ព័ត៌មានជាតិ

ការិយាល័យភូមិបាលជួបជុំគ្នា ដើម្បីគោរពទង់ជាតិជាទង្វើល្អ សម្រាប់មន្ត្រីរាជការ

បានផុស

៣ years មុន

នៅ

ថ្ងៃអង្គារ ១៩ មករា ២០២១

ដោយ

ជារៀងរាល់ថ្ងៃប្រជាពលរដ្ឋ ដែលរស់នៅក្បែរការិយាល័យភូមិបាល ខណ្ឌច្បារអំពៅ រាជធានីភ្នំពេញ បានសង្កេតឃើញមន្ត្រីរាជការរបស់ការិយាល័យខាងលើ បានជួបជុំគ្នាដើម្បីគោរពទង់ជាតិ ដែលចាប់ផ្តើមឡើងរាល់វេលាម៉ោង៦និង៣០នាទីព្រឹក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមប្រភពពីលោក មុន សក្កតា ដែលមានលំនៅឋានក្បែរការិយាល័យភូមិបាល ខណ្ឌច្បារអំពៅ មានទីតាំងសង្កាត់ច្បារអំពៅទី២ ខណ្ឌច្បារអំពៅ រាជធានីភ្នំពេញ បានឲ្យដឹងថា មុនម៉ោង៦និង៣០នាទីរាល់ព្រឹក លោកតែងសង្កេតឃើញមន្ត្រីរាជការនិងថ្នាក់ដឹកនាំក្នុងការិយាល័យភូមិបាលខណ្ឌច្បារអំពៅ តែងជួបជុំគ្នាគោរពទង់ជាតិ និងគោរពភ្លេងជាតិ មុនពេលចូលបំពេញការងារ។អ្វីដែលគួរឲ្យកត់សំគាល់ គឺការច្រៀងគោរពទង់ជាតិ ដោយមន្ត្រីរាជការផ្ទាល់ពុំមានចាក់មេក្រូនាំឲ្យប៉ះពាល់សំឡេងឬរំខានដំណេករបស់ប្រជាពលរដ្ឋឡើយ។

លោក សក្កតា បន្តថាចំពោះការជួបជុំគ្នាគោរពទង់ជាតិ និងគោរពភ្លេងជាតិ ដែលប្រព្រឹត្តិធ្វើឡើងរបស់មន្ត្រីរាជការនៃការិយាល័យភូមិបាលខណ្ឌច្បារអំពៅជារៀងរាល់ថ្ងៃនេះ គឺជាគំរូដ៏ល្អ ដែលស្ថាប័នរដ្ឋទាំងអស់ គួរអនុវត្តន៍ឲ្យបានទាំងអស់គ្នា និងជាគំរូដ៏ល្អសម្រាប់ឲ្យក្មេងៗជំនាន់ក្រោយបានឃើញនិងយកគំរូតាម ដើម្បីយើងទាំងអស់គ្នា គោរពទង់ជាតិនិងភ្លេងជាតិរបស់ព្រះរាជាណាចក្រកម្ពុជាយើង។

ទាក់ទិននឹងការជួបជុំគ្នា ដើម្បីគោរពទង់ជាតិ និងគោរពភ្លេងជាតិ ជារៀងរាល់ថ្ងៃនេះ លោក លឹម ពី ប្រធានការិយាល័យភូមិបាលខណ្ឌច្បារអំពៅ បានប្រាប់កម្ពុជាថ្មីថា ការជួបជុំគ្នារបស់មន្ត្រីរាជការការិយាល័យភូមិបាលរបស់លោកជារៀងរាល់ថ្ងៃនេះ គឺភារកិច្ច ដែលមិនអាចបំភ្លេចបានរបស់មន្ត្រីរាជការ និងកងកម្លាំងប្រដាប់អាវុធរួមទាំងបណ្តាអង្គភាពរបស់រដ្ឋ។ ចំពោះអង្គភាពរបស់លោក គឺអនុវត្តន៍ជាប់ជារៀងរាល់ថ្ងៃ។ ម្យ៉ាងទៀតបន្ទាប់ពីគោរពទង់ជាតិរួច លោកបានឆ្លៀតពេលជួបពិភាក្សាការងារជាមួយមន្ត្រីរាជការ នៅកិច្ចការងារ ដែលមន្ត្រីយើងអនុវត្តន៍តើមានជួបហេតុផលអ្វីឬងាយស្រួលអ្វី ដើម្បីឲ្យការងារបានអនវត្តទៅបានដោយជោគជ័យជូនប្រជាពលរដ្ឋ ក្នុងមូលដ្ឋានខណ្ឌច្បារអំពៅ។

លោក លឹម ពី បានបញ្ជាក់ថា បន្ទាប់ពីបញ្ចប់គោរពទង់ជាតិរួចរាល់ហើយ ទើបមន្ត្រីរាជការយើងទាំងអស់នាំគ្នាស្រស់ស្រូបអាហារពេលព្រឹក ដែលជាការឧបត្ថម្ភថវិកាផ្ទាល់របស់លោក មុនពេលបំពេញការងារតាមភារកិច្ចរៀងៗខ្លួន។ ក្នុងនោះលោក លឹម ពី បានកោតសរសើរដល់មន្ត្រីរាជការនិងថ្នាក់ដឹកនាំ ក្នុងការិយាល័យភូមិបាលខណ្ឌច្បារអំពៅទាំងអស់ ដែលចេះសាមគ្គីគ្នា ស្រឡាញ់និងគោរពគ្នាដោយគ្មានការគំកួនហើយស្រឡាញ់រាប់អានគ្នាដូចជាបងប្អូនកើតចេញពីផ្ទៃម្តាយតែមួយ ដូចសព្វថ្ងៃនេះ៕

អត្ថបទ៖ នរា