ព័ត៌មានជាតិ

Updete៖ អគ្គិភ័យនៅសៀមរាបឆេះរាលដាលផ្ទះ២ខ្នង និងសាលារៀនមួយខ្នង

បានផុស

៣ years មុន

នៅ

ថ្ងៃសុក្រ ២៩ មករា ២០២១

ដោយ

សមត្ថកិច្ចបានឲ្យដឹងថា ផ្ទះអ្នកលក់កង់ដែលចាក់សោរទុកចោល ត្រូវបានអគ្គិភ័យឆាបឆេះទ្រព្យសម្បត្តិអស់ទាំងស្រុង និងបានរាលឆ្លងទៅឆេះផ្ទះជិតខាង១ខ្នងនិងសាលារៀន១ខ្នងផងដែរ។

លោកវរសេនីយ៍ឯក ទេព ចាន់ណា អធិការនគរបាលស្រុកសូទ្រនិគម បានឲ្យដឹងថា ករណីអគ្គិភ័យនេះ បានកើតឡើងនៅវេលាម៉ោង១២និង៣០នាទីរសៀលថ្ងៃទី២៩ ខែមករាឆ្នាំ២០២១ នៅចំណុចភូមិព្រះត្រពាំង ឃុំដំដែក ស្រុកសូទ្រនិគម ខេត្តសៀមរាប តាមបណ្តោយផ្លូវជាតិលេខ៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបន្តថា ករណីនេះបណ្ដាលឲ្យខូចខាតផ្ទះ១ខ្នងទំហំ៩x២៥ម៉ែត្រ ថ្មក្រោមឈើលើ និងសម្ភារៈប្រើប្រាស់ក្នុងផ្ទះទាំងស្រុង (ផ្ទះផ្ទុកកង់និងគ្រឿងកង់សម្រាប់លក់ច្រើនរយគ្រឿង) និងខូចខាតផ្ទះនៅក្បែរ១ខ្នង(ខូច២០%) និងអាគារសាលារៀនបឋមសិក្សា៧មករា១ខ្នង (១៥%) និងមិនមានមនុស្សរងរបួសទេ ។

លោកបន្តថា ម្ចាស់ផ្ទះឈ្មោះ សរ ចំរើន ភេទប្រុស អាយុ៦៩ឆ្នាំ មានទីលំនៅភូមិដំដែកផ្សារ ឃុំដំដែក ស្រុកសូទ្រនិគម ខេត្តសៀមរាប ។

តាមការសន្និដ្ឋានជាបឋមគឺ បណ្ដាលមកពីឆ្លងចរន្តអគ្គិសនី ព្រោះម្ចាស់មិននៅទាំងអស់គ្នា ទៅលក់កង់នៅផ្សារបាត់ ផ្ទះបិតទ្វារចោល។ លោកបញ្ជាក់ទៀតថា លទ្ធផលកិច្ចប្រតិបត្តិការរបស់កម្លាំងសមត្ថកិច្ច បានប្រើប្រាស់រថយន្តពន្លត់អគ្គិភ័យនគរបាល៣គ្រឿង គឺស្រុកសូទ្រនិគម ១គ្រឿង,ស្រុកប្រាសាទបាគង១គ្រឿង ,ស្រុកជីក្រែង ១គ្រឿង និងរថយន្តដឹកទឹកឯកជន២គ្រឿង កម្លាំងនគរបាល អាវុធហត្ថ និងប្រជាការពារសរុបប្រមាណ៥៥នាក់ ប្រើប្រាស់ទឹកអស់៧ឡាន រហូតដល់ម៉ោង១៤និង៤៥នាទី ទើបរលត់ទាំងស្រុង។

ពលរដ្ឋលើកឡើងថា ករណីឆេះនេះពិតជាលឿនមែន សូម្បីរថយន្តពន្លត់អគ្គិភ័យរបស់អធិការដ្ឋាននគរបាលស្រុកសូទ្រនិគម ដែលមានចម្ងាយតែ៣០០ម៉ែត្រពីទីតាំងកើតហេតុ ក៏មិនអាចជួយពន្លត់ទាន់ដែរ។ ចឹងទេសូមបងប្អូនមេត្តាប្រុងប្រយ័ត្នផង ចំពោះរឿងអគ្គិភ័យនេះ៕

អត្ថបទ ៖ កុសល