លោក ហែម សុវត្ថិ ផ្តួចផ្តើម និងសហការជាមួយសម្ព័ន្ធគ្រូពេទ្យ ស.ស.យ.ក ពិនិត្យ និងព្យាបាលជំងឺឥតគិតថ្លៃលើកទី២ នៅឃុំកោះសូទិន

លោក ហែម សុវត្ថិ ប្រធានក្រុមការងាររាជរដ្ឋាភិបាលចុះមុលដ្ឋានឃុំកោះសូទិន និងលោក សា ស៊ីថា អភិបាលរង នៃគណៈអភិបាលខេត្តកំពង់ចាម នាព្រឹក ថ្ងៃអាទិត្យ ទី០៨ ខែមិថុនា ឆ្នាំ២០២៥  បានអញ្ជើញជាគណៈអធិបតីក្នុងពិធីពិនិត្យ និងព្យាបាលជំងឺឥតគិតថ្លៃជូនប្រជាពលរដ្ឋនៅឃុំកោះសូទិន។ 

ក្រោមកិច្ចសហការរបស់ក្រុមការងារ និងសម្ព័ន្ធគ្រូពេទ្យសហភាពសហព័ន្ធយុវជនកម្ពុជា (ស.គ.ស.ស.យ.ក) លោកបណ្ឌិត ហេង សុខគង់ ប្រធានសម្ព័ន្ធគ្រូពេទ្យ ស.ស.យ.ក បានដឹកនាំគ្រូពេទ្យស្ម័គ្រចិត្ត ចំនួន ៣០០រូប ចុះទៅពិនិត្យ ព្យាបាលជំងឺ និងអប់រំសុខភាព ជូនបងប្អូនប្រជាពលរដ្ឋរស់នៅឃុំកោះសូទិន សរុបចំនួន ២១៣២នាក់ នៅក្នុងបរិវេណវិទ្យាល័យកោះសូទិន។

ទន្ទឹមនេះដែរ លោក ហែម សុវត្ថិ បានរំលឹកថា កាលពីថ្ងៃទី៧ ខែកញ្ញា ឆ្នាំ២០២៤ ក្រុមការងារបានរៀបចំវិធីរួមម្តងហើយ ដោយទទួលបានពិនិត្យ និងព្យាបាលជំងឺ ព្រមទាំងផ្តល់ថ្នាំពេទ្យ ជូនដល់ព្រះសង្ឃ លោកតា លោកយាយ ពុកម៉ែ មាមីង បងប្អូន សរុបចំនួន ៤៥៦៨អង្គ/នាក់ និងបានបញ្ជាក់ថា ក្រុមការងាររាជរដ្ឋាភិបាលចុះមូលដ្ឋានឃុំកោះសូទិន នឹងសហការជាមួយក្រុមគ្រូពេទ្យស្ម័គ្រចិត្ត នៃសម្ព័ន្ធគ្រូពេទ្យសហភាពសហព័ន្ធយុវជនកម្ពុជា ដើម្បីរៀបចំកម្មវិធីនេះឡើងជាបន្តបន្ទាប់។​

ឆ្លៀតក្នុងឱកាសនេះ លោកប្រធានក្រុមការងារ បានលើកឡើងរយៈកាលថ្មីៗកន្លងមកនេះ ស្ថានការណ៍នៅតាមព្រំដែនកម្ពុជា-ថៃ មានភាពតានតឹង និងស្មុគស្មាញជាខ្លាំង  ព្រមទាំង ក៏បានអំពាវនាវដល់បងប្អូនប្រជាពលរដ្ឋ ជឿជាក់លើរាជរដ្ឋាភិបាលកុំចាញ់បោកការឃោសនារបស់គណបក្សប្រឆាំង ក្នុងការចំណេញផែ្នកនយោបាយ ដោយធ្វើការវាយប្រហារ និងរិះគន់ ថ្នាក់ដឹកនាំ ដោយគ្មានមូលដ្ឋាន និងរួបរួមសាមគ្គីគ្នាជាធ្លុងមួយ មិនប្រកាន់និន្នាការបក្សនយោបាយ ដោយលើកឡើងថា “កុំជឿឲ្យសោះថាមានបរទេសណាស្រឡាញ់ខ្មែរ ជាងខ្មែរស្រឡាញ់ខ្មែរ”៕