ព័ត៌មានជាតិ

លម្អិតករណីជនជាតិចិនម្នាក់ធ្លាក់ពីលើអគារកម្ពស់២២ជាន់

Published

1 month ago

January 26, 2021

បុសរសជនជាតិចិនម្នាក់បានស្លាប់ភ្លាមៗ ក្រោយពេលធ្លាក់ពីលើអគារជាន់ទី១៣ នៃអគារកម្ពស់២២ជាន់ ។

ហេតុការដ៏គួរឲ្យរន្ធត់នេះ បានកើតឡើងនៅវេលាព្រឹកម៉ោងប្រមាណ៧និង១៥នាទីថ្ងៃទី២៦ ខែមករា ឆ្នាំ២០២១ ត្រង់ចំណុចភូមិលេខ១ សង្កាត់លេខ៣ ក្រុងព្រះសីហនុ ខេត្តព្រះសីហនុ (តំបន់កំពេញ)។

ពាក់ព័ន្ធទៅនឹងហេតុការនេះ បើតាមសាក្សីរស់នៅក្បែរកន្លែងកើតហេតុ បាននិយាយប្រាប់ឲ្យដឹងថា នៅ មុនពេលកើតហេតុគេឃើញជនរងគ្រោះនៅមុខបន្ទប់ជាន់ទី១៣ នៃអគារកម្ពស់២២ជាន់។មួយសន្ទុះមក ស្រាប់តែជនរងគ្រោះបានធ្លាក់មកដល់ដីស្លាប់បាត់ទៅហើយ ដោយមិនដឹងថាជនរងគ្រោះលោតពីលើអគារសម្លាប់ខ្លួន ឬរអិលធ្លាក់ជើងធ្លាក់ដោយខ្លួនឯងនោះទេ។ ជនរងគ្រោះបានធ្លាក់ពីជាន់១៣ មកបុកទម្លុះដំបូលបន្ទប់ទឹកផ្ទះប្រជាពលរដ្ឋដែលជាប់អគារនោះធ្លាក់ដល់ដី បណ្តាលឲ្យជើងជនរងគ្រោះម្ខាងត្រូវបានដាច់ចេញពីដងខ្លួនស្លាប់ភ្លាមៗ នៅក្នុងថ្លុកឈាមកន្លែងកើតហេតុតែម្តង ។

ដោយឡែកសម្រាប់ បងស្រីជាម្ចាស់ផ្ទះកើតហេតុបាននិយាយប្រាប់ឲ្យដឹងផងដែរថា នៅមុនពេល កើតហេតុ រូបគាត់បានចូលបន្ទប់ទឹក លុះក្រោយមករូបគាត់បានចេញពីបន្ទប់ទឹកប្រមាណ១នាទី ក៏ស្រាប់តែកើតហេតុជនរងគ្រោះធ្លាក់ចូលក្នុងបន្ទប់ទឹកផ្ទះរបស់គាត់តែម្តង។ ជាមួយគ្នានេះបងស្រី ម្ចាស់ផ្ទះក៏បានបញ្ជាក់ផងដែរថា នេះចាត់ទុកជាសំណាងរបស់គាត់ហើយ ដែលបានចេញមុនពេលកើតហេតុបានបន្តិច តែបើសិនជារូបគាត់ នៅក្នុងបន្ទប់ទឹកច្បាស់ជាត្រូវជនរងគ្រោះធ្លាក់សង្កត់ពីលើស្លាប់ជាមួយនឹងជនរងគ្រោះដែរហើយ។

មន្ត្រីសមត្ថកិច្ច ប៉ុស្តិ៍រដ្ឋបាលសង្កាត់លេខ៣បានឲ្យដឹងថា ជុំវិញបញ្ហារខាងលើនេះ សមត្ថកិច្ចមិនទាន់កំណត់បានពីមូលហេតុ នៃការធ្លាក់ស្លាប់របស់ជនរងគ្រោះនៅឡើយទេ ប៉ុន្តែករណីនេះ ភ្លាមៗជនជាប់សង្ស័យចំនួន៣នាក់ ក្នុងនោះស្រី២នាក់ (ជនជាតិចិនទាំងអស់)ដែលជាមនុស្សដេកបន្ទប់រួមគ្នាជាមួយជនរងគ្រោះ ត្រូវបានកម្លាំងសមត្ថកិច្ចនៃស្នងការដ្ឋាននគរបាលខេត្តព្រះសីហនុ ធ្វើការឃាត់ខ្លួននាំយកទៅស្នងខេត្តដើម្បីសាកសួរ។

គួរបញ្ជាក់ផងដែរថា អគារកើតហេតុកម្ពស់២២ជាន់ខាងលើនេះ ជារបស់ក្រុមហ៊ុនជនជាតិចិនដោយ អគារមួយនេះ បានសាងសង់រួចរាល់ប្រមាណ៩០ភាគរយហើយ ដោយក្នុងនោះមានអគារចំនួន៣ជាន់ ត្រូវបានគេរៀបចំឲ្យមានមនុស្សស្នាក់នៅ និងបម្រើការងារផ្សេងៗ បណ្ដើរៗហើយ និងមួយចំនួនកំពុងធ្វើការរៀបចំបំពាក់គ្រឿងសង្ហារឹមនៅក្នុងអគារនិងលាបថ្នាំផ្អែកខាងក្រៅអគារប៉ុណ្ណោះ៕

អត្ថបទ ៖ កោះពស់