អ្នកគាំទ្រ​ប្រមាណ ៧ ពាន់​នាក់​ទស្សនា​ការ​ប្រកួតមិត្តភាព រវាងក្រុម​តារាកម្ពុជា និងសសយក ខេត្ត​បន្ទាយ​មានជ័យ

មហាជនយ៉ាងច្រើន​បាន​នាំ​គ្នា​ទៅទស្សនា ការប្រកួតបាល់ទាត់មិត្តភាពរវាងក្រុម​ស.ស.យ.ក. ខេត្តបន្ទាយមានជ័យ និងក្រុមកីឡាបាល់ទាត់តារាកម្ពុជា ក្រោមប្រធានបទ «កម្លាំងសាមគ្គី ដើម្បីជួរមុខ និងសន្តិភាព» ។

ការប្រកួត​នេះប្រព្រឹត្ត​ទៅនៅលើទីលាន​បាល់ទាត់​នៃ វិទ្យាល័យ ហ៊ុន សែន ខ្លាកូន ក្នុងសង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ កាលពីរសៀលថ្ងៃទី៥ ខែឧសភា ឆ្នាំ២០២៦ ។

លោក កែ សួនសុភាព ប្រធានសហភាពសហព័ន្ធយុវជនកម្ពុជា ខេត្តបន្ទាយមានជ័យ បានទទួលស្វាគមន៍ និងបើកកម្មវិធី​ប្រកួតបាល់ទាត់មិត្តភាពរវាងក្រុមកីឡាករ ស.ស.យ.ក. ខេត្តបន្ទាយមានជ័យ និងក្រុមកីឡាបាល់ទាត់តារាកម្ពុជា ក្រោមប្រធានបទ «កម្លាំងសាមគ្គី ដើម្បីជួរមុខ និងសន្តិភាព»។ កម្មវិធី​​​នេះមានការចូលរួមពីលោក លោកស្រីអភិបាលរងខេត្ត ប្រធាន អនុប្រធាន​មន្ទីរជុំវិញខេត្ត និងទស្សនិកជនប្រមាណជាង ៧០០០នាក់។

ព្រឹត្តិការណ៍នេះរៀបចំក្នុងគោលបំណង​​​ដើម្បី​កៀរគរមូលនិធិសប្បុរសធម៌ ជួយឧបត្ថម្ភគាំទ្របន្តដល់បងប្អូនវិរកងទ័ព និងប្រជាជនភៀសសឹក។ លើកទឹកចិត្ត និងសម្ដែងការ អរគុណ ដឹងគុណ ចំពោះបងប្អូនវិរកងទ័ព និងគាំទ្រលើកទឹកចិត្តពួកគាត់ ជានិច្ច ក្នុងគ្រប់កាលៈទេសៈ។ ពង្រឹងសាមគ្គីភាពជាតិ គាំទ្រគ្នា ជួយគ្នា រួមសុខទុក្ខជាមួយគ្នា «ខ្មែរជួយខ្មែរ ខ្មែរតែមួយ» ក្នុងបុព្វហេតុការពារជាតិ និងសន្តិភាព។

ការប្រកួត​កីឡា​បាល់ទាត់មិត្តភាព និងសប្បុរសធម៌ យ៉ាងស្វិត​ស្វាញអស់រយៈពេលមួយ​ល្ងាច​​បាន​បញ្ចប់​ដោយ​​លទ្ធផល​ស្មើគ្នា​។ ក្រុមបាល់​ទាត់តារា​កម្ពុជា ទាត់ចូល​បាន ៣ គ្រាប់។ ចំណែកក្រុម​ ស.ស.យ.ក ខេត្តបន្ទាយមានជ័យ ក៏​ស៊ូត​ចូលបាន ៣ គ្រាប់​ដែរ។

លោក កែ សួនសុភាព បានបញ្ជាក់ថា ៖«ការប្រកួត​នេះ ការចាញ់​ឈ្នះវាមិន​សំខាន់នោះទេ តែអ្វីដែលសំខាន់គឺ ស្មារតីនៃការរាប់អាន សាមគ្គីភាព រវាងកីឡាករ និងកីឡាករ»។

ក្រោយ​​បញ្ចប់​ការប្រកួត លោក កែ សួនសុភាព បាន​អំពាវនាវ​ដល់បងប្អូន សមាជិក សមាជិការ សហភាព​សហព័ន្ធ​​យុវជនកម្ពុជា ក៏ដូចជាក្រុមកីឡាករទាំងអស់ ចូលរួមក្នុងកម្មវិធី​ដាំ​ដើមឈើនៅជំរំ​ភៀសសឹកដែលកំពុងស្នាក់នៅភូមិស្លក្រាម ឃុំស្លក្រាម ស្រុកស្វាយចេក ខេត្តបន្ទាយមានជ័យ៕

ដោយអពៅ