ព័ត៌មានជាតិ

បើជិះកាត់រង្វង់មូលស្រុកបន្ទាយស្រី កុំភ្លេចឆៀងចូលលេងសួនផ្កាកូស្មូ

បានផុស

៤ ខែ មុន

នៅ

ថ្ងៃសុក្រ ១៩ កុម្ភៈ ២០២១

ដោយ

ប្រសិនបើយើងធ្វើដំណើរទៅកម្សាន្តរមណីយដ្ឋានភ្នំគូលែន ឬភ្នំក្បាលស្ពាន តាមផ្លូវជាតិលេខ៦៧ គេនឹងបានប្រទះឃើញរង្វង់មូលស្រុកបន្ទាយស្រី ទំហំប្រមាណជា១គីឡូម៉ែត្រ មានផ្កាកូស្មូ ដ៏ស្រស់ស្អាតរីកបង្អួតភ្នែកភ្ញៀវទេសចរជាតិនិងអន្តរជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឃឹម ហ្វីណង់ អភិបាលស្រុកបន្ទាយស្រី បានមានប្រសាសន៍ ប្រាប់អ្នកកាសែតថា ការរៀបចំជាសួនផ្កានៅទីនេះ ក្នុងគោលបំណងលើកកម្ពស់សោភ័ណភាពរបស់ស្រុកផង និង លើកកម្ពស់វិស័យទេសចរណ៍ក្នុងស្រុកផង ព្រោះថារង្វង់មូលនេះ ក្រោយពីធ្វើរួចមក ត្រូវបានគេទុកចោល មិនបានរៀបចំអភិវឌ្ឍន៍អ្វីនោះទេ ដែលធ្វើឲ្យទីនេះបានក្លាយទៅជាកន្លែងចោលសំរាម និង កន្លែងចងគោទុកឲ្យស៊ីស្មៅ។ លោកបញ្ជាក់បន្ថែមថា ក្នុងអំឡុងខែធ្នូ ឆ្នាំ២០២០ អាជ្ញាធរស្រុកបានចាប់ផ្ដើមធ្វើការរៀបចំកែលម្អរង្វង់មូលនេះ ឲ្យក្លាយជាសួនផ្ការង់ចាំភ្ញៀវទេសចរ ដោយព្រោះគ្រាប់ផ្កាកូស្មូ ដែលជាប្រភេទផ្កានាំចូលពីក្រៅប្រទេស វាមានអាយុ២ខែសម្រាប់ការលូតលាស់បញ្ចេញផ្កាពណ៌ចម្រុះ និងអាយុកាលនៃការបញ្ចេញសម្រស់របស់វា មានរយៈពេល១ខែ ដែលនៅខែកុម្ភៈ ឆ្នាំ២០២១ ផ្កាកូស្មូនេះ បានចាប់ផ្ដើមបញ្ចេញផ្កាពណ៌ចម្រុះ ដូច្នេះ ពេលនេះ មានភ្ញៀវទេសចរណ៍បានទៅទស្សនា ដើម្បីផ្ដិតយករូបភាពស្អាតៗនោះប្រមាណជាង១ម៉ឺននាក់ហើយ ។

លោកបន្តទៀតថា ជាគោលដៅបន្ត រដ្ឋបាលស្រុកនឹងព្យាយាមស្វែងរកពូជផ្កា នៅក្នុងតំបន់យកមកដាំ ទៅតាមរដូវរបស់ប្រភេទផ្កា ដូចជា ផ្កាផ្គរលាន់ជាដើម ដូច្នេះក្នុងឱកាសនេះ សូមសំណូមពរដល់ពលរដ្ឋ ក៏ដូចជាភ្ញៀវជាតិ អន្តរជាតិ ដែលបានទៅទស្សនានៅទីនោះ ធ្វើយ៉ាងណា ជួយថែរក្សាអនាម័យ បរិស្ថាន ជាពិសេស កុំដើរជាន់ផ្កាដើម្បីថតយករូបភាពស្អាតៗតែម្នាក់ ព្រោះសួនផ្កានេះ គឺជាសួនផ្កាសាធារណៈ ដែលយើងទាំងអស់ជាពលរដ្ឋខ្មែរ ត្រូវតែចូលរួមថែរក្សាទាំងអស់គ្នាផងដែរ។ ជាមួយគ្នានោះដែរ ភ្ញៀវទេសចរជាច្រើនកុះករ ដែលធ្វើដំណើរតាមផ្លូវជាតិលេខ៦៧ តែងតែមិនភ្លេចឆៀងចូលទៅថតលេងកម្សាន្តទុកជាអនុស្សាវរីយ៍៕

អត្ថបទ៖ កុសល

សូមចុចអាន៖ ការវិនិយោគលើចម្ការឈើដាំ ផ្តល់ផលប្រយោជន៍ជាច្រើន សម្រាប់បរិស្ថាន និងធនធានធម្មជាតិ