៣ថ្ងៃនៃពិធីបុណ្យចូលឆ្នាំថ្មី ខេត្តកំពត ទទួលបានភ្ញៀវទេសចរជាង ១លាន ៣សែននាក់

លោក សយ សុីណុល ប្រធានមន្ទីរទេសចរណ៍ខេត្តកំពត បានឱ្យដឹងថា ក្នុងរយៈពេល៣ថ្ងៃ ចាប់ពីថ្ងៃទី១៤ រហូតដល់ថ្ងៃទី១៦ ខែមេសា ឆ្នាំ២០២៥ នៃពិធីបុណ្យចូលឆ្នាំថ្មីប្រពៃណីជាតិខ្មែរ ខេត្តកំពត ទទួលបានភ្ញៀវទេសចរជាតិ និងភ្ញៀវទេសចរអន្តរជាតិបានមកស្នាក់នៅ និងមកដើរលេងកម្សាន្តនៅតាមរមណីយដ្ឋាននានាមានចំនួន ១,៣០៦,៥៥២នាក់ ក្នុងនោះភ្ញៀវទេសចរអន្តរជាតិចំនួន ៤៥៧៣ នាក់។

ក្នុងចំណោមភ្ញៀវទេសចរដែលបានមកទស្សនាខេត្តកំពតដែលរដ្ឋបាលខេត្តកំពតបានរៀបចំពិធីកំពតសង្ក្រាន្តឆ្នាំថ្មី ឆ្នាំ២០២៥ តំបន់ត្រជាក់នៅរង្វង់មូលទុរេន បានទទួលស្វាគមន៍ភ្ញៀវទេសចរជាតិ និងភ្ញៀវទេសចរអន្តរជាតិបានមកចូលរួមមានកម្សាន្តច្រើន។

បើយោងតាមរបាយការណ៍របស់លោក សយ សុីណុល ប្រធានមន្ទីរទេសចរណ៍ខេត្តកំពត ក្នុងចំណោមបណ្ដា​សហគមន៍ ក្រុង ស្រុកទូរទាំងខេត្តកំពត ដែលបានទាក់ទាញភ្ញៀវទេសចរជាតិ និងភ្ញៀវទេសចរអន្តរជាតិទៅលេងកម្សាន្តយ៉ាងច្រើនកុះករផងដែរ។

ជាមួយគ្នានោះលោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការដ្ឋាននគរបាលខេត្តកំពតបានឱ្យដឹងថា ក្នុងរយៈពេល៣ថ្ងៃនៃពិធីបុណ្យចូលឆ្នាំថ្មីនេះ លោកបានដឹកនាំកងកម្លាំង និងចង្អុលបង្ហាញតាមគោលដៅក្នុងកិច្ចសហប្រតិបត្តិការរក្សាសន្តិសុខ និងកណ្ដាប់ធ្នាប់សុវត្ថិភាពទៅតាមគោលដៅបានបញ្ចៀសចរាចរណ៍មិនឲ្យមានការកកស្ទះនោះឡើយ ឬសភាពការណ៍ទូទៅនៅក្នុងខេត្តកំពតដោយមានលក្ខណៈល្អប្រសើរទូទាំងខេត្តផងដែរ៕

អត្ថបទ៖ សឹង រ៉ាត់