បុរសម្នាក់ប្រាប់ហេតុផលជំពាក់បំណុល មុនពេលចងកសម្លាប់ខ្លួនលា​លោក​នេះ

បុរសវ័យជាង ៥០ ឆ្នាំម្នាក់ បានសម្រេចចិត្តបញ្ចប់ជីវិតខ្លួនឯង ដោយការចងកសម្លាប់ខ្លួននៅលើដើមទៀបក្រោយផ្ទះ ព្រោះតែហេតុផលជំពាក់បំណុលច្រើន គ្មានលទ្ធភាពរកសងគេ។

ករណីនេះបានកើតឡើងនៅភូមិខ្លាងាប់ ឃុំទួលពង្រ ស្រុកម៉ាឡៃ ខេត្តបន្ទាយមានជ័យ កាលពីវេលាម៉ោង ៨ ព្រឹកថ្ងៃទី ១៦ ខែមីនា ឆ្នាំ ២០២១។ សពបុរសជនរងគ្រោះ ឈ្មោះ ង៉ូវ សុផល អាយុ ៥៤ ឆ្នាំ រស់នៅភូមិកើតហេតុ។

តាមការបំភ្លឺរបស់សាច់ញាតិស្ត្រីឈ្មោះ ពៅ ពេទ្យ អាយុ ៤៩ ឆ្នាំ បានប្រាប់សមត្ថកិច្ចឲ្យដឹងថា មុនពេលកើតហេតុឈ្មោះ ង៉ូវ សុផលបានទូរស័ព្ទមកប្រាប់ក្រុមគ្រួសារថា ខ្លួនជំពាក់លុយគេច្រើនមិនអាចរកលុយសងគេបានដាច់ចិត្តលេបថ្នាំសម្លាប់ខ្លួន ពេលបានដំណឹងភ្លាមក្រុមគ្រួសារបានបានជិះម៉ូតូទៅមើលដល់ផ្ទះ បន្ទាប់មកបានឃើញឈ្មោះ ង៉ូវ សុផល បានចង់.ក នៅដើមទៀប នៅចំនុចក្រោយផ្ទះប្រហែល១០ ម៉ែត្រ ជើងផុតពីដីនឹងខ្សែពណ៌ស ប្រវែងប្រហែល ២.៥ ម៉ែត្រ បន្ទាប់មកក្រុមគ្រួសារនិងអ្នកជិតខាងបាននាំគ្នាស្រាយខ្សែនោះ ទម្លាក់សពចុះពីលើដើមទៀបយកទៅដល់ក្នុងផ្ទះជួយអន្តរាគមន៍ដែរតែសពបានស្លាប់បាត់បង់ជីវិតទៅហើយ។

លោកវរសេនីយ៍ឯក បេន សំអាត អធិការនគរបាលស្រុកម៉ាឡៃ បានបញ្ជាក់ថាក្រោយពីទទួលបានព័តមាន កម្លាំងនគរបាលជំនាញបច្ចេកទេសវិទ្យាសាស្ត្រនិងប៉ុស្តិ៍បានសហការជាមួយកម្លាំងពាក់ព័ន្ធ គ្រូពេទ្យ និង អាជ្ញាធរមូលដ្ឋាន ចុះពិនិត្យឃើញថានៅលើខ្លួនសពមិនមានអ្វីក្រៅពីស្លាកស្នាមចងកនោះឡើយ។

ក្រោយពិនិត្យនិងធ្វើកោសល្យវិច្ច័យរួច ក្រុមការងារចំរុះបានប្រគល់សពជូនក្រុមគ្រួសារចាត់ចែងធ្វើបុណ្យតាមប្រពៃណី៕

អត្ថបទ៖វ៉ាន់ ណាង