ព័ត៌មានជាតិ

ជំពាក់លុយមិនសង សមត្ថកិច្ចចាប់ខ្លួនថៅកែបូមខ្សាច់ស្ពានព្រែកសំរោងទៅតុលាការ

បានផុស

៣ years មុន

នៅ

ថ្ងៃពុធ ២៧ មករា ២០២១

ដោយ

សមត្ថកិច្ចសង្កាត់ព្រែកថ្មី ខណ្ឌច្បារអំពៅ នៅថ្ងៃទី ២៦ ខែមករា ឆ្នាំ ២០២១ បានធ្វើការឃាត់ខ្លួនជនសង្ស័យមួយរូប ពីបទរំលោភលើសេចក្តីទុកចិត្ត និងបទក្លែងឯកសារសាធារណៈ។

បុរសជនសង្ស័យ មានឈ្មោះ ឡុង ហ្វីលីប អាយុ៤២ឆ្នាំ មានទីលំនៅក្នុងភូមិបោះអង្កាញ់ ផ្លូវលេខ១១ សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ។

តាមប្រពភពព័ត៌មានពីសមត្ថកិច្ចសង្កាត់ព្រែកថ្មី បុរសជនសង្ស័យជាថៅកែដេប៉ូបូមខ្សាច់ល្បីឈ្មោះ នៅគល់ស្ពានព្រែកសំរោង សង្កាត់ព្រែកថ្មី ខណ្ឌច្បារអំពៅ ត្រូវបានសមត្ថកិច្ចចាប់ខ្លួនបញ្ជូនទៅសាលាដំបូងរាជធានីភ្នំពេញ ពាក់ព័ន្ធបទល្មើស មិនបំពេញកាតព្វកិច្ចចំពោះឧបករណ៍ដែលអាចជួញដូរបាន បទរំលោភលើទំនុកចិត្ត និងបទក្លែងឯកសារសាធារណៈ ។

សេចក្តីរាយការណ៍ឲ្យដឹងថា ការចាប់ខ្លួនជនសង្ស័យ រូបនេះដោយសាតែលោក គេចវេសមិនចូលខ្លួនតាមការកោះហៅរបស់សមត្ថកិច្ច និងដីកាបញ្ជាអោយចូលខ្លួនរបស់ព្រះរាជអាជ្ញាអមតុលាការ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជនសង្ស័យ ឈ្មោះ ឡុង ហ្វីលីប បានសារភាពថា ខ្លួនបានបើកក្រុមហ៊ុនឈ្មោះ MPL ធ្វើអាជីវកម្មបូមខ្សាច់នៅចំណុចគល់ស្ពានព្រែកសំរោង ក្នុងសង្កាត់ព្រែកថ្មី ខណ្ឌច្បារអំពៅ ហើយនៅក្នុងឆ្នាំ២០១៧ ខ្លួនបានខ្ចីប្រាក់ពីប្អូនធម៌ឈ្មោះ សាយ សេងថៃ ចំនួន២ម៉ឺនដុល្លារ ដើម្បីយកទៅបង់ពន្ធរថយន្តដែកលបញ្ជាទិញពីឌូបៃនាំចូលមកប្រទេសកម្ពុជា ប៉ុន្តែប្រាក់នេះបង់មិនគ្រប់ទើបខ្លួនសុំខ្ចីបន្ថែមចំនួន៣ម៉ឺនដុល្លារទៀត ដោយការខ្ចីម្ដងៗ ខ្លួនបានចេញសែកតម្កល់ និងដាក់ប្លង់ដីដើម្បីធានាលើបំណុល។

ក្នុងនោះប្រាក់ដែលត្រូវបង់ពន្ធចំនួន៤៨ ០០០ដុល្លារលើរថយន្ត១២គ្រឿងដែលនាំចូល មានរថយន្តបាឡែន រថយន្តព្រូស និងរថយន្តលុចស៊ីស។ បន្ទាប់មកខ្លួនបានលក់រថយន្តទាំងនោះអោយក្រុមហ៊ុនមួយចំនួន ប៉ុន្តែក្រុមហ៊ុនទាំងនោះស្ទះលុយបង្វិលប្រាក់សងមកខ្លួនមិនទាន់ពេលវេលាដែរ ទើបខ្លួននៅជំពាក់ប្អូនធម៌ឈ្មោះ សាយ សេងថៃ ដល់សព្វថ្ងៃ ៕