អាជ្ញាធរស្វាយរៀង ចុះអនុវត្តវិធានការរដ្ឋបាលបណ្តោះអា​សន្ន ទប់ស្កាត់ការឆ្លងរាល​ដាលជំងឺកូវីដ១៩

អភិបាលរងខេត្តស្វាយរៀង លោក តូច ប៉ូលីវ៉ា និងលោក លឹម សៀងហេង អភិបាលក្រុងបាវិត បានចុះពិនិត្យ និងដឹកនាំកម្លាំង ចុះអនុវត្តវិធានការរដ្ឋបាលជាបណ្តោះអាសន្ន ដើម្បីទប់ស្កាត់ការរីករាលដាលជំងឺកូវីដ-១៩ ក្នុងភូមិសាស្រ្តក្រុងបាវិត ខេត្តស្វាយរៀង។

លោក លឹម សៀងហេង អភិបាលក្រុងបាវិត បានឲ្យដឹងថា ការអនុវត្តវិធានការរដ្ឋបាលជាបណ្តោះអាសន្ន ដើម្បីទប់ស្កាត់ការរីករាលដាលជំងឺកូវីដ-១៩ ក្នុងភូមិសាស្ត្រក្រុងបាវិតតាំងពីយប់ម៉ោងសូន្យថ្ងៃទី ៧ ខែមេសា ដល់ថ្ងៃទី ១៨ ខែមេសា ដើម្បីទប់ស្កាត់ការរីករាលដាលជំងឺកូវីដ-១៩ផងដែរ គឺធ្វើ២៤ម៉ោងលើ២៤ម៉ោងលុះដល់ថ្ងៃបញ្ចប់ នៃចេញសេចក្តីប្រកាសជួនដំណឹងខាងលើ។

លោក លឹម សៀងហេង ក៏បានអំពាវនាវដល់បងប្អូនប្រជាពលរដ្ឋទាំងបើគ្មានការចាំបាច់សូមកុំចេញផ្ទះ ហើយរាល់ការធ្វើដំណើរត្រូវមានលិខិតស្នាមបញ្ជាក់ពី អង្គភាព ស្ថាប័ន ក្រុមហ៊ុន ឬ អាជ្ញាធរមូលដ្ឋាន។

ស្ថានភាពជំងឺកូវីដ-១៩ នៅខេត្តស្វាយរៀង មិនទាន់ថមថយនៅឡើយទេ គឺនៅតែមានអ្នកឆ្លងជំងឺនេះ ជាបន្តបន្ទាប់ អាជ្ញាធរបានដាក់មន្ទីរពេទ្យចំនួន៣ សម្រាប់ព្យាបាលជំងឺកូវីដ១៩ រួមមាន: មន្ទីរពេទ្យបង្អែកស្រុកស្វាយជ្រំ មន្ទីពេទ្យសាមគ្គីរំដួល ស្រុករំដួល និងមន្ទីរពេទ្យនៅក្នុងតំបន់កាស៊ីណូម៉ុកបាយ ក្រុងបាវិត៕

អត្ថបទ៖ ភក្តី