សាក្សីបញ្ជាក់បន្ថែម មុនសម្លាប់ស្ត្រីរងគ្រោះ ជនដៃដល់បានប៉ះទង្គិចសម្ដីគ្នាជាញឹកញាប់

បាត់ដំបង÷ បុរសជាជនដៃដល់ម្នាក់ ត្រូវបានសមត្ថកិច្ចចុះឃាត់ខ្លួនភ្លាមៗ ក្រោយធ្វើឃាតកម្មទៅលើស្ត្រីម្នាក់​​ខណៈ​ជនរងគ្រោះកំពុងធ្វើម្ហូបអាហារនៅក្នុងផ្ទះបាយនៅវេលាម៉ោង ៧ និង៤០នាទីព្រឹកថ្ងៃទី០១ឧសភា នៅចំណុចភូមិយុត្តិធម៌ ឃុំបឹងប្រាំ ស្រុកបវេល ខេត្តបាត់ដំបង។

មន្រ្តីមូលដ្ឋានបានឱ្យដឹងថា ជនដៃដល់ឈ្មោះសឿន សុខណា ភេទប្រុស អាយុ ៣១ឆ្នាំ។ រីឯស្ត្រីរងគ្រោះឈ្មោះឡាច គីអាយុ ៥៤ឆ្នាំ រស់នៅផ្ទះក្បែរគ្នាក្នុងភូមិឃុំកើតហេតុខាងលើ។

ប្រភពនិយាយថា ជនដៃដល់បានប្រើប្រាស់កាំបិតខ្វែវកាប់ចំកញ្ចឹងកជនរងគ្រោះចំនួនន ០៣ ខ្វែវបណ្ដាលឲ្យស្លាប់​ភ្លាមៗពេល​ជនរងគ្រោះកំពុងអង្គុយធ្វើម្ហូបនៅក្នុងផ្ទះបាយដោយមិនដឹងខ្លួន។

លោកសុខ សារិន អធិការស្រុកបវេលបានឲ្យដឹងដែរថា ជនដៃដល់ត្រូវបានកម្លាំងប៉ុស្តិ៍រដ្ឋបាលឃាត់ខ្លួនភ្លាមៗ បន្ទាប់ពីបាន​កាប់សម្លាប់ស្ត្រីរងគ្រោះយ៉ាងសាហាវបំផុត។

បើតាមចម្លើយរបស់ជនដៃដល់បានប្រាប់សមត្ថកិច្ច ក្រោយការសួរនាំថាមូលហេតុដែលនាំឲ្យសម្លាប់ស្ត្រីរងគ្រោះ ដោយសារ​​តែជនរងគ្រោះរិះគន់ដដែលៗទៅលើឪពុកម្តាយជនដៃដល់​ថា ឪពុកម្ដាយរបស់គេ​ឃុំគ្រងកូនៗមិន​ឲ្យទៅណា​ដែល​ជនដៃដល់គិតថា ពាក្យនេះវាមិនមែនជាការពិត​ទើបធ្វើឲ្យ​ចងជាគំនុំរហូតផ្ទុះកំហឹង​ទាញ​កាំបិតខ្វែវកាប់ផ្ដាច់ជីវិត​ស្រ្តី​រងគ្រោះ​តែម្ដង។

ជនដៃដល់បានសារភាពទៀតថា ខ្លួនទទូលស្គាល់ថាពិតជាបានសម្លាប់ស្រ្តីឈ្មោះឡាច គី មែន ដោយសារខឹងនឹងស្រ្តីរូបនេះ រិះគន់ម្ដងហើយម្ដងទៀតបែបបន្ទាបបន្ថោកដល់ឪពុកម្ដាយរបស់ខ្លួន ដែលគ្មានការពិតទាល់តែសោះ។

ជនដៃដល់បញ្ជាក់ពាក្យរបស់ស្ត្រីរងគ្រោះ​ដែលបាននិយាយពាក្យដដែលៗប្រាប់ដល់សមត្ថកិច្ចយ៉ាងដូច្នេះថា “ស្អីហ្អាឪពុកម្ដាយអ្ហែងអីក៏ឃុំគ្រងកូនៗតឹងតែងមិនឲ្យដើរទៅណាសោះ ខ្លាចកូនដើរជក់ថ្នាំមែន?។ ជនដៃដល់បន្តថា “ការនិយាយបែបនេះដដែលៗពេកទើប​ខ្លួន​ទ្រាំលែងបាន ព្រោះវាគ្មានការពិតឪពុកម្ដាយរបស់​គេ​មិនដែលធ្វើចឹងផង។ ដោយ​ខឹងពេកលុះព្រឹកឡើងក៏ទាញកាំបិតទៅកាប់តែម្ដងទៅ”។

ស្រប​តាម​ចម្លើយសារភាពរបស់ជនដៃដល់ លោក សុខ សារិន អធិការស្រុកបវេលបានថ្លែងបញ្ជាក់ថា នៅពេលកម្លាំងរបស់​លោកចុះទៅដល់កន្លែងកើតហេតុក៏មានសាក្សីនានា និយាយដូចការសារភាពរបស់ជនដៃដល់ដែរ។ សាក្សីនានាក៏ធ្លាប់ឮស្រ្តីរងគ្រោះតែងនិយាយពាក្យរិះគន់ឪពុកម្ដាយជនសង្ស័យបែបនេះដដែលៗពិតមែន។

សម្តីសាក្សីបន្ថែម​តែថា មិនតែប៉ុណ្ណោះពេលខ្លះគេឮជនសង្ស័យឆ្លើយតបបែបចំអកទៅលើស្រ្តីរងគ្រោះវិញផងដែរថា “កូនខ្លួន​ឯងដើរជក់គ្រឿងញៀនរាល់ថ្ងៃមិនអប់រំណែនាំទេ បែរជាមករិះគន់ឪពុកម្ដាយខ្ញុំទៅវិញ”។

លោកសុខ សារិនបានបញ្ជាក់ថា ពាក់ព័ន្ធនិងករណីខាងលើនេះជនដៃដល់មិនពាក់ព័ន្ធនឹងការប្រើប្រាស់គ្រឿងញៀនទេ តែរឿងនេះពិតជាផ្ដើមចេញពីពាក្យរិះគន់ដូចការលើកឡើងរបស់ជនដៃដល់មែននេះ។ បើតាមការស្រាវជ្រាវរបស់សមត្ថកិច្ចជំនាញ។

លោកអធិការបន្តថា ជនដៃដល់ត្រូវបានឃាត់ខ្លួននិងបានកសាងសំណុំរឿងបញ្ជូនទៅតុលាការរួចរាល់ហើយ ដើម្បីចាត់ការតាមនីតិវិធី៕

អត្ថបទ៖ សៅ សារិទ្ធ