សម្តេចតេជោអំពាវនាវដល់រដ្ឋមន្ត្រីក្រសួងយុត្តិធម៌សហការជាមួយតុលាការរៀបចំកន្លែងកាត់ទោសអ្នកល្មើសចត្តាឡីស័ក

សម្តេចនាយករដ្ឋមន្ត្រីហ៊ុនសែនបានអំពាវនាវដល់លោកកើតរឹទ្ធ រដ្ឋមន្ត្រីក្រសួងយុត្តិធម៌ធ្វើការសហការជាមួយតុលាការដើម្បីរៀបចំទីកន្លែងសម្រាប់កាត់ទោសដល់អ្នកដែលល្មើសនឹងការធ្វើចត្តាឡីស័ក។

តាមរយៈសេចក្តីថ្លែងការណ៍ពិសេសនៅព្រឹកនេះ សម្តេចតេជោបានមានប្រសាសន៍ថា៖ «យើងត្រូវអនុវត្តការធ្វើចត្តាឡីស័កឲ្យបានម៉ឺងម៉ាត់ហើយស្នើឲ្យឯកឧត្តកើតរឹទ្ធត្រូវធ្វើការជាមួយតុលារដើម្បីរៀបចំទីកន្លែងសម្រាប់កាត់ទោសអ្នកដេលល្មើសសនឹងការធ្វើចត្តាឡីស័ក»។

សម្តេចបានបន្តថា៖ «កុំឲ្យគេថាយើងបង្កើតច្បាប់ហើយគ្រាន់តែជាការគម្រាម។ ដូចនេះអ្នកដែលល្មើសត្រូវតែយកទៅកាត់ទោសភ្លាមទៅតាមច្បាប់ហើយបើមានចម្លងជំងឺកូវីដ១៩ទៅគេផ្សេងតទៀត្រូវអវត្តទៅតាមទោសដែលមានចែងក្នុងច្បាប់ផងដែរ»។

យ៉ាងណាក៏ដោយ សម្តេចបានស្នើឲ្យតុលាការត្រូវមានសម្លៀកបំពាក់ពេទ្យសម្រាប់ការពារនៅពេលកាត់ទោសអ្នកដែលល្មើសដើម្បីការពារកុំឲ្យឆ្លងជំងឺកូវីដ១៩។ សម្តេចបានបន្ថែមថា ការឆ្លងកន្លងមកនេះដោយសារយើងមិនបានអនុវត្តអភិបាលកិច្ចបានល្អដូចជាមានការធ្វើចត្តាឡីស័កមិនបានត្រឹមត្រូវ មានបើកការ៉ាអូខេដោយរដ្ឋអំណាចមិនបានដឹងជាដើមទើបបណ្តាលឲ្យមានហានិភ័យ។ ចាប់ពីពេលនេះត្រូវពង្រឹកការធ្វើចត្តាឡីស័ក ការពាក់ម៉ាស និងការអនុវត្តច្បាប់ឲ្យបានតឹងរឹងជាទីបំផុត៕

អត្ថបទ៖ សំអឿន