នគរបាលខណ្ឌចំការមន សហការមួយខណ្ឌមានជ័យ ឃាត់ខ្លួនជនសង្ស័យ០២នាក់ លួចម៉ូតូអ្នកស្គាល់គ្នា

ជនសង្ស័យ ០២នាក់ អស់ល័ក្ខ ត្រូវបាននគរបាលប៉ុស្តិ៍ទន្លេបាសាក់ រួមជាមួយជនរងគ្រោះ មើលប្រព័ន្ធ ជីភីអេស តាមចាប់បានសម្រេច ក្រោយធ្វើស៊ីម៉ូតូ អ្នកស្គាល់។

ការឃាត់ខ្លួននេះបានធ្វើឡើងកាលពីវេលាម៉ោង ០៤ទាបភ្លឺឈានចូលថ្ងៃទី ២៣ ខែមេសា ឆ្នាំ២០២៦ នៅចំណុចផ្ទះសំណាក់មួយកន្លែង តាមបណ្តោយផ្លូវបេតុង សង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ ។

តាមការបញ្ជាក់ពីប្រជាពលរដ្ឋបានអោយដឹងថា វេលាម៉ោងប្រហែល ១ទាបភ្លឺ មានការផ្អើលឆោរឡោរនៅក្បែរពួកគាត់ ថាមានករណី អ្នកស្គាល់គ្នា បានធ្វើស៊ីម៉ូតូ០១គ្រឿង ម៉ាក ហុងដា ប៊ីត , ទូរស័ព្ទដៃ ០១គ្រឿង រួមនិងកាបូបដៃចំនួន ០១ នៅចំណុចហាងមួយកន្លែង រួចយករត់គេចខ្លួនបាត់ស្រមោល។ លុះមកដល់វេលាម៉ោង ៤ទាបភ្លឺ ជនរងគ្រោះបានតាម ប្រព័ន្ធ ជីភីអេស ដែលភ្ជាប់ជាមួយម៉ូតូ ចាប់តាំងពីចំណុច ក្នុងមូលដ្ឋានប៉ុស្តិ៍ទន្លេបាសាក់ រហូតដល់មូលដ្ឋានសង្កាត់ស្ទឹងមានជ័យ ក្នុងផ្ទះសំណាក់មួយកន្លែង។ ភ្លាមៗសមត្ថកិច្ចបានឃាត់ជនសង្ស័យប្រុសស្រី០២នាក់ កំពុងសម្រាកក្នុងផ្ទះសំណាក់ បានបញ្ជូនទៅកាន់ប៉ុស្តិ៍ទន្លេបាសាក់ តែម្តង។

បច្ចុប្បន្ន ជនសង្ស័យទាំង០២នាក់ ត្រូវបាននគរបាលបញ្ជូនទៅកានប៉ុស្តិ៍ទន្លេបាសាក់ នៃអធិការខណ្ឌចំការមន ដើម្បីបន្តតាមនីតិវិធីច្បាប់ ៕ អត្ថបទ ៖ រដ្ឋា