​ឯកឧត្តម ហ៊ុន ម៉ាណែត ​សម្រេចជួយក្មេងប្រុសលក់ផ្កា រុន ភារម្យ ឱ្យចូលរៀន​ដល់ចប់ថ្នាក់

ឯកឧត្តម ហ៊ុន ម៉ាណែត មានប្រសាសន៍ថា ក្រុមការងាររបស់ឯកឧត្តមនៅខេត្តបាត់ដំបងបានស្វែងរក​ឃើញក្មេងប្រុស រុន ភារម្យ ហៅអារ៉យ ដែលជាអ្នកលក់ផ្កាដែលលោកបានជួបនៅ​ខេត្តបាត់ដំបងកាលពីសប្ដាហ៍មុន និងក្រុមគ្រួសារ ហើយបានយកជំនួយខ្លះ​ផ្តល់ជូនគ្រួសារមួយនេះមួយជំហាន ខណៈលោកសន្យាថានឹងរកពេលវេលាជួបពួកគាត់នៅពេលក្រោយ។

តាមរយៈហ្វេសប៊ុកផេកផ្លូវការណ៍របស់ឯកឧត្តម ហ៊ុន ម៉ាណែត បង្ហោះនៅថ្ងៃទី ២០ ខែឧសភា បានសរសេរថា៖ «កាលពីល្ងាចមិញនេះ ឆ្លៀតពេលដែលខ្ញុំត្រូវទៅបំពេញការងារនៅខេត្តក្បែរនោះ ខ្ញុំបានឱ្យក្រុម​ការងារ​នាំក្មួយប្រុស និងក្រុមគ្រួសាររបស់គាត់មកជួបខ្ញុំដើម្បីស្វែងយល់​បន្ថែមពីស្ថានភាពគ្រួសារ​របស់គាត់និងពិនិត្យលទ្ធភាពក្នុងការជួយពួកគាត់»។

ឯកឧត្តមបានកោតសរសើរឪពុកម្តាយរបស់ រុន ភារម្យ ដែលទោះជាមានជីវភាពមិនសូវធូរធារ ប៉ុន្តែអប់រំកូនៗបានល្អឱ្យចេះខិតខំប្រឹងប្រែង តស៊ូ និងប្រកាន់ខ្ជាប់នូវគុណធម៌ សីលធម៌ និងអំពើសុចរិតតាំងពីតូចៗ។

លោកក៏សូមកោតសរសើរ​ក្មួយប្រុស រុន ភារម្យ ដែលមានទឹកចិត្តក្លាហាន មានការទទួលខុសត្រូវ និងចេះជួយទុក្ខ​ធុរៈឪពុកម្តាយតាំងពីអាយុ ៦ឆ្នាំម៉្លេះ (ឥឡូវក្មួយមានអាយុ ១៣ឆ្នាំ)។

បន្ទាប់ពីស្វែងយល់ពីស្ថានភាពគ្រួសាររបស់គាត់ ខ្ឯកឧត្តមបានសម្រេច៖

១.ជួយផ្តល់មធ្យោបាយនិងលទ្ធភាពអោយឪពុកនិងម្តាយរបស់គាត់កែសម្រួលមុខរបរអោយបានកាន់តែប្រសើរ ដើម្បីបង្កើនចំណូលក្នុងគ្រួសារ

២. ជួយក្មួយប្រុស រុន ភារម្យ និងប្អូនស្រីរបស់គាត់ អោយបានចូលរៀននៅសាលាដែលពួកគាត់ចង់រៀន រហូតដល់ចប់ថ្នាក់ទី១២ និងគ្រោងផ្តល់អាហារូបករណ៍សម្រាប់បន្តរៀនសូត្រនៅថ្នាក់ឧត្តមសិក្សាទៀត ដើម្បីក្មួយៗអាចកសាងសមត្ថភាពរបស់ខ្លួន និងចូលរួមជួយគ្រួសារនិងសង្គមជាតិយើងនៅពេលអនាគត៕