បុរសម្នាក់ឆ្លងជំងឺកូវីដ១៩ ខណៈ៦៥០នាក់កំពុងធ្វើចត្តា​ឡីស័កក្នុងខេត្តកណ្តាល

នៅខេត្តកណ្តាល មានករណីវិជ្ជមាននៅលើខ្លួនបុរសម្នាក់ ដែលធ្វើការនៅក្លឹបកម្សាន្ត N8 ដែលមានជាប់ពាក់ព័ន្ធនិងព្រឹត្តិការណ៍សហគមន៍ ២០ កុម្ភៈ នឹងបានធ្វើចត្តាឡីស័កមនុស្ស ៦៥០ នាក់។

លោក ម៉ៅ ភិរុណ ប្រធានក្រុមប្រឹក្សាខេត្តកណ្តាលបានឲ្យដឹងនៅក្នុង សន្និសីទសារព័ត៌មានស្តីពី «វឌ្ឍនភាពមូលដ្ឋាន ឃុំ សង្កាត់ និងទិសដៅការងារបន្ដរបស់ខេត្តកណ្ដាល» នៅព្រឹកថ្ងៃច័ន្ទទី ២២ ខែកុម្ភៈនេះថា ខេត្តកណ្តាលមានមណ្ឌលចត្តាឡីស័ក ១៨ កន្លែង ដែលមានកម្រិត១ មាន១២កន្លែង កម្រិត២ មាន ៦ កន្លែង។

លោកប្រាប់ថា”បច្ចុប្បន្នមានមនុស្សទៅធ្វើចត្តាឡីស័កនៅពញ្ញាឮ មាន១នាក់នៅមន្ទីរពេទ្យបង្អែកស្រុក ,នៅមណ្ឌល​ចត្តាឡីស័កកណ្តាលស្ទឹង១នាក់នៅមន្ទីរពេទ្យបង្អែកស្រុក,នៅខ្សាច់កណ្តាលមានចំនួន ១១ នាក់នៅមន្ទីរពេទ្យបង្អែកនិង នៅតាមផ្ទះចំនួន ៣១៧ នាក់ ,នៅស្រុកល្វាឯមមាន២១ នៅមណ្ឌលចត្តាឡីស័កនៅវិទ្យាល័យពាមឧកញ្ញាអ៊ុង និង ១៨៣ នាក់នៅតាមផ្ទះ ,នៅស្រុកកៀនស្វាយមានចំនួន ២៨ នាក់នៅមណ្ឌលចត្តាឡីស័កក្នុងសាលាបឋមសិក្សាគគីរ និង នៅក្រុងតាខ្មៅមាន៧៧ នាក់កំពុងធ្វើចត្តាឡីស័កនៅសាលាបឋមសិក្សាព្រែកតាពៅ”។

​ក្រសួងសុខាភិបាលបានប្រកាសពីការរកឃើញករណីវិជ្ជមានកូវីដ១៩ ចំនួន៣៥ករណីថ្មីដោយក្នុងនោះមាន៣១នាក់ជាអ្នកឆ្លងក្នុងសហគមន៍ ដែលធ្វើឱ្យចំនួនអ្នកឆ្លងកូវីដ១៩ក្នុងព្រឹត្តិការណ៍សហ​គមន៍​២០កុម្ភៈកើនដល់៧៦នាក់។​

គិតត្រឹមព្រឹកថ្ងៃទី២២ខែកុម្ភៈនេះកម្ពុជារកឃើញអ្នកមានកូវីដ១៩ចំនួន៥៦៨នាក់ដែលក្នុងនោះ​​ព្យាបាល​ជា​សះស្បើយ៤៧៥នាក់និងកំពុងសម្រាកព្យាបាលមាន៨៣នាក់៕

អត្ថបទ៖ណារី