បណ្ឌិត ឈាង វណ្ណារិទ្ធ បញ្ជាក់ពីការគាំទ្ររបស់រដ្ឋសភាលើសំណើគោលនយោបាយណាដែល​លើកកម្ពស់ប្រាក់រៀល

រដ្ឋសភាគាំទ្ររាល់សំណើគោលនយោបាយណា ដែលមានគោលដៅ​លើកកម្ពស់ប្រាក់រៀល។ នេះជាការបញ្ជាក់របស់លោកបណ្ឌិត ឈាង វណ្ណារិទ្ធ អគ្គលេខាធិការរង និងជាអនុប្រធានក្រុមអ្នកនាំពាក្យ ប្រតិកម្មរហ័ស និងយុទ្ធសាស្រ្តនៃរដ្ឋសភា។

លោកបណ្ឌិត ឈាង វណ្ណារិទ្ធ បានលើកឡើងថា រដ្ឋសភានឹងគាំទ្ររាល់សំណើ និងគោលនយោបាយណា ដែលមានគោលដៅលើកកម្ពស់ប្រាក់រៀល និងព្យាយាមប្រមូលធាតុចូលពីភាគីពាក់ព័ន្ធ ដើម្បីឱ្យរាជរដ្ឋាភិបាលពិចារណាក្នុងការដាក់ចេញ ដើម្បីលើកកម្ពស់ប្រាក់រៀល។  

ជាក់ស្ដែង នៅថ្ងៃទី២០ ខែមីនា ឆ្នាំ២០២៥ អគ្គលេខាធិការដ្ឋានរដ្ឋសភា និងអគ្គលេខាធិការដ្ឋានព្រឹទ្ធសភា ដោយបានសហការជាមួយធនាគារជាតិកម្ពុជា នឹងរៀចំសិក្ខាសាលាមួយស្តីពីប្រាក់រៀល ប្រព័ន្ធបាគង និងខេអេចខ្យូអ (KHQR) នៅក្នុងការលើកកម្ពស់ និងជំរុញការប្រើប្រាស់ប្រាក់រៀល ដែលជារូបិយវត្ថុជាតិ ឱ្យមានការរីកចម្រើនខ្លំាងឡើង។

សិក្ខាសាលាដែលរៀបចំធ្វើ គឺចំឱកាសខួបលើកទី៤៥ នៃការដាក់ឱ្យចរាចរណ៍ប្រាក់រៀលឡើងវិញនេះ (ថ្ងៃទី២០ ខែមីនា ឆ្នាំ១៩៨០-ថ្ងៃទី២០ ខែមីនា ឆ្នាំ២០២៥) ហើយគឺជាសិក្ខាសាលាទី២ ដែលអគ្គលេខាធិការដ្ឋានរដ្ឋសភា បានរៀបចំឡើងធ្វើឡើងនៅក្នុងអាណត្តិរដ្ឋសភា នីតិកាលទី៧ ក្រោមការដឹកនាំដោយសម្តេចធិបតី ឃួន សុដារី ប្រធានរដ្ឋសភា នៅក្នុងការជំរុញ និងលើកកម្ពស់ការប្រើប្រាស់រូបិយវត្ថុ​ជាតិ។

បើតាមការគូសបញ្ជាក់របស់បណ្ឌិត ឈាង វណ្ណារិទ្ធ រដ្ឋសភា​ នឹងតាមដានវឌ្ឍនភាពនៃការប្រើប្រាស់ប្រាក់រៀល និងធ្វើការជជែកពិភាក្សាពីវឌ្ឍនភាព និងបញ្ហាប្រឈមក្នុងការលើកកម្ពស់ប្រាក់រៀលជាមួយរាជរដ្ឋាភិបាលឱ្យបានញឹកញាប់។ លោកបណ្ឌិត សង្កត់ធ្ងន់ថា រដ្ឋសភា នឹងចូលរួមជាមួយរាជរដ្ឋាភិបាលក្នុងការលើកកម្ពស់ការយល់ដឹងពីប្រាក់រៀលក្នុងចំណោមប្រជាពលរដ្ឋ និងសាធារណជន៕