ព័ត៌មានជាតិ

សម្តេចតេជោ ហ៊ុន សែន សរសើរ យឹម ស៊ីណន មានភរិយាដ៏ល្អ

បានផុស

១២ ខែ មុន

នៅ

ថ្ងៃពុធ ២៩ មីនា ២០២៣

ដោយ

សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជាបានកោតសរសើរលោក យឺម ស៊ីណន ដែលមានភរិយាដ៏ល្អ គឺអ្នកស្រី សុផាត មករា។ អ្នកស្រីមករា ដែលបានបង្ហោះសារលើទំព័រហ្វេសប៊ុករបស់ខ្លួន គោរពដឹងគុណយ៉ាងជ្រាលជ្រៅជូនចំពោះសម្តេចតេជោ ដែលបានផ្តល់ក្តីមេត្តាសណ្តោសប្រណីចំពោះស្វាមីរបស់ខ្លួន។

តាមរយៈបណ្តាញសង្គមហ្វេសបុកComment លើ status អ្នកស្រី សុផាត មករា ភរិយាលោក យឹម ស៊ីណន សម្តេចតេជោបានសរសេរថា “ស៊ីណន កូនពិតជាមានសំណាងណាស់ដែលមានភរិយាដ៏ល្អ។ពេលកូនមានបញ្ហាខាងផ្លូវច្បាប់ កូនស្រីមិនបានស្រែករកអ្នកណាជួយក្រៅពីស្រែករកសម្តេចពុកជួយនោះឡើយ។ពុកជាមនុស្សចិត្តរឹងជាមួយមនុស្សអាក្រក់តែក៏ជាមនុស្សចិត្តទន់ជាមួយមនុស្សល្អ”។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្តេចបានសរសេរទៀតថា “ជាសំណាងកូនហើយដែលភរិយាកូនមិនបានទៅពឹងជនបរទេសឬអង្គការក្រៅរដ្ឋាភិបាលដែលប្រឆាំងឲ្យមកគាបសង្កត់រាជរដ្ឋាភិបាលដើម្បីដោះលែងកូន។ពុកជាមនុស្សក្បាលរឹងជាមួយការគាបសង្កត់ពីបរទេស។កាន់តែសង្កត់អ្នកជាប់ទោសឬពិរុទ្ធជនជាប់គុកឬជាប់ឃុំកាន់តែយូរ។គេត្រូវចងចាំលើចំណុចនេះ។ផ្ទុយពីអ្នកដ៏ទៃភរិយាកូននឹកឃើញមុនគេគឺសុំឲ្យពុកជួយដូចនេះពេលឃើញភរិយាកូន បង្ហោះតាមFacebook និងឃើញកូនទទួលស្គាល់កំហុស

រដ្ឋមន្ត្រីក្រសួងយុត្តិធម៌ខិតខំសម្របសម្រួលជាមួយតុលាការដើម្បីឲ្យកូនបានចាកចេញទៅជួបប្រពន្ធកូនវិញ។ចាត់ទុកជាសុបិនអាក្រក់និងរំដោះគ្រោះក្នុងឆ្នាំចាស់ដើម្បីសេចក្តីសុខនិងសប្បាយរីករាយក្នុងឱកាសចូលឆ្នាំថ្មីនាពេលដ៏ខ្លីខាងមុខ។ជូនពរកូនទាំងពីរ និងចៅៗជួបតែសេចក្តីសុខសេចក្ដីចម្រើន។ផ្តាំទៅពួកព្រូសក្រៅរបងផ្ទះបើចង់ឲ្យមនុស្សជាប់ទោសបានយូរនិងគ្មានការយោគយល់ពីហ៊ុន សែន សុំជេរហ៊ុន សែនឲ្យបានច្រើនបន្តិច”។

នៅល្ងាចថ្ងៃទី២៨ ខែមីនា ឆ្នាំ២០២៣នេះ តុលាការបានបង្គាប់ឱ្យដោះលែងវិញ ក្រោយពេលលោកទទួលស្គាល់កំហុស និងបានទូលថ្វាយសូមព្រះរាជទានទោសពីព្រះមហាក្សត្រ។កាលពីថ្ងៃទី២២ ខែមីនា កន្លងទៅនេះ លោក យឹម ស៊ីណន ត្រូវបានចៅក្រមសាលាដំបូងរាជធានីភ្នំពេញ បង្គាប់ឱ្យឃុំខ្លួនជាបណ្តោះអាសន្ន ក្រោមការចោទប្រកាន់ថា ប្រមាថចំពោះអង្គព្រះមហាក្សត្រ និងញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម៕