ព័ត៌មានជាតិ

ព្រឹកនេះ ច្រកទ្វារអន្តរជាតិប៉ោយប៉ែត ភាគីថៃ បិទមិនអនុញ្ញាតឲ្យម៉ូតូ និងរទេះអូសរបស់អាជីវករខ្មែរចេញចូលទេ(មានវីដេអូ)

បានផុស

៤ សប្តាហ៍ មុន

នៅ

ថ្ងៃចន្ទ ២៣ មិថុនា ២០២៥

ដោយ

តាមមន្ត្រីនគរបាលអន្តោប្រវេសន៍ប្រចាំច្រកទ្វារអន្តរជាតិប៉ោយប៉ែត បានឲ្យដឹងនៅព្រឹកថ្ងៃទី ២៣ ខែមិថុនា ឆ្នាំ ២០២៥ នេះថា ជាបឋម ខាងទាហានថៃ នៅព្រឹកថ្ងៃទី ២៣ នេះ បានជូនដំណឹងមកសមត្ថកិច្ចកម្ពុជាប្រចាំច្រកប៉ោយប៉ែត មិនអនុញ្ញាតឲ្យមធ្យោបាយធ្វើដំណើរជាប្រភេទម៉ូតូ រថយន្ត និងរទេះរបស់កម្ពុជា ដែលអាជីវករខ្មែរ តែងប្រើជាមធ្យោបាយចេញចូលទៅប្រកបរបរលក់ដូរនៅផ្សាររុងគ្លឿទេ តែក្រោយមក ភ្លាមៗ ដោយមានការសម្របសម្រួលគ្នា ខាងថៃ បានអនុញ្ញាតឲ្យតែរថយន្តចេញចូលតែប៉ុណ្ណោះ ចំណែកម៉ូតូ និងរទេះអូស មិនអោយចេញចូលទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលដែលភាគីថៃ នៃច្រកអន្តរជាតិប៉ោយប៉ែត មិនអនុញ្ញាតឲ្យម៉ូតូកម្ពុជាចេញចូលដូចនេះ បន្ទាប់ពីខាងកម្ពុជាដែលមាន សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានផ្អាកទាំងស្រុងនូវការនាំចូលប្រេងឥន្ធនៈ និងឧស្ម័នគ្រប់ប្រភេទពីប្រទេសថៃ នៅត្រឹមម៉ោង ១២ យប់ ថ្ងៃទី ២២ ខែមិថុនា ២០២៥ តទៅ។ ម្យ៉ាងទៀត បន្ទាប់ពីប្រព័ន្ធផ្សព្វផ្សាយព័ត៌មានថៃ បានចុះផ្សាយខុសពីការពិតថា ប្រជាពលរដ្ឋកម្ពុជាក្រុងប៉ោយប៉ែត សម្រុកឆ្លងដែនចូលទៅចាក់ប្រេងនៅថៃ តាមច្រកអន្តរជាតិ តែការពិតជារឿងធម្មតាដែលអាជីវករខ្មែរចេញចូលទៅប្រកបអាជីវកម្មជាថៅកែលក់ដូរនៅផ្សារថៃ។

ដោយឡែក បើតាម លោក វ៉ាន់ ដារ៉ាន់ ប្រធានគណៈកម្មការច្រកអន្តរជាតិប៉ោយប៉ែត បានឲ្យដឹងថា ខាងថៃ ចង់បិទ ឬបើកស្រេចតែចិត្តជាឯកតោភាគី មិនជូនដំណឹងមុនឡើយ ដែលជាហេតុពិបាកនឹងធ្វើការជាមួយគ្នា។ ចំពោះការបិទមិនឲ្យម៉ូតូ ឬ រថយន្ត ចូលនៅព្រឹកនេះ ជាបឋម កម្ពុជា បានសម្របសម្រួលរថយន្តចេញចូលហើយ ហើយក្រុមការងារខាងកម្ពុជាកំពុងបន្តនិយាយគ្នា៕

អត្ថបទ ៖ អ ពៅ

សូមទស្សនាវីដេអូខាងក្រោម ៖