ថ្នាល «បណ្តុះកូនឈើ» ខ្នាតធំទី១ នៅកម្ពុជា សម្រេចការសាងសង់បាន ២០%

គិតមកទល់ពេលនេះ ថ្នាលបណ្តុះកូនឈើថ្នាក់តំបន់ដំបូងគេនៅកម្ពុជា​ ដែលស្ថិតនៅឃុំព្រះធាតុ ស្រុកអូររាំងឪ ខេត្តត្បូងឃ្មុំ សម្រេចសាងសង់​បាន២០%។

ក្នុងអំឡុងពេលចុះពិនិត្យការដ្ឋានសាងសង់នៅថ្ងៃទី០៨ ខែតុលា ឆ្នាំ២០២៤ នេះ លោក អ៊ាង សុផល្លែត រដ្ឋមន្ត្រី ក្រសួង​បរិស្ថាន បាន​ថ្លែង​ថា ថ្នាលបណ្តុះកូនឈើខ្នាតធំនេះ បានបំពាក់​ប្រព័ន្ធស្រោចស្រព​ដោយ​ស្វ័យប្រវត្ត ដើរ​ដោយថាមពលព្រះអាទិត្យ និងហេដ្ឋារចនាសម្ព័ន្ធមួយចំនួនទៀត ដើម្បី​ឱ្យក្លាយជា​ថ្នាលបណ្តុះ​កូនឈើគំរូមួយនៅកម្ពុជា។

លោក​រដ្ឋមន្ត្រីបានបញ្ចាក់ថា «ការសាសង់គ្រោងនឹងឈានទៅបញ្ចប់នាពេលឆាប់ៗខាងមុខ និងចូលរួម​បណ្តុះកូន​ឈើនៅទីនេះ​បានជាង ១ លានដើម ឆ្ពោះ​ទៅ​សម្រេច​តាមផែនការរបស់​រាជរដ្ឋាភិបាល ដែល​មានទស្សនវិស័យ​ប្រែក្លាយកម្ពុជា ជាប្រទេសអព្យាក្រឹតកាបូននៅឆ្នាំ២០៥០»។

ក្នុងពេល​ចុះ​ណែនាំឱ្យក្រុមការងារសាសង់ យកចិត្តទុកដាក់​លើគុណភាព​នៃសំណង់ បង្កើត​ហេដ្ឋារចនាសម្ព័ន្ធ ឆ្លើយតបនឹងភាពបៃតង ដូចជាគម្រោងតំបន់រុក្ខជាតិ ស្រះទឹក សាលសហ​សិក្សា សម្រាប់សិស្ស និស្សិត​​សិក្សាស្រាវជ្រាវផងដែរ លោក រដ្ឋមន្ត្រី​ ក៏​បានអំពាវនាវ​ឱ្យមានការចូលរួម​ពីគ្រប់ភាគីពាក់ព័ន្ធ ជាពិសេស​ពី​ប្រជាពលរដ្ឋទាំងអស់ រួមគ្នា​ដាំដើម​ឈើដាំ​ឱ្យបានច្រើន ក៏ដូចជា​ជួយ​ថែរក្សា​​ការពារ​សម្បត្តិ​ធម្មជាតិ នៅតាម​តំបន់​ការពារ​ធម្មជាតិ និង​កុំកាប់​ដើមឈើ ដើម្បីទុកជាម្លប់ និងទទួលបានខ្យល់បរិសុទ្ធសម្រាប់ដកដង្ហើម។

លោករដ្ឋមន្រ្តី​បាន​គូស​បញ្ជាក់ថា ការដាំដើមឈើ ក៏ជា​ការ​ដាក់​ទុនមួយ​នៅក្នុងការ​ទប់ស្កាត់​​ការ​ប្រែប្រួល​អាកាសធាតុ ធ្វើ​​ឱ្យ​កម្ពុជា​មានភាពបៃតងស្រស់ស្អាត និង​ការ​ជំរុញ​ការ​​លើក​កម្ពស់​​អព្យាក្រឹត​កាបូន។

សូម​បញ្ជាក់ថា ថ្នាល​បណ្ដុះកូន​ឈើថ្នាក់តំបន់ទី១ ក្នុង​ខេត្ត​ត្បូងឃ្មុំសាងសង់​នៅលើផ្ទៃដីទំហំ​ជាង ៣ហិកតា។ បន្ទាប់ពីការបង្កើតថ្នាលបណ្តុះកូនឈើទី១ នេះ ក្រសួងបរិស្ថាន ក៏​និង​រៀបចំថ្នាល​បណ្តុះកូនឈើខ្នាតតំបន់ នៅ​ក្នុង​ខេត្ត​ចំនួន ៤ ទៀត គឺនៅខេត្តមណ្ឌលគិរី សៀមរាប កំពង់ស្ពឺ និងកោះកុង៕