ព័ត៌មានជាតិ

មួយស្រុកកោះធំមានអ្នកឆ្លងកូវីដកើនដល់២០០នាក់ អាជ្ញាធរសម្រេចយកសណ្ឋាគារមួយធ្វើទីតាំងព្យាបាល

បានផុស

៣ years មុន

នៅ

ថ្ងៃសៅរ៍ ២០ មីនា ២០២១

ដោយ

អាជ្ញាធរខេត្តកណ្តាលបានសម្រេចជ្រើសរើសយកសណ្ឋាគារមួយ ដែលមានទីតាំងស្ថិតនៅភូមិព្រែកសឹង្គ ឃុំសំពៅពូន ស្រុកកោះធំធ្វើជាទីតាំងសម្រាប់ព្យាបាលអ្នកជំងឺកូវីដ-១៩ ខណៈនៅស្រុកកោះធំមានអ្នកឆ្លងកើនឡើងរហូតដល់២០០នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក គ្រុយ ម៉ាឡែន នាយករដ្ឋបាលសាលាខេត្តកណ្តាលបានឲ្យដឹងនៅយប់ ថ្ងៃទី២០មីនានេះថាសណ្ឋាគារនេះ មានបន្ទប់ចំនួន១០១បន្ទប់ ដែលអាចដាក់គ្រែបានចំនួន២០២គ្រែងាយស្រួលសម្រាប់អ្នកជំងឺនៅស្រុកកោះធំធ្វើការព្យាបាលនៅទីនោះតែម្តង ដោយមិនចាំបាច់បញ្ជូនទៅព្យាបាលនៅមន្ទីរពេទ្យបង្អែកជ័យជំនះទៀតឡើយ។

លោកបានបន្តថា «យកទីតាំងសណ្ឋាគារនៅស្រុកកោះធំដែលកន្លងមកមានអ្នកកើតកូវីដដែលឥឡូវនេះយើងកំពុងធ្វើចត្តាឡីស័ក នៅក្នុងហ្នឹង។ ឥឡូវទីតាំងដែលយើងបានបិទយើងបានសុំគោលការណ៍ទៅថ្នាក់ដឹកនាំ ដើម្បីយកទីតាំងនោះយកធ្វើកន្លែងព្យាបាលតែម្តង ដោយសារនៅតំបន់កោះធំយើងឃើញថាអ្នកវិជ្ជមានឡើងដល់២០០នាក់ហើយ។ អីចឹងបើយើងបញ្ជូនទៅដល់មន្ទីរពេទ្យជ័យជំនះវាអត់មានទីតាំងគ្រប់គ្រាន់ដាក់អ្នកជំងឺ។ ដូច្នេះយើងសុំគោលការណ៍យកទីតាំង សណ្ឋាគារនៅកោះធំធ្វើជាកន្លែងព្យាបាលតែម្តងដោយមានបន្ទប់១០១បន្ទប់ក្នុង១បន្ទប់ដាក់បានគ្រែចំនួន២»។

លោកបានបន្តទៀតថា គិតត្រឹមថ្ងៃទី២០ខែមីនានេះខេត្តកណ្តាលមានអ្នកឆ្លងជំងឺកូវីដ១៩ចំនួន២៤២នាក់និងជាសះស្បើយចំនួន១៨នាក់ក្នុងនោះនៅស្រុកកោះធំមានអ្នកឆ្លងរហូតដល់ទៅ២០០នាក់៕

ដោយ ៖ សំអឿន