កីឡា

ពេញល្អមើល! ក្រុមនារីកម្ពុជា ប៉ះ ក្រុមនារីសិង្ហបុរី ដែលកំពុងឡើងជើង ល្ងាចស្អែក

បានផុស

២ ថ្ងៃ មុន

នៅ

ថ្ងៃសុក្រ ៥ មិថុនា ២០២៦

ដោយ

ក្រុមបាល់ទាត់ជម្រើសជាតិនារី កម្ពុជា នឹងប្រកួតមិត្តភាពអន្តរជាតិជាមួយក្រុមជម្រើសជាតិនារី សិង្ហបុរី វេលាម៉ោង ៦ ល្ងាច ថ្ងៃទី៦ ខែមិថុនា នេះនៅប្រទេសឥណ្ឌូណេស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជំនួបនេះអាចត្រូវបានចាត់ទុកជាការប្រកួតមួយដ៏គួរឲ្យចាប់អារម្មណ៍ បន្ទាប់ពីក្រុមទាំងពីរមានស្ថិតិល្អដូចគ្នា។ ក្រុមបាល់ទាត់នារីសិង្ហបុរី ទើបតែបានយកឈ្នះក្រុមម្ចាស់ផ្ទះ ឥណ្ឌូណេស៊ី ដោយលទ្ធផល ២-០ កាលពីថ្ងៃទី៣ ខែមិថុនា ឆ្នាំ ២០២៦។

នេះគឺជាលទ្ធផលដ៏ល្អនៅក្នុងប្រវត្តិសាស្ត្ររបស់ក្រុមនារី សិង្ហបុរី ដែលបានបង្កើតស្ថិតិថ្មីក្នុងការទទួលបានជ័យជម្នះលើក្រុមនារីឥណ្ឌូណេស៊ី បន្ទាប់ពីធ្លាប់ជួបគ្នា ៨ លើកកន្លងគឺ ពួកគេមិនធ្លាប់ឈ្នះឡើយដោយចាញ់ ៧ និងស្មើ ១ ប៉ុន្តែការជួបគ្នាលើកទី៩ ពួកគេទទួលបានជ័យជម្នះ។ តាមរយៈលទ្ធផលនេះ បញ្ជាក់ឲ្យឃើញថា ក្រុមនារីសិង្ហបុរី ទំនងជាគុណភាពឡើងគួរឲ្យកត់សំគាល់។

បើនិយាយពីប្រវត្តិជួបជាមួយក្រុមនារីកម្ពុជាវិញ ធ្លាប់ជួបតែម្តងគត់កាលពីឆ្នាំ ២០២៣ ក្នុងព្រឹត្តិការណ៍កីឡាស៊ីហ្គេម លើកទី៣២ ដែលពេលនោះ សិង្ហបុរី បានចាញ់ កម្ពុជា ដោយលទ្ធផល ១-០។ ដុច្នេះច្បាស់ណាស់ ជំនួបគ្នានៅល្ងាចថ្ងៃទី៦ ខែមិថុនា នេះគឺពិតជាគួរឲ្យចាប់អារម្មណ៍។ ប្រការមួយ ក្រុមនារី សិង្ហបុរី ព្យាយាមស្វែងរកកំណត់ត្រាល្អលើ ក្រុមនារីកម្ពុជា។ ចំណែក កម្ពុជា ត្រូវការក្សាកំណត់ត្រាល្អរបស់ខ្លួន។

ស្ថិតក្រោមការដឹកនាំរបស់គ្រូបង្វឹក ឃួន ឡាប៊ូរ៉ាវី ក្រុមនារីកម្ពុជាកំពុងស្ថិតនៅក្នុងដំណាក់កាលដ៏ល្អ។ កីឡាការិនីកម្ពុជាបានបង្ហាញសមត្ថភាពយ៉ាងទៀងទាត់នាពីរឆ្នាំចុងក្រោយនេះតាមរយៈលីគបាល់ទាត់នារីកម្ពុជា និងការប្រកួតលើឆាកអន្តរជាតិជាបន្តបន្ទាប់។ កីឡាការិនីសុទ្ធតែត្រូវបានសម្រិតសម្រាំងជ្រើសរើសចេញពីក្រុមនារីនានាដែលកំពុងលេងក្នុងលីគនារីរដូវកាល ២០២៦។

គិតចាប់តាំងពីឆ្នាំ ២០២៤ មក ក្រុមនារីកម្ពុជា ធ្លាប់បានប្រកួតអន្តរជាតិចំនួន ១១ ប្រកួតក្នុងនោះ ឈ្នះ ៤ ប្រកួត ស្មើ ៣ ប្រកួត និងចាញ់ ៤ ប្រកួត ដែលអាចចាត់ទុកជាស្ថិតិល្អ។

អ្នកចាំទី ជា ហ្វារីយ៉ា និង លោក ឃួន ឡាប៊ូរ៉ាវី

សូមបញ្ជាក់ថា នេះជាការប្រកួតអន្តរជាតិនៅក្រៅប្រទេសលើកដំបូងរបស់ ក្រុមនារីកម្ពុជា និងជាការប្រកួតមិត្តភាពអន្តរជាតិផ្លូវការលើកទី២ ហើយនៅថ្ងៃទី៩ ខែមិថុនា ក្រុមនារីកម្ពុជា នឹងប្រកួតជាមួយក្រុមម្ចាស់ផ្ទះ ឥណ្ឌូណេស៊ី មុនពេលត្រឡប់មកកម្ពុជា៕