កីឡាករ Man City ម្នាក់ ត្រូវបានតុលាការ ចោទប្រកាន់ពីបទ រំលោភសេពសន្ថវៈ

ខ្សែការពារ Benjamin Mendy របស់ក្លិបមេឃខៀវ Manchester City ត្រូវបានតុលាការ Cheshire Constabulary ចោទប្រកាន់ពីបទរំលោភសេពសន្ថវៈចំនួន ៤ករណី និងរំលោភបំពានផ្លូវភេទចំនួន ១ករណី។

សេវាអយ្យការ (CPS) បាននិយាយថា ព្រឹត្តិការណ៍ដែលត្រូវចោទប្រកាន់​ គឺបានកើតឡើងនៅទីក្រុង Cheshire ភាគពាយ័ព្យប្រទេសអង់គ្លេស ចន្លោះខែតុលាឆ្នាំ២០២០ ដល់ខែសីហាឆ្នាំ ២០២១ ហើយទាក់ទងទៅនឹងដើមបណ្តឹងបីនាក់ដែលមានអាយុលើសពី ១៦ ឆ្នាំ។

សេចក្តីថ្លែងការណ៍របស់ CPS បាននិយាយថា “Mendy ត្រូវបានឃុំខ្លួននៅក្នុងមន្ទីរឃុំឃាំងរបស់ប៉ូលិស ហើយនឹងបង្ហាញខ្លួននៅចំពោះមុខតុលាការ Chester Magistrates នៅថ្ងៃសុក្រទី ២៧ ខែសីហាឆ្នាំ ២០២១ នេះ”។

ចំណែក នៅក្នុងសេចក្តីថ្លែងការណ៍មួយលើគេហទំព័ររបស់ក្លិប Manchester City បាននិយាយថា Mendy ត្រូវបានព្យួរទោស រង់ចាំការស៊ើបអង្កេត។

សេចក្តីថ្លែងការណ៍បានសរសេរថា “បញ្ហានេះស្ថិតនៅក្រោមដំណើរការផ្លូវច្បាប់ ដូច្នេះក្លិបមិនអាចធ្វើការអត្ថាធិប្បាយបន្ថែមបានទេ រហូតដល់ដំណើរការនេះចប់សព្វគ្រប់”៕

ប្រែសម្រួល៖ Vann Vann

ប្រភព៖ CNN

ចុចអាន៖ បែកធ្លាយ សារចុងក្រោយរបស់ Messi និយាយច្បាស់ៗការចាកចេញពី Barcelona ទៅកាន់ PSG