ក្រុមហ៊ុនរមណីយដ្ឋានទឹកជ្រោះប៊ូស្រា រៀបចំជួសជុលផ្លូវចូលបន្ថែម ដើម្បីបង្កើនភាពងាយស្រួលដល់ភ្ញៀវទេសចរណ័

រមណីយដ្ឋានទឹកជ្រោះប៊ូស្រា ដែលជាតំបន់ទេសចរណ៍ដ៏ល្បីល្បាញប្រចាំខេត្តមណ្ឌលគិរី មានប្រវែងពីទីរួមខេត្តជាង៣០គីឡូម៉ែត្រ។ ដើម្បីបង្កើនលក្ខណៈងាយស្រួលដល់ភ្ញៀវទេសចរណ៍ រមណីយដ្ឋានឧទ្យានធម្មជាតិប៊ូស្រា បានកំពុងជួសជុលស្ថាបនាផ្លូវចូលនៅតំបន់ទីតាំងរបស់ខ្លួន សុវត្ថិភាពដល់ភ្ញៀវទេសចរជាតិនិងអន្តរជាតិ ដែលមកកម្សាន្តនៅទីនេះ។

អ្នកស្រី សេង សុជាតា អគ្គនាយិកាក្រុមហ៊ុន មណ្ឌលគិរីរីសត ឧទ្យានធម្មជាតិប៊ូស្រា បានឱ្យដឹងថា ដើម្បីបង្កើនសុវត្ថិភាពដល់ភ្ញៀវទេសចរ គ្រប់រូបដែលបានធ្វើដំណើរមកកម្សាន្តនៅរមណីយដ្ឋាន (ឧទ្យានធម្មជាតិប៊ូស្រា)ដែលស្ថិតនៅក្នុងឃុំប៊ូស្រា ស្រុកពេជ្រាដា ខេត្តមណ្ឌលគិរីនេះ ក្នុងនាមក្រុមហ៊ុនកំពុងតែ ព្យាយាមជួសជុលស្ថាបនាផ្លូវ ចូលទៅក្នុងបរិវេណតំបន់រមណីយដ្ឋាន ដើម្បីលើកកម្ពស់សុវត្ថិភាពសោភ័ណភាព ដែលនៅទីតាំងមួយចំនួនមានការខូចខាតពីពេលកន្លងមក។

អ្នកស្រីបានបញ្ជាក់ថា ដោយសាររដូវនេះជារដូវវស្សាមានភ្លៀងធ្លាក់ជោកជាំ ដូច្នេះនៅតំបន់ទីតាំងមួយចំនួនមានសភាពរអិល និងលំបាកបន្តិចបន្តួចសម្រាប់ភ្ញៀវដែល ធ្វើដំណើរមកកម្សាន្តនៅទីនេះ ក៏ដូចជាធ្វើដំណើរឆ្ពោះទៅ ក្នុងទីប្រជុំជននាស្រុកពេជ្រាដា។ ដូច្នេះក្រុមហ៊ុនកំពុងតែពន្លឿននៃការស្ថាបនានេះ ឱ្យបានទាន់ពេលវេលាដើម្បីទាក់ទាញភ្ញៀវទេសចរមកកម្សាន្តបន្ថែម ក៏ដូចជាផ្តល់ភាពងាយស្រួលក្នុងការធ្វើដំណើរប្រកបដោយសុខសុវត្ថិភាពទៅដល់ប្រជាពលរដ្ឋនិងភ្ញៀវទេសចរជាតិនិងអន្តរជាតិនាពេលខាងមុខ៕

អត្ថបទ ៖ រៀ សុខហេង