រកឃើញករណីវិជ្ជមានកូវីដលើស្ត្រីវៀតណាម២នាក់នៅខេត្តស្វាយរៀង

ស្ត្រីជនជាតិវៀតណាម ២នាក់ រកឃើញវិជ្ជមានកូវីដ១៩ នៅខេត្តស្វាយរៀងពាក់ព័ន្ធព្រឹត្តិការណ៍សហគមន៍២០កម្ភៈ។

ប្រធានមន្ទីរសុខាភិបាលខេត្តស្វាយរៀង លោក កែរ រដ្ឋា បានឲ្យដឹងថា ស្ត្រីជនជាតិ​វៀត​ណាម​អាយុ​២៧​​ឆ្នាំ និងម្នាក់ទៀតអាយុ២៨ឆ្នាំ មានអាស័យដ្ឋានស្នាក់ អាផាតមេនមួយ(Apartment) នៅខណ្ឌចំការមន​រាជធានីភ្នំពេញ​ត្រូវ​បានរកឃើញវិជ្ជមានកូវីដ១៩នៅខេត្តស្វាយរៀងពាក់ព័ន្ធនឹងព្រឹត្តិការណ៍សហគមន៍២០កម្ភៈ។

លោកបានបន្តថាស្ត្រីវៀតណាមទាំងពីរនាក់នេះបានធ្វើដំណើរពីភ្នំពេញដោយជិះតាក់ស៊ីទៅបាវិតក្នុង​គោលបំណងទៅកាន់ប្រទេសវៀតណាម។

ប៉ុន្តែដោយសារពួកគាត់គ្មានប័ណ្ណបញ្ជាក់ពីការធ្វើតេស្តកូវីដ១៩ខាងភាគីវៀតណាមមិនអនុញ្ញាតឲ្យចូលទើបក្រុម​ការ​ងារសុខាភិបាលខេត្តបានយកពួកគាត់មកធ្វើចត្តាឡីស័កនិងយកសំណាកនៅសណ្ឋាគារមួយ​នៅខេត្តស្វាយរៀង។ លោកបានបន្តទៀតថាជាលទ្ធផលនៅថ្ងៃនេះស្ត្រីជនជាតិវៀតណាមទាំងពីរនាក់នោះមានវិជ្ជមានកូវីដ១៩ដែលបច្ចុប្បន្ននេះកំពុងដាក់ឲ្យសម្រាកព្យាបាលនៅមន្ទីរពេទ្យបង្អែកស្វាយជ្រំ។

លោកបានបន្ថែមថាស្ត្រីជនជាតិវៀតណាមនោះមិនមែនឆ្លងនៅស្វាយរៀងទេអាចឆ្លងនៅភ្នំពេញ។ យ៉ាងណាក៏ដោយលោកបានបន្ថែមទៀតថាក្រុមជំនាញកំពុងធ្វើការស្រាវជ្រាវពីប្រភពចម្លងទៅលើ​ស្ត្រី​ជនជាតិ​​វៀតណាម​​​ទាំង​ពីរ​នាក់​នោះថា តើឆ្លងមកពីណាឲ្យពិតប្រាកដដើម្បីងាយស្រួលក្នុងការស្វែងរកអ្នកជាប់ពាក់ព័ន្ធផ្ទាល់និងប្រយោលដើម្បីស្រាវ​ជ្រាវឲ្យបានទាន់ពេលវេលាទប់ស្កាត់ការចម្លងចូលសហគមន៍ទ្រង់ទ្រាយធំ។

លោកបានបញ្ជាក់ថាជាមឋមនេះក្រុមការងារបានយកសំណាកអ្នកពាក់ព័ន្ធជាមួយស្ត្រីទាំងពីរនាក់នោះចំនួន២៥នាក់រួមទាំងជនជាតិវៀតណាមស្នាក់នៅសណ្ឋាការ៧នាក់សមត្ថកិច្ច៧នាក់និងអ្នកលក់ដូរផ្សេងៗទៀតទៅពិនិត្យកូវីដ១៩និងបន្តស្រាវជ្រាវបន្ថែមទៀត៕

អត្ថបទ៖សំអឿន