ព័ត៌មានជាតិ

កយកា ផ្តល់ជំនួយ២លានដុល្លារដល់ក្រសួងធនធានទឹកដើម្បីកាត់បន្ថយផល់ប៉ះពាល់ដោយមហន្តរាយគ្រោះធម្មជាតិនានា

បានផុស

៣ years មុន

នៅ

ថ្ងៃព្រហស្បតិ៍ ២៥ មីនា ២០២១

ដោយ

ភ្នំពេញ ៖ ទីភ្នាក់ងារសហប្រតិបត្តិការអន្តរជាតិកូរ៉េ (KOICA)បានផ្តល់ជំនួយចំនួន២លានដុល្លារដល់ក្រសួងធនធានទឹកនិងឧតុនិយមដើម្បីកាត់បន្ថយផល់ប៉ះពាល់ដែលបង្កឡើងដោយមហន្តរាយគ្រោះធម្មជាតិនានា ដូចជាគ្រោះទឹកជំនន់នៅរដូវវស្សា និងគ្រោះរាំងស្ងួតនៅរដូវប្រាំងក៏ដូចជាបង្កើនផលិតកម្មកសិកម្មនិងប្រាក់ចំណូលសម្រាប់ប្រជាកសិករ ផងដែរ ។

ពិធីចុះហត្ថលេខាផ្តល់ជំនួយនេះបានចុះហត្ថលេខាលើកិច្ចព្រមព្រៀងផ្តល់ហិរញ្ញប្បទាននេះបានធ្វើឡើងពីចំងាយនៅថ្ងៃទី២៥ខែមីនាឆ្នាំ២០២១រវាងលោក Rho Hyunjun នាយកទីភ្នាក់ងារកយកាប្រចាំប្រទេសកម្ពុជា ជាមួយនឹងលោកប៉ុញ សច្ចៈ រដ្ឋលេខាធិកាក្រសួងធនធានទឹក និងឧតុនិយម។

ក្រោមជំនួយឥតសំណងប្រមាណជា២លានដុល្លាសហរដ្ឋអាមេរិកពីសាធារណរដ្ឋកូរ៉េ គម្រោងនឹងត្រូវបានអនុវត្តក្នុងរយៈពេល២៤ខែ (ចាប់ពីឆ្នាំ២០២១ដល់២០២៣) ក្នុងខេត្តព្រៃវែង និង ស្វាយរៀង។ ផ្នែកសំខាន់ៗរបស់គម្រោងរួមមាន ១) ការបង្កើតផែនការមេក្នុងការគ្រប់គ្រងធនធានទឹកចម្រុះសម្រាប់តំបន់ដីសណ្តរភាគខាងកើតទន្លេមេគង្គ ២) ការសិក្សាលទ្ធភាពបឋម និង ៣)ការគាំទ្រការអភិវឌ្ឍនសមត្តិភាព។

គម្រោងនឹងបង្កើតផែនការអភិវឌ្ឍន៍រយៈពេលវែង ហើយធ្វើការសិក្សាលទ្ធភាពបឋមដើម្បីជាអនុសាសន៍ និងជាធាតុចូលបន្ថែមទៀតសម្រាប់ក្រសួងធនធានទឹកនិងឧតុនិយម។ ធនធានមនុស្សទាំងកំរិតគោលនយោបាយ និង កំរិតបច្ចេកទេសនិងត្រូវបានផ្តល់ជាការបណ្តុះបណ្តាលក្នុងស្រុក និងក្រៅប្រទេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាបន្ថែមទៀត អ្នកជំនាញការកូរ៉េ និងត្រូវបានបញ្ជូនមកធ្វើការសហការជាមួយអ្នកជំនាញការកម្ពុជាដើម្បីអនុវត្តគំរោងនេះក៏ដូចជាដើម្បីចែករំលែកបទពិសោធន៍ទៅកាន់ក្រុមការងារកម្ពុជាផងដែរ។

លោក ប៉ុញ សច្ចៈ បានមានប្រសាសន៏ថាគម្រោងនេះជាតម្រូវការចាំបាច់សម្រាប់ប្រទេសកម្ពុជាព្រោះផែនការមេជាធាតុចូលដ៏សំខាន់សម្រាប់វិស័យទឹកកសិកម្មក្នុងប្រទេសកម្ពុជា ជាពិសេសក្នុងតំបន់ដីសណ្តនៃទនេ្លមេគង្គ។ វាជាផែនទីបង្ហាញផ្លូវសម្រាប់កម្ពុជាក្នុងការចាត់ចែងទឹកប្រកបដោយប្រសិទ្ធិភាព និង ប្រសិទ្ធិផល ដែលធនធានទឹកនឹងត្រូវបានចាត់ចែងមិនត្រឹមតែប្រើប្រាស់ក្នុងវិស័យកសិកម្មប៉ុណ្ណោះទេ ថែមទាំងអាចប្រើប្រាស់ក្នុងជីវភាពរស់នៅរបស់ប្រជាជន និងលើវិស័យផ្សេងៗទៀតផងដែរ។

លោក Rho Hyunjun មានប្រសាសន៏ថាវិស័យទឹកជាសរសរស្តម្ភមួយក្នុងយុទ្ធសាស្ត្រភាពជាដៃគូរបស់ទីភ្នាក់ងារកយកា ហើយ កយកាក៏បានប្តេជ្ញាក្នុងការគាំទ្រក្នុងវិស័យនេះផងដែរ។

លោកបានបន្ថែមថា «តំបន់មេគង្គជាចំនុចសំខាន់ក្នុងគោលនយោបាយភាគខាងត្បូងរបស់សាធារណៈរដ្ឋកូរ៉េដែលស្វែងរកកិច្ចសហការដ៏រឹងមាំជាមួយបណ្ដាប្រទេសនៅអាស៊ីអាគ្នេយ៍តាមរយៈសរសរស្តម្ភចំនួន៤រួមមាន មនុស្ស វិបុលភាព សន្តិភាព និង ភពផែនដី»៕

ដោយ ៖ សំអឿន