ព័ត៌មានជាតិ

សមត្ថកិច្ចកិច្ចខេត្តព្រះសីហនុឃាត់ខ្លួនជនជាតិចិន២នាក់បញ្ជាទិញថ្នាំញៀនចូលមណ្ឌលចត្តាឡីស័ក

បានផុស

៣ years មុន

នៅ

ថ្ងៃពុធ ១៧ មីនា ២០២១

ដោយ

សមត្ថកិច្ចខេត្តព្រះសីហនុនៅថ្ងៃទី១៧ខែមីនាឆ្នាំ២០២១នេះបានធ្វើការឃាត់ខ្លួនជនជាតិចិនចំនួន២នាក់ប្រុស១នាក់និងស្រី១នាក់ពាក់ព័ន្ធទៅនឹងការបញ្ជាទិញគ្រឿងញៀនចូលទៅកន្លែងធ្វើចត្តាឡីស័ក។

លោកឧត្តមសេនីយ៍ទោល ជួន ណារិន្ទ ស្នងការខេត្តព្រះសីហនុបានមានប្រសាសន៍នៅល្ងាចថ្ងៃទី១៧មីននានេះថា ពិតជាមានការឃាត់ខ្លួនជនជាតិចិនពីរនាក់ពិតប្រាកដមែនដោយសារពួកគេបានបញ្ជាទិញគ្រឿងញៀនចូលក្នុងមណ្ឌលចត្តាឡីស័ក។

លោកឧត្តមសេនីយ៍ទោលបានបន្តថា «សមត្ថកិច្ចបានឃាត់ខ្លួនគាត់ពាក់ព័ន្ធនឹងគ្រឿងញៀនហើយយើងនឹងអនុវត្តទៅតាមច្បាប់ថ្មីដែលទើបបានប្រកាសដាក់ឲ្យប្រើប្រាស់ថ្មីៗៗនេះ»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅពេលសួរថា តើជនជាតិចិនទាំងពីរនាក់នោះយកគ្រឿងញៀនប៉ុន្មានចូលនោះ លោកឧត្តមសេនីយ៍ទោលបានបញ្ជាក់ថាទោះបីជានាំចូលគ្រឿងញៀនតិចឬច្រើនក៏សមត្ថកិច្ចត្រូវអនុវត្តទៅតាមច្បាប់ដែរពិសេសច្បាប់ស្តីពីវិធានការទប់ស្កាត់ការឆ្លងរីករាលដាលជំងឺកូវីដ១៩និងជំងឺឆ្លងកាចសាហាវនិងប្រកបដោយគ្រោះថ្នាក់ធ្ងន់ធ្ងរផ្សេងទៀតដែរ។

យ៉ាងណាក៏ដោយ ជនជាតិចិនទាំងពីរនាក់នោះអាចនឹងត្រូវប្រឈមនឹងការបណ្តេញចេញពីប្រទេសដូចជនជាតិចិនមួយចំនួនទៀតដែលបានល្មើសនឹងវិធានការការធ្វើចត្តាឡីស័ករបស់ប្រទេសកម្ពុជា។

បើយោងតាមទំព័រហ្វេប៊ុកផ្លូវការរបស់លោក គួច ចំរើន អភិបាលនៃគណអភិបាលខេត្តព្រះសីហនុដែលបានបង្ហោះនៅថ្ងៃនេះបានឲ្យដឹងថា «ស្រីស្រស់ ប្រុសស្អាត បញ្ជាទិញ ថ្នាំញៀន ចូលកន្លែង ចត្តាឡីស័ក ជាប់អន្ទាក់សមត្ថកិច្ច រៀបចំបញ្ជូនចេញទៅប្រទេសដើមវិញ »៕

ដោយ ៖ សំអឿន