ា និងលោកអ្នកឧកញ៉ា។ ឧកញ៉ា កម្រិតទាបជាងអ្នកឧកញ៉ា ហើយអ្នកឧកញ៉ា កម្រិតទាបជាងលោកអ្នកឧកញ៉ា។

សាស្ត្រាចារ្យដែល​ធ្វើការ​ផ្នែក​អក្សរសាស្រ្ត​ជាតិ​ ​សង្កេតឃើញមាន​​ហៅ​ឧកញ៉ា​​​​ខ្លះ​​មាន​ការ​បន្ថែម​បន្ថយ​​លើស​ពី​ក្រឹត្យក្រមដើម​។ ការសរសេរឬហៅដោយយល់ច្រឡំលោកឧកញ៉ានេះ លោកឧកញ៉ានោះគឺមិនត្រឹមត្រូវទេ។

“ហៅត្រឹមឧកញ៉ាគ្រប់គ្រាន់ហើយ មិនបាច់បន្ថែមពាក្យលោកឧកញ៉ានេះ លោកឧកញ៉ានោះទេ”។

សាស្រ្តាចារ្យបញ្ជាក់ថា ព្រះរាជក្រឹត្យបានបែងចែកច្បាស់ពីគោរមងារឧកញ៉ា ការហៅថែមថយខុសពីក្រឹត្យក្រមដើម អាចនាំ​ឲ្យ​មាន​ភាព​ច្របូកច្របល់​ថែម​ទៀត។ សាស្ត្រាចារ្យលើកឡើងថា អ្នក​ខ្លះ​ហៅឧកញ៉ាទទេ ខ្លាចមិនពិរោះស្តាប់តែជាពាក្យដែលចែងក្នុងក្រឹត្យក្រម ចេញដោយព្រះរាជក្រឹត្យ។ ដូចលោកជំទាវ ឯកឧត្តម មិនបាច់ប្រើលោកឯកឧត្តមអីទេ ត្រឹមឯកឧត្តមអីគឺគ្រប់គ្រាន់ហើយ។

តាម​សាស្រ្តាចារ្យ​ សព្វថ្ងៃកម្រិត​ឧកញ៉ា និងអ្នកឧកញ៉ាមាន​ច្រើន​ តែ​ឋានៈ​ឡើង​ដល់​កម្រិត​លោកអ្នកឧកញ៉ាមិន​ទាន់​មាន​ទេ។

សាស្រ្តាចារ្យទូច គីមស៊្រាង ក្រើន​រំលឹក​ថា ដើម្បីថែរក្សាឧត្តមភាពជាឧកញ៉ា បុគ្គលទាំងឡាយ​ត្រូវរក្សាព្រហ្មវិហារធម៌ ចំណេះដឹង គុណភាព សីលធម៌ មានការងារល្អ ដែល​ទទួលបានការគោរពនិងឲ្យតម្លៃពីមនុស្សផងទាំងពួង។

គួរ​បញ្ជាក់​ថា តាមអនុក្រឹត្យថ្មីចុះថ្ងៃ ២០ មីនា ឆ្នាំ២០១៧ ដើម្បីទទួលបានគោរមងារជា «ឧកញ៉ា» សប្បុរសជនត្រូវធ្វើអំណោយ​ជូនរដ្ឋ ដែលមានតម្លៃលើសពី៥០ម៉ឺនដុល្លារអាមេរិកឡើងទៅ៕