កសិករស្រុកឈូកម្នាក់ អាចភ្ញាស់កូនត្រីរាប់លានក្បាលផ្គត់ផ្គង់ និងចែកចាយតាមបណ្តាខេត្តផ្សេងៗ

លោក ចាន់ ឌី ជាប្រជាកសិកររស់នៅឃុំត្រពាំងបី ស្រុកឈូក ខេត្តកំពតម្នាក់​ កំពុងសមប្រកបជាមួយរបរភ្ញាស់កូនត្រីលក់ ដោយក្នុងមួយឆ្នាំៗ កូនត្រីរាប់លានក្បាលត្រូវបានភ្ញាស់ចេញពីស្រះត្រីទាំង២០របស់គាត់ ដើម្បីផ្គត់ផ្គង់នៅក្នុងខេត្ត និងចែកចាយទៅតាមបណ្តាខេត្តមួយចំនួន។ បើតាមការបញ្ជាក់ លោកអាចបង្កើនការផលិតកូនត្រីបន្ថែមទៀតបាន ប្រសិនបើមានតម្រូវការ ខណៈកូនត្រីដែលចាប់ពីកន្លែងលោក ធន់នឹងជំងឺ និងមានសន្ទុះរីកធំធាត់ល្អ។

តាមការបញ្ជាក់ពីកសិកររូបនេះ កូនត្រីដែលលោកភ្ញាស់មានច្រើនប្រភេទ ប៉ុន្តែកូនត្រីដែលមានទីផ្សារល្អជាងគេ គឺកូនត្រីអណ្តែង ឯការបង្កាត់ពូជត្រីនេះម្តងអាចភ្ញាស់បានកូនពី ៥ទៅ១០ម៉ឺនកូន ខណៈដែលត្រីផ្សេងទៀត គាត់ចិញ្ចឹមមេដើម្បីអូសយកកូនតែម្តង។

កសិកររូបនោះបានបញ្ជាក់ថា ការចិញ្ចឹមក៏ដូចជាភ្ញាស់កូនត្រី កត្តាទឹកស្អាតជារឿងសំខាន់បំផុត ដែលអាចធ្វើឲ្យកូនត្រីភ្ញាស់បានល្អ និងធំធាត់លឿន។ ហើយដើម្បីភ្ញាស់ឲ្យទាន់ភ្ញៀវត្រូវធ្វើការបញ្ជាទិញ កន្លះខែ ឬ១ខែមុន។ បច្ចុប្បន្នលោកនៅតែអាចមានលទ្ធភាពបង្កើនការភ្ញាស់កូនត្រីបាន ប្រសិនបើមានតម្រូវការបន្ថែម។ បើតាមការបញ្ជាក់ របរភ្ញាស់ត្រីអាចអាចធ្វើឲ្យកសិកររូបនោះ រកចំណូលបានពី ២ទៅ៣លានក្នុងមួយខែ។ លោក ចាន់ ឌី បានថ្លែងអំណរគុណដល់ក្រុមហ៊ុន ពិសេសមន្ត្រីជំនាញ និងអាជ្ញាធរពាក់ព័ន្ធដែលបានជួយស្វែងរកទីផ្សារជូនលោក។

លោក ចាន់ ឌី គាត់លើកទឹកចិត្តឲ្យប្រជាកសិករគ្រប់រូបប្រឹងប្រែងដាំ និងចិញ្ចឹម ហើយសូមកុំពឹងតែលើការនាំចូលបន្លែត្រីសាច់ពីក្រៅប្រទេស ចំណែកអ្នកទទួលទានសូមជួយគាំទ្រផលិតផលរបស់កសិករយើង ដើម្បីលើកទឹកចិត្តកសិករឲ្យបង្កើនការដាំ និងចិញ្ចឹមបានកាន់តែច្រើន ជួយលើកកម្ពស់សេដ្ឋកិច្ចកសិករឲ្យកាន់តែប្រសើរ៕

អត្ថបទ៖ សឹង រ៉ាត់