គ្រូ​ពេទ្យស្ម័គ្រចិត្ត ឯកឧត្តម​​ហ៊ុន ម៉ានី​ ពិនិត្យ​សុខភាព​និង​ផ្តល់​ថ្នាំ​​ឥតគិត​ថ្លៃ​ជូន​ប្រជាពលរដ្ឋ​នៅ​ស្រុក​ប្រាសាទ​បាគង​​

​ថ្ងៃទី១៤ ខែឧសភា ឆ្នាំ២០២៣នេះ លោក លេង ផាលី ប្រធាន​ប្រតិបត្តិក្រុមការងារគ្រូពេទ្យស្ម័គ្រចិត្ត​ឯកឧត្តម​ ហ៊ុន ម៉ានី និង​ជា​រដ្ឋលេខាធិការក្រសួងផែនការ បាន​ដឹក​នាំ​ក្រុម​គ្រូ​ពេទ្យ​ស្ម័គ្រ​ចិត្តមួយ​ចំនួន ចុះ​មក​ពិនិត្យ​សុខភាព​ និង​ចែក​ថ្នាំ​ពេទ្យជូនប្រជាពលរដ្ឋ ដោយ​ឥតគិតថ្លៃ​ ជូន​ដល់​ប្រជាពលរដ្ឋ​ក្នុង​ស្រុកប្រាសាទបាគង ខេត្តសៀមរាប ជាទឹកចិត្តមនុស្សធម៌ដ៏ថ្លៃថ្លារបស់ ឯកឧត្តម​​ហ៊ុន ម៉ានី ប្រធានកិត្តិយសក្រុមការងារគ្រូពេទ្យស្ម័គ្រចិត្តឯកឧត្តម​ ហ៊ុន ម៉ានី។

លោកវេជ្ជបណ្ឌិត ក្រុស សារ៉ាត់ អនុប្រធានប្រតិបត្តិ ទទួលបន្ទុកប្រធានប្រតិបត្តិក្រុមការងារ​គ្រូពេទ្យស្ម័គ្រ​ចិត្ត​ឯកឧត្តម​​ ហ៊ុន ម៉ានី ប្រចាំខេត្តសៀមរាប និងជាប្រធានមន្ទីរសុខាភិបាលខេត្ត មានប្រសាសន៍ថា​ ក្រុមការងារបានធ្វើការពិគ្រោះជំងឺរួមមាន​ ជំងឺទូទៅ អប់រំសុខភាព ជំងឺផ្លូវចិត្ត ជំងឺទូទៅផ្នែកកុមារ រោគស្ត្រី ឫសដូងបាត ជំងឺសួត ក្រពះ ពោះវៀន ជំងឺផ្លូវដង្ហើម ជំងឺប្រដាប់​រំលាយ​អាហារ ជំងឺសើរស្បែក ព្រូន ស្លេកស្លាំង សន្លាក់ឆ្អឹង រលាកថ្លើម កាមរោគ ជំងឺគ្រុនចាញ់ គ្រុនឈាម ជំងឺភ្នែក សុខភាពមាត់ធ្មេញ ជំងឺទឹកនោមផ្អែម ជំងឺបេះដូង លើសឈាម ជំងឺត្រចៀក ច្រមុះ បំពង់ក ជំងឺតម្រងនោម អេកូសាស្ត្រ ម៉ាស៊ីនផ្លុំរកមេរោគក្រពះតាមរយ:ខ្យល់ដង្ហើម វាស់​ចង្វាក់​បេះដូង មន្ទីរពិសោធន៍(វិភាគឈាម) វះកាត់តូចនិងព្យាបាលរបួស។ល។

លោកវេជ្ជបណ្ឌិត បញ្ជាក់ថា​ ការពិនិត្យនិងព្យាបាលជំងឺជូនប្រជាពលរដ្ឋដោយឥតគិតថ្លៃ នេះគឺ​ជា​ស្មារតី​មនុស្សធម៌សុទ្ធសាធ​ដែលស្តែងចេញពីសេចក្តីស្រឡាញ់បងប្អូនប្រជាពលរដ្ឋក្នុងនាម​ជា​ឈាម​ជ័រ​ខ្មែរដូចគ្នា ខ្មែរស្រឡាញ់ខ្មែរ ខ្មែររួបរួមគ្នាតែមួយ អនាគតតែមួយ ពោល​គឺ​ការ​ព្យាបាលមិន​ប្រកាន់​បក្សពួក សាសនា ឬនិន្នាការនយោបាយណាមួយឡើយ សំដៅចូលរួម​កាត់​បន្ថយ​ភាពក្រីក្រ​របស់​ប្រជាពលរដ្ឋមួយចំណែកផងដែរ ។

លោក លេង ផាលី មានប្រសាសន៍ថា​សកម្មភាពមនុស្សធម៌នេះ​អាចប្រព្រឹត្ត​ទៅ​បានក៏ដោយសារ​ប្រទេស​ជាតិមាន សុខសន្តិភាពពេញលេញ ក្រោមការដឹកនាំប្រកប​ដោយ​គតិបណ្ឌិត​របស់​សម្តេចតេជោ ​ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានធ្វើឲ្យប្រទេសជាតិ​ឲ្យមាន​ការរីក​​ចម្រើនឥតឈប់ឈរ មានការផ្សះផ្សាជាតិ បង្រួបបង្រួមជាតិមានស្ថិរភាព និងសន្តិភាពពិត​ប្រាកដ ដូចនេះយើងទាំងអស់គ្នាត្រូវតែរួមគ្នាថែរក្សាសុខសន្តិភាព និងស្ថេរភាពតាមគោល​នយោបាយ​ឈ្នះ​ឈ្នះ​របស់​សម្តេចតេជោ ឲ្យបានគង់វង្សរៀងរហូត ។

លោក​​បញ្ជាក់ថា បញ្ហាសុខភាព គឺជាមូលដ្ឋានគ្រឹះដើម្បីឆ្ពោះទៅរកភាពជោគជ័យ សុភមង្គលជូន​គ្រួសារ​និង​សង្គជាតិមានសុខភាពល្អ ទើបមានអ្វីៗទាំងអស់ មានសន្តិភាព មានសុខភាពល្អ នាំឱ្យ​មាន​ការ​អភិវឌ្ឍន៍នោះយើងនឹងចាកចេញផុតពីភាពក្រីក្រ។

សូមបញ្ជាក់ថា​ សកម្មភាពក្រុមការងារគ្រូពេទ្យស្ម័គ្រចិត្តលោក ហ៊ុន ម៉ានី មានចំនួន៥០០នាក់ ទទួល​បាន​ការចូលរួមសហការគាំទ្រពីរដ្ឋបាលខេត្តសៀមរាប សហភាពសហព័ន្ធយុវជនកម្ពុជាខេត្ត រដ្ឋបាលស្រុកប្រាសាទបាគង ក្រុមការងាររាជរដ្ឋាភិបាលចុះមូលដ្ឋានស្រុកប្រាសាទបាគង យុវជន​កាកបាទក្រហមកម្ពុជា សកម្មជនក្រុមការងារយុវជនរាជធានីភ្នំពេញ និងយុវជនកាយរិទ្ធិកម្ពុជា ចុះពិនិត្យសុខភាព និង ចែកជូនថ្នាំពេទ្យ ដល់ប្រជាពលរដ្ឋដោយឥតគិតថ្លៃបានប្រមាណ៥ពាន់នាក់ ។

​ក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី ចំនួន ៤ ៦០១នាក់ បានចុះបេសកកម្មតាម​ការឧទ្ទេសនាមរបស់គណៈកម្មកាចំពោះកិច្ចចាក់វ៉ាក់សាំងបង្ការជំងឺកូវីដ-១៩ ដោយឥតគិតថ្លៃ និងស្ម័គ្រចិត្តឥតគិតថវិកាបេសកកម្ម គិតតាំងពីចាប់ផ្តើមចាក់វ៉ាក់សាំងដំបូងពីខែមីនា ឆ្នាំ២០២១ មកដល់បច្ចុប្បន្នជូនប្រជាពលរដ្ឋតាមមូលដ្ឋាននានាក្នុង ២៥ ខេត្ត-រាជធានី ដោយចាក់វ៉ាក់សាំង​បានចំនួនជាង ១០លានដូស ហើយក្រុមការងារកំពុងតែបន្តស្ម័គ្រចិត្តចូល​រួមយុទ្ធនាការ​ចាក់​វ៉ាក់​សាំង​បង្កាកូវីដ-១៩ ក្នុងក្របខណ្ឌទូទាំងប្រទេស សម្រាប់ដូសទី១ ដូសទី២ ដូសទី៣ ដូសទី៤ ដូសទី៥ និងដូសទី៦ ដោយឥតគិតថ្លៃ និងស្ម័គ្រចិត្តឥតគិតថវិកាបេសកកម្ម ក្នុង ២៥ ខេត្ត-រាជ​ធានី៕

អត្ថបទ៖ គឿនវេត