សន្តិសុខសង្គម

សុំលុយម្ដាយមិនបាន យកមួកការពារទៅលក់ផ្ទុះហិង្សារងរបួសម្នាក់

បានផុស

២ years មុន

នៅ

ថ្ងៃព្រហស្បតិ៍ ២៥ វិច្ឆិកា ២០២១

ដោយ

បុរសម្នាក់ត្រូវបានកម្លាំងសមត្ថកិច្ចមូលដ្ឋានចាប់ឃាត់ខ្លួនខណៈប្រើអំពើហិង្សាទៅលើប្អូនប្រុសរបស់ខ្លួនបណ្តាលឲ្យរបួសព្រោះតែជម្លោះតិចតួចរឿងសុំលុយម្ដាយឪពុកមិនឲ្យ។

មន្ត្រីប៉ុស្តិ៍នគរបាលរដ្ឋបាលចតុមុខនៃអធិការដ្ឋាននគរបាលខណ្ឌដូនពេញ បានឲ្យដឹងថា ករណីហិង្សានេះបានកើតឡើងនៅថ្ងៃទី២៤ ខែវិច្ឆិកា ឆ្នាំ២០២១ នៅចំណុចផ្ទះលេខ១៣៨អឺ០ហ្សេត ផ្លូវមុន្នីវង្ស ភូមិ៧ សង្កាត់ចតុមុច ខណ្ឌដូនពេញ រាជធានីភ្នំពេញ ។

ជនសង្ស័យដែលត្រូវឃាត់ខ្លួនឈ្មោះ ទេព វ៉ាន់នី ភេទប្រុស អាយុ៣៦ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅកន្លែងកើតហេតុ។ ចំណែកជនរងគ្រោះឈ្មោះ ទេព គឹមហាន់ ភេទប្រុស អាយុ២៩ឆ្នាំ ជនជាតិខ្មែរ មុខរបរនៅផ្ទះ ទីលំនៅកន្លែងកើតហេតុ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមត្ថកិច្ចបានឲ្យដឹងថា កាលពីថ្ងៃទី២៤ ខែវិច្ឆិកា ឆ្នាំ២០២១ វេលាម៉ោង១១និង៣០នាទី មុនពេលកើតហេតុ ជនសង្ស័យឈ្មោះ ទេព វ៉ាន់នី បានដើរទៅសុំលុយម្តាយរបស់ខ្លួនចំនួន១៥០០០រៀល ដើម្បីទៅទិញអីវ៉ាន់ តែម្តាយរបស់ជនសង្ស័យខាងលើ ពុំបានអោយនោះទេ រួចជនសង្ស័យក៏បានដើរចូលទៅខាងក្នុងផ្ទះហើយយកមួកការពារដែលទុកនៅលើម៉ូតូខាងក្នុងផ្ទះ ដើម្បីយកទៅលក់យកលុយ តែត្រូវបានម្តាយ និង ឪពុកចាប់ទាញយកមួកមកវិញ ទាញទៅទាញមក។ ភ្លាមនោះឈ្មោះ ទេព គឹមហាន់ ត្រូវជាប្អូនប្រុសរបស់បានរត់ចូលទៅជួយឃាត់ និងចាប់ទាញយកមួកការពារមកវិញ ស្រាប់តែជនសង្ស័យឈ្មោះ ទេព វ៉ាន់នី បានយកចានគូមថ្ម០១ ពណ៌ស វាយមកលើឈ្មោះ ទេព គឹមហាន់ បណ្តាលអោយរងរបួសបែកក្បាលដេរ ចំនួន១៥ថ្នេរ។ ភ្លាមៗនោះ កម្លាំងសមត្ថកិច្ចដែលល្បាតនៅក្បែរកន្លែងកើតហេតុ បានទៅជួយអន្តរាគមន៍ឃាត់ខ្លួនជនសង្ស័យខាងលើ រួមទាំងវត្ថុតាង យកមកកាន់ទីស្នាក់ការប៉ុស្តិ៍នគរបាលរដ្ឋបាលចតុមុខដើម្បីធ្វើការសាកសួរ និងកសាងសំណុំរឿងបញ្ជូនទៅចាត់ការតាមនិតិវិធីច្បាប់៕

អត្ថបទ៖ រស្មី