អភិបាលរងរាជធានីផ្ដាំឱ្យស្ដ្រី ត្រូវឱ្យតម្លៃខ្លួនឯង បើមិនដូច្នោះសិទ្ធិរបស់នារីកាន់តែរួមតូច

ស្ត្រីក្រោយពីមានគ្រួសារ មានការទទួលខុសត្រូវគ្រប់គ្រងគ្រួសារ និងភាពជាអ្នកដឹកនាំក្នុងគ្រួសាររួចស្រេចទៅហើយ គ្រាន់តែមិនបានប្រើសិទ្ធិភាពជាអ្នកដឹកនាំ និងគ្រប់គ្រងនៅសង្គមខាងក្រៅ។

នៅក្នុងសង្គម នារីមិនត្រូវបន្ទាបខ្លួន គឺត្រូវតែឱ្យតម្លៃខ្លួនឯង បើមិនដូច្នេះទេ សិទ្ធិរបស់ស្ត្រីខ្លួនឯងកាន់តែរួមតូច។
នេះជាការលើកឡើងរបស់លោក កើត ឆែ អភិបាលរងរាជធានីភ្នំពេញ ខណៈលោកអញ្ជើញក្នុងពិធីបើកសិក្ខាសាលាផ្សព្វផ្សាយស្តីពីការពង្រឹងសមត្ថភាពស្ត្រី និងភាពជាអ្នកដឹកនាំនាព្រឹកថ្ងៃទី ៥ ខែធ្នូនេះ នៅសាលារាជធានីភ្នំពេញ។

លោក កើត ឆែ មានប្រសាសន៍ថា៖ ធ្វើជាមនុស្ស ឬជាមន្ត្រីកុំធ្វើសកម្មភាព ដែលក្បត់មនសិការ ឬមនសិការក្បត់សកម្មភាព។ បុរសសុំលុបចោលពាក្យថា នារីដឹកនាំអត់បាន បុរសគួរយល់ថា នារីមានភាពស្មុគស្មាញជាងបុរសទាំងរាងកាយ ទាំងកិច្ចការផ្ទះ ក្នុងនាមជាអ្នកមើលការខុសត្រូវក្នុងគ្រួសារ។

លោក កើត ឆែបន្តថា៖ នៅពេលមានបើកវគ្គបណ្តុះបណ្តាលពាក់ពន្ធ័នឹងស្ត្រី គួរត្រូវបានអញ្ជើញខាងបុរសឱ្យចូលរួមផងដែរព្រោះបុរស ជាតួអង្គពាក់ពន្ធ័នឹងតួនាទី ឬហិង្សាក្នុងគ្រួសារច្រើនដែរដើម្បីឱ្យបុរសបានយល់ដឹងពីតួនាទីនៃភាពជាអ្នកដឹកនាំគ្រួសារ និងសង្គម បើគ្មានបុរសចូលរួមក៏មិនទទួលជោគជ័យដែរ។

ជាមួយគ្នានេះ ការកសាងធនធានមនុស្សជាពិសេសក្នុងជួរស្ត្រី គឺជាកត្តាដែលមិនអាចខ្វះបានដើម្បីលើកកម្ពស់សម​ភាព​យេនឌ័រ និងការពង្រីកភាពអង់អាចដល់ស្ត្រី ក្នុងន័យធានាការចូលរួមបានពេញលេញក្នុងភាពជាអ្នកដឹកនាំ និងការធ្វើសេចក្តីសម្រេចចិត្ត។

ឈរលើមូលដ្ឋាននេះ ដូចអ្វីដែលបងប្អូនសិក្ខាកាមបានដឹងរួចហើយថា ប្រទេសកម្ពុជាបានប្រកាន់យកគោលការណ៍មាតាធិបតេយ្យ ចាប់តាំងពីការកកើតរដ្ឋដំបូង មានន័យថាយើងប្រកាន់ខ្ជាប់នូវវប្បធម៌គោរព និងឱ្យតម្លៃទៅលើស្ត្រី ក្នុងការដឹកនាំគ្រួសារ សហគមន៍ និងសង្គមជាតិទាំងមូលរួចទៅហើយ៕

អត្ថបទ៖ ស្រីរ័ត្ន