អ្នកនាំពាក្យ ៖ ថ្នាក់ដឹកនាំក្រសួងចុះតាមរោងចក្រក្តាប់ពីតម្រូវការ និងសំណូមកម្មករ ដើម្បីដោះស្រាយឱ្យបានទាន់ពេលវេលា

អ្នកនាំពាក្យ​ក្រសួង​ការងារ​ និង​បណ្តុះបណ្តាល​វិជ្ជាជីវៈ​ បានឱ្យដឹងថា​ ការដែល​ថ្នាក់ដឹកនាំ​ក្រសួង​ចុះ​តាម​រោងចក្រ​នានា​នៅក្នុង​រាជធានី​ភ្នំពេញ​ដើម្បី​ក្តាប់​ពី​តម្រូវការ​និង​សំណូម​របស់​បងប្អូន​កម្មករ-និយោជិត​ ដើម្បី​ដោះស្រាយ​ឱ្យបាន​ទាន់ពេលវេលា ​សំដៅ​ធ្វើយ៉ាងណា​ឱ្យ​និយោជក​ និង​កម្មករ-និយោជិត​មាន​ភាព​សុខដុម​នឹង​គ្នា ​និង​បង្កើន​ច្រវាក់​ផលិតកម្ម​កាន់តែ​ប្រសើរឡើង​បន្ថែមទៀត។

នៅក្នុង​រយៈពេល​ប៉ុន្មាន​ថ្ងៃនេះ លោក ហេង ​សួរ រដ្ឋមន្ត្រីក្រសួង​ការងារ​ និង​បណ្តុះបណ្តាល​វិជ្ជាជីវៈ បាន​ចាត់​បញ្ជូន​ថ្នាក់ដឹកនាំ​ អញ្ជើញ​ចុះ​ជួប​សំណេះសំណាល​ជាមួយ​តំណាង​និយោជក និង​កម្មករ-និយោជិត​នៅ​រោងចក្រ​មួយចំនួន​ស្ថិតក្នុង​សង្កាត់​កំបូល ខណ្ឌ​កំបូល រាជធានី​ភ្នំពេញ ដើម្បី​ពិនិត្យមើល​ស្ថានភាព​ការងារ និង​ទ​ទួល​ទាន​អាហារ​ថ្ងៃត្រង់​ជាមួយ​​កម្មករ-និយោជិត។

លោក កត្តា អ៊ន រដ្ឋលេខាធិការ​ និង​ជា​អ្នកនាំពាក្យ​ក្រសួង​ការងារ ​និង​បណ្តុះបណ្តាល​វិជ្ជាជីវៈ ​បាន​មានប្រសាសន៍​នៅ​ព្រឹក​ថ្ងៃទី​ ២៥ ​កក្កដា​ នេះ​ថា ​«ការដែល​មន្ត្រីជាន់ខ្ពស់​ក្រសួង​ចុះ​តាម​រោងចក្រ​នេះ​ទី​១ អនុវត្ត​ទៅតាម​ចង្អុលបង្ហាញ​របស់​រាជ​រដ្ឋាភិបាល​ដឹកនាំ​ដោយ ​សម្តេច​ធិបតី ​ហ៊ុន​ ម៉ា​ណែ​ត តែងតែ​យកចិត្តទុកដាក់​ពី​សុខទុក្ខ​របស់​កម្មករ-និយោជិត ​ក៏ដូចជា​និយោជក​ ព្រោះថា​អ្វីដែល​លោក​ចង់បាន​គឺ​ភាព​សុខដុមរមនា​នៅ​កន្លែង​ធ្វើ​ការងារ​។​ មានន័យថា​រោងចក្រ​មួយ​ជា​សហគមន៍​សុខសាន្ត​មួយ​»។

លោក​បាន​បន្ត​ថា ទី​២ លោក​រដ្ឋមន្ត្រីក្រសួង​ការងារ ​បាន​អនុវត្ត​នូវ​គោលការណ៍​ការសួរសុខទុក្ខ ក៏ដូចជា​ពិសា​អាហារ​ជាមួយ​កម្មករ ដើម្បី​ពិនិត្យ​ពី​កន្លែងធ្វើការ លក្ខខណ្ឌ​ការងារ និង​អត្ថប្រយោជន៍​ផ្សេងៗ ចំពោះ​កម្មករ-និយោជិត និង​ក្តាប់​ពី​តម្រូវការ និង​សំណូម​របស់​កម្មករ ដើម្បី​ដោះស្រាយ​ជូន​កម្មករ​ឱ្យបាន​ទាន់ពេលវេលា និង​ទី​៣​ ក្រសួង​ក៏​ពិនិត្យមើល​ពី​ច្រវាក់​ផលិតកម្ម​នៅតាម​រោងចក្រ​ និង​ជួបពិភាក្សា​ជាមួយ​និយោជក​អំពី​ការគ្រប់គ្រង​ និង​ការប្រព្រឹត្តិទៅ​របស់​សហគ្រាស ដើម្បី​ធ្វើ​យ៉ាងណា​ឱ្យ​និយោជក​ និង​កម្មករ-និយោជិត​មាន​ភាព​សុខដុម​នឹង​គ្នា​ បំពេញការងារ​តាមច្បាប់ ​និង​ពង្រីក​ច្រវាក់​ផលិតកម្ម ដើម្បី​នាំចេញ​ទំនិញ​ទៅ​ក្រៅ​ប្រទេស៕

អត្ថបទ ៖ សំអឿន