រកឃើញអ្នកឆ្លងកូវីដ ១០នាក់ទៀត ជាពលករមកពីថៃ

ក្រសួងសុខាភិបាលកម្ពុជា នៅថ្ងៃសៅរ៍នេះ បានឲ្យដឹងថា ពលករ​ខ្មែរ​ដែលត្រឡប់មក​ពី​ថៃ​ចំនួន១០នាក់​ទៀត​​បានឆ្លង​ជំងឺ​​កូវីដ ១៩ ដែល​នាំ​ឲ្យ​ករណី​ឆ្លង​សរុប​ក្នុង​ចំណោម​ពលករ​ខ្មែរ​ដែល​មក​ពី​ថៃ កើន​ដល់​ ៦៦ ​នាក់​ហើយ​ គិត​ត្រឹម​ថ្ងៃ​ទី​១៦ ខែ​មករា​នេះ។

សេចក្តី​ប្រកាស​ព័ត៌មាន​របស់​ក្រសួង​សុខាភិបាល ចេញផ្សាយនៅថ្ងៃសៅរ៍ទី ១៦ ខែមករានេះថា ករណីវិជ្ជមានថ្មីសរុបចំនួន ១០ នាក់ ដែលជាពលករធ្វើដំណើរមកពីប្រទេសថៃ មានស្ត្រី ៨ នាក់ បុរស ២នាក់ មានមួយចំនួន ឆ្លងកាត់ព្រំំដែនក្រុងប៉ោយប៉ែត និងព្រំដែនខេត្តបាត់ដំបង និងប៉ៃលិន មានមួយចំនួនបានមកដល់កម្ពុជា តាំងពីថ្ងៃទី ២ ដើមខែមករា និងមួយចំនួន មកដល់កម្ពុជានៅថ្ងៃទី ១៣ ខែមករា កន្លងទៅថ្មីៗនេះ។

ក្រសួងបញ្ជាក់ដែរថា ក្រសួងក៏បានព្យាបាលអ្នកជំងឺកូវីដ-១៩ម្នាក់ បានជាសះស្បើយផងដែរ។

គិតត្រឹមថ្ងៃទី ១៦ មករា នេះ អ្នកឆ្លងជំងឺកូវីដ១៩ នៅទូទាំងប្រទេសបានកើនឡើង ដល់ ៤៣៦ ករណី ដែលមានអ្នកកំពុងសម្រាកព្យាបាលចំនួន ៥៤ នាក់៕